الأحد، 31 أغسطس، 2008


اصحى يا نايم
وحد الدايم
و قول نويت
بكرة ان جيت
الشهر صايم
والفجر قايم

نعم إنه هو! بجلبابه ،وفانوسه،وإبنه الصغير،وطبلته.هذا الحاضر الغائب الذي يزورنا شهر واحد كل عام و مع هذا يضفى على مجتمعنا تراثاً مميزأً و يترك فى ذهننا ذكرياتٍٍٍٍ لا تنسى….المسحراتي

في الماضي كان المسحراتي يرتبط إرتباطاً و ثيقاً بشهر رمضان،فلا نشعر بقدوم رمضان الا عندما نسمع دقات المسحراتى على (الطبله) الصغيره.ليوقظ الناس لتناول وجبة السحور قبل صلاة الفجر.ولكن في يومنا هذا و مع تطور وسائل التكنولوجيا الحديثة ،أصبح دوره ثانوياً ، مجرد تراث إجتماعى أو مهنة تستدر عطف الناس في رمضان حيث تكثر الصدقات.

أول مسحراتي في التاريخ كان في عهد الرسول محمد عليه الصلاة والسلام وهو "بلال ابن رباح" الذي كان يجوب الشوارع و الطرقات لإيقاظ الناس .أما في مصر فإن أول من قام بدور المسحراتي هو الوالي "عنتبة بن اسحق" سنة 832 ه وذلك أثناء فترة فتح مصر.و منذ ذلك الحين حازت هذه المهنة على إحترام و تقدير المصريين بعد أن قام الوالي بنفسه بإيقاظ الناس، و إستمرت هذه المهنة حتى يومنا هذا .

وقد كان المسحراتي مصدر الهام للعديد من أهل الفن وأشهرهم الشاعر فؤاد حداد الذي كتب فيه قصيدته الشهيرة التى غناهنا "سيد درويش" ليصبح بعدها من أشهر المسحراتية في مصر و أصبح يستيقظ على صوته ملايين من المصريين يومياً في موعد السحور، أما المسحراتي الأصلي فيعتبر صاحب عرض مسلي يشاهده الأطفال من الشرفات و يلوحون له بأيديهم و يضحكون.


--------------------------------------------------------------------------------------


خارج النص: يعني قلت بدل ما أقعد أقول رمضان كريم وكل سنة و أنتم طيبين و بتاع ،فكرت أعمل حاجة مختلفة ذات روح رمضانية :) كل سنة و انتوا طيبين يا صحابي.

الخميس، 28 أغسطس، 2008

عن التحرش أحدثكم ...

بصراحة بقى موضوع الحملات اللي على الفيس بوك بتاعت منع التحرش و المعاكسة دي مجنناني ،حاسة ان الناس عملاها مولد و زايطيين فيه وبالرغم من اقتناعي بنبل الهدف،إلا ان الموضوع فقد زهوته تماماً وبقى عامل زي ما نكون في حرب . في البداية حملة "احترم نفسك" اللي عملاها مجلة كلمتنا ، و حملة تانية بترد عليها "احترمي نفسك في لبسك" ، وحملة "حتى لو البنت عريانة ملط"! و جروبات تانية كتير،دور انت بس ..

أولاً عايزه انوه عن حملة مجلة كلمتنا بما اني بكتب فيها و فاهمة الحملة كويس: حملة "احترم نفسك" تهدف للقضاء على ظاهرة التحرش بصورة عامة من المجتمع، و الحملة لم تحدد المتحرش ، فهي تخاطب كل انواع المتحرشين سواء كانوا رجال أم سيدات ، شباباً أم مسنين و هي لا تتحيز لطرف ما بعينه ..الحملة تدين فقط المتحرش . نعم لا ننكر أن ظاهرة لبس البنات الضيق لها أثرها على نفسية الشباب، ولا ننكر أيضاً أن الأفلام ووسائل الإعلام لها أثر،لكننا في النهاية نهدف لتوعية الشباب من الجنسين عن : ماهو التحرش،أسبابه،تأثيره،طرق الوقاية منه. و عندما نقول "احترم نفسك" فنحن لا نقصد الرجل و لكنه تعبير دارج في الصحافة و الحياة أن نخاطب الرجل فنحن لا نقول "أيها العميل ..أيتها العميلة"و لا نقول "عزيزتي القارئة" بل نقول "عزيزي القارئ" ..يا رب تكون وصلت ! كما أن حملة "احترم نفسك" لم تتهكم أو تقلل من قدر أي حملة أخرى أو تتعدى بالسب على أحد أعضاء الحملات الأخرى.
إقرأ معي ما جاء في بوست أحد أعضاء حملة "إحترمي نفسك في لبسك" :" دلوقتى فى حملة اسمهااااحترم نفسك ،والمشكلة ان رؤساء الحملة البنات بيلبسوا عريان ومش محجبين وبيقولوا غض بصرك زى ما ربنا قال ،طيب ما انتم احتشموا زى ما ربنا قال واحنا بالتاكيد هنغض بصرنا لاننا مش هنلاقى حاجه من جسمكم علشان نبص عليهااااااااااا" .أيه قلة الذوق دي؟؟ أنت تعرف الناس دي منين يا حضرت عشان تحكم انهم بيلبسوا عريان ؟! و تعرف أخلاقهم منين ؟ طب مهم ممكن يكونوا لابسين حجاب و زي قلته ..كنت هتقول أيه بقى ساعتها ؟؟

أما عن حملة "احترمي نفسك في لبسك "فده كان تقديمهم للجروب بتاعهم : "حبينا نعرض عليكم اى واحدة ممكن ترد تقول ايه واى واحد هيرد يقول ايه واحنا فى جروبنا وحملتنا عاوزين نقول ايه ؟نتكلم بالامثلة الشعبية وتعاليم المجتمع وبعض التشبيهات الطريفة:
1 - فى مثل شعبى بيقول ( كل اللى يعجبك والبس اللى يعجب الناس ) واعتقد ان اللى يعجب الناس اننا نمشى محترمين ومؤدبين
2 - تشبيه ظريف لما الحلاوة تبقى مش متغلفة وتبقى عريانه بالـتأكيد النمل والدبان هيتلم ولما تكون متغلفه كويس ومش باين منها حاجه طبعا النمل عمره ما هيقرب ليها لانه مش يعرف ايه اللى جواهاااا يفهم مين الحلاوة ومين النمل .
3- تشبيه حقير شوية اعتبار البنت حتة لحمة واعتبار الشباب كلاب ضاله فى الشارعولما الكلاب بيشوفوا حته لحمة قدمهم ايه اللى هيحصل بالتأكيد هيفرتكوها و هيفترسوها.
4 - لو فى مصاصة عريانه ومش متغلفة ايه اللى هيحصل طبعا الدبان هيتلم ولو المصاصة متغلفة ومحبوكه كويس عمر ما فى دبانه هتقرب .ياريت الكل يفهم ويعرف احنا قصدنا ايه".
و النبي أيه التشبيهات المقززة دي ؟! واخدين بالكوا من كلمة "حلاوة،دبان،نمل،لحمة ،كلاب، يفرتكوها،يفترسوها،محبوكة"..في رأيكم هي دي المصطلحات الحضارية اللي بتوضح علاقة المرأة بالرجل في المجتمع ؟

صورة من صور الجروب.على إعتبار يعني ان المحجبة اللي بتلبس بنطلون ولابسة طرحة قصيرة هي فتاة للمتعة و المصاحبة،أما البنت اللي لابسة عبايةأ و فستان طويل و طرحة طويلة فدي بأه المصونة اللي لاوم تتجوز !!

ودي صورة تانية مستفزة في الجروب..كل الناس عمالين يعلقوا " اهو كدة ولا بلاش"،"أهي البنت دي عمرها ما تتعاكس أبداً،"يا سلام على الطهارة و الأدب و الحياء"......ياااااااااااااسلام !! هي عشان البنت حلوة و رقيقة و بصة عالأرض و هي بتتكسف تبقى طاهرة الشريفة..ده في فتيات ليل منقبات ..والله منقبات!! و بعدين احنا هنضحك على نفسنا ؟ هي البت دي لو ركبت المترو مش هتتعاكس يعني ؟ طب لو ركبت الأتوبيس الأخضر بتاع شركة لبنان؟ هتتعاكس ولا ؟

أما بقى المسكينة حنان ترك-اللي مش عاجبة حد- فده التعلق اللي اتكتب على صورتها : " انتو مش ملاحظين انها لابسة كارينا مفسر ايديها ؟يا ريت تشيلوا الصورة دى بدل ما حد يفهم غلطلا يشف و لا يصف و البادى ده مفسر ايديها"..أقول أيه بس؟ و كأن حنان ترك ساقطة صورتها لازم تتشال عشان الفتنة اللي هي عملاها بال"باالبادي الكارينا"!


هناك جروب آخر أسمه "لا للتحرش" لخص أهدافه في :"عاوزين نوقف اللى بيحصل ده ،المفروض مافيش راجل و ست ،كلنا بنى ادمين و نراعى ادميه بعض ،بلاش حد ينهش التانى كلنا و لاد ادم و مخلوقات ،حرام نأذى بعضنا" و غم أن الكلام عين العقل إلا إن الأسلوب كان محتاج يبقى أقوى من كدة شوية.اللطيف بقى كومنت من أحد الفتيات على الجروب بتقول: "يا استاذ سراج الدين وليه متلبسش اللى هى عايزاه، لانه الموضوع مبقاش يفرق عند الى بيعاكس محجبة او منقبة او لابسة محترم او مش محترم وللاسف الكلمة اللى انت بتقولها ده من احد الاسباب اللى شجعت على لماة التحرش وزيادته فياريت نعقل ونحترم جسد لمراة وحريتها " و لو نظرت لصورة الفتاه ستجد أنها بنت مستلقية على سرير و هي ترتدي "حملة صدر" ، "Bra" يعني !! .لن أضع الرابط هنا ، ممكن البنت تغير صورتها والله أعلم ممكن تكون لابسة أيه المرة الجاية :)

أما بقى الجروب الكوميدي جداً و اللي خلتهولكوا للآخر عشان تحلوا بيه ..هز جروب "حتى لو البنت قالعة ملط"..الله عالإسم أد أيه راقي و مؤثر..دي تقديمة الجروب ، لابد أن تقرأوها كما هي :"من الاخر بقي ..احترم نفسك و ما تعكسش حتي لو البنت قلعه ملط.. دي مش دعوه للعري !انا عملت الجروب ده عشان طهقت!!!! كل حد بيلوم البنت!!!!! كفايه بقي..بقيت اكره نزول الشارع!!(((كلامي موجهه لرجاله(في البطاقه فقط) اللي بيتحرشوا)))))ممكن اعرف لما اتحرشت استفدت ايه؟! بتحاسبها عشان لبسها؟ فاكر نفسك مين عشان تحاسب حد!!! ربنا سبحانه هو اللي هيحاسبها و هيحسبك علي سفالتك!!عايزه افهم بس ازي جالك قلب تحلل لنفسك التحرش؟ و تقول هي اللي مش لبسه كويس و تستاهل. طب هي غلطانه!! انت مالك!! اتحكم في غرائزك!! ما تبقاش زيك زي الحيوان !! هرموناتك هي اللي بتحرككانت مين اصلا عشان تغير حد؟! ده الرسول عليه الصلاه و السلام كان عمه كافر و ما اهتداش علي ايدو!!! تقوم تيجي يا بتاع انت.. فاكر نفسك هتهدي البنت!! !!!متقليش ماهي ماشيه و مش بتراعي!! و الله لو هرموناتك تعباك اوي كده ... روح اتجوز!!! مش معاك فلوس؟!!دي مش مشكله البنت!! روح حاسب امك اللي نسيت تربيك!!! او حاسب ابوك اللي فضل يخلف لحد ما بقينا 80 مليون و مش معاه فلوس يجوزك بيها!!! مش مشكله البنت بصراحه!! بنات حشمه ولا محجبات و منقبات .. مش رحمين حد!!حتي اللي مشيه مع عيالهابيقللك الراجل طلق مراته لما شاف واحده لبسه عريان!!!! يا سلامممممممممم علي الراجل المصري(راجل في البطاقه فقط) لما يحب يبرر للنفسو الغلط!!! و اشمعنا الست مش بتطلب الطلاق لما بشوف حسين فهمي و لا احمد عز!! و موافقه بيك بشكلك و ريحتك و قرفك لو علي البنات كرهنا نزول الشارع بس نعمل ايه بقينا لازم مضطرين نتعلم و نشتغل عشان نصرف علي البيوت.. اصل الرجاله مبقاش ليها لازمه الا في التحرش روح شوفلك حاجه تعملها... خرج فيها الطاقه اللي عندك.. الدين بيقوللك غض البصر!! مش هقلك اعتبرها امك ولا اختك.. ولا كلام الشحاته ده !!لان اهله يستهلو اي حاجه تحصلهم!! !اللي يفرس .. البنات اللي تقوللك ان البنت السبب!!! طب هما رجاله تعبانه و مش عرفين يلمو نفسهم!! لكن انتي بنت و شيفه اللي بيحصل!! و شيفه قلت ادبهم..عرفه ان اسم الجروب يخض.. بس كان لازم استخدم اسلوب نهائي و قاطع!! ان سيب البنات في حالها!!! مهما كانت عامله في نفسها و دي مش دعوه للعري!! دي دعوه عشان نحترم نفسنا.. سيبو البنات في حالهاشيفه ناس فاضيه بتقول الجروب مش حضاري!!!!! مضيقك اوي اسم الجروب!! شايفو مش حضاري!! و صوره الجروب وحشه ؟؟.....طب شكل الولد و هو بيعاكس هو اللي حضاري؟؟ شكل البنت و هي بتجري و الولاد بيلمسو جسمها هو اللي حضاري؟؟؟ شايف صوره الجروب دي؟؟؟ اهو ده اللي بيحصل كل يوم!!! شايف بشاعه المنظر؟؟؟ حاسس البنت بتحس بي ايه؟؟ ملحوظه: اي كلمه مش ظريفه قلتها عن الرجاله.. بيكون قصدي علي الرجاله اللي بتعاكس.. انا مش ضد الراجل لاني بحب ابويا و اخويا".

بالنسبة لصور الجروب ده بقى ، ففي صديق كاتب قاللي ان الصور اللي في الجروب دي أصلاً بتدعو للتحرش لأنها صور مثيرة....هههههههه..جت بالعكس يعني !! ودي عينة من الصور اللي عالجروب ..لا تعليق، واضح ان صديقي كان معاه حق :)







الأربعاء، 27 أغسطس، 2008


حضرت بالأمس حفل توقيع كتاب "مبسوطة يا مصر؟" للمدون و الكاتب و الشاعر أشرف توفيق في مكتبة البلد ،أكثر ما ضايقني هو الإزدحام و ارتفاع درجة الحرارة رغم وجود أجهزة التكيف ، لكن ما شاء الله أشرف حبايبه كتير. الكتاب هو الكتاب الأول له و يتميز بأسلوبه الساخر و لغته العامية السهلة فأشرف يتمتع بحس ساخر جداً يجعلك لا تتمالك نفسك من الضحك أثناء القراءة. حضر الحفل العديد من المدونين و الكتاب أشهرهم غادة عبد العال "أنا عايزة أتجوز"و "محمد هشام عبيه.
بيانات أكثر عن الكتاب :
عن دار مزيد للنشر
الطبعة الأولى 2008
عدد الصفحات:120
غلاف:عمرو عبد العزيز
السعر 10 جنيه



الثلاثاء، 26 أغسطس، 2008

مسلسل نور ..أصحاب العقول في راااااااحة !

أن نشاهد جميلاً مسلياً و نحبه و نتابع حلقاته ،فهذا بالأمر العادي ،أما أن يتحول مسلسلاً بعينه الي ظاهرة و خبرتفرد له الصحف صفحات و صفحات فهذا أمر مستهجن وغير مقبول!!

أتحدث هنا عن مسلسل نور ، مسلسل نور الذي أصبح يطاردنا في كل مكان، في القنوات الفضائية،في التلفزيزن المحلي،على صفحات الجرائد و المجلات،في الأغاني، في رنات الموبايل..في كل مكان! نحن من سمحنا بذلك عندما أعطينا هذا العمل أكثر من حقه نحن من سمحنا أن يكون بعض المهمشين في تركيا أبطالاً يطلبون ألاف الدولارات للظهور في صحفنا وقنواتنا.لماذا كل هذا؟أهذا بسبب بعض الرومانسية ووسامة مهند؟ أتستحق وسامة رجل كل هذا الإهتمام من قبل فتياتنا و شبابنا ؟!

عن قصة المسلسل و أسباب نجاحه:

مهند شاب غني يفقد خطيبته في حادث اليم و يصاب بالإكتئاب فيقرر جده تزويجه من نور قريبتهم الفقيرة اليتيمة ،يوافق مهند مضطراً حتى لا يخالف أوامر جده و لكنه لا يستطيع أن ينسى نهال-خطيبته-و أن يتقبل نور كزوجة،ولكن نور تحاول و تبذل أقصى ما تستطيع حتى تستطيع في النهاية أن تفوز بقلب مهند و بعد فترة يتضح أن نهال لم تمت و أنها كانت حاملاً من مهند قبل الحادث و من هنا تبدأ المشاكل و الصراعات.أما عن الأحداث الفرعية في المسلسل ، فهي أحدا عائلة مهند و نورالذين يقيمون بأجمعهم في قصر واحد وهو قصر الجد.

هذا المسلسل يصنف كدراما إجتماعية تناقش قضايا هامة تمس الأسرة العربية مثل صلة الرحم، و الزواج، و الطلاق، و تربية الأبناء ،و لذا حاز المسلسل على إعجاب الأسر العربية لقرب العادات و التقاليد من عاداتنا و تقاليدنا فمسلسل نور هو الأقرب لنا في هذه النقطة إذا ما قورن بالمسلسلات المدبلجة الأخرى.و تعد الدبلجة باللغة السورية سبباً آخر من أسباب نجاح المسلسل فاللغة السورية أصبحت قريبة جداً من المشاهد العربي و ذلك بسبب الغزو الكبير للمسلسلات السورية في قنواتنا.أما عن قصة الحب الملتهبة ووسامة مهند الفائقة فحدث ولا حرج، فقد أصبح مهند حلم كل الفتيات و السيدات، وأصبحت الرجولة تعني شخصاً واحداً بالنسبة اليهن ..مهند ! ومما ساعد في زيادة الظاهرة أن نور فتاة عادية تشبه أي فتاة عربية ،فهي ليست الشقراء ذات العيون الزرقاء، و مع ذلك فقد حاظت بحب مهند فلم لا تحظى به كل الفتيات العربيات ؟!و الصراحة أن مهند "ناصح"جداً فقد أعلن أثناء زيارته أنه على إستعداد كامل للزواج من فتاة عربية بشرط أن يحبها ، مما أعطى الأمل لملايين الفتيات العربيات.

هذه بعض الأخبار التي كتبت عن المسلسل و أبطاله على صفحات الصحف و المجلات و الإنترنت مع بعض التعليق مني، تلخص لكم كم المهزلة التي وصلنا اليها :

-"نور و مهند يزورون الاردن من أجل ترويج السياحة في الأردن و التحدث عن الشباب و كيفية الوقاية من حوادث السير" عفواً و ماعلاقة أبطال مسلسل نور بسياحة الأردن و حوادث السير!

-"مهند بطل مسلسل نور شاذ جنسياً و يكره النساء ة الدليل صوره على مجلات تروج للشذوذ". أولاً:لا يعني أن الموديل عرض صورته في مجلة تروج لأخبار الشذوذ أنه شاذ فكل شيء يهون أمام المال.ثانياً: ما أهمية كون مهند شاذا أم لا بالنسبة لتقييمه كفنان ؟!

-"مهند يصور كليب مع رولا مقابل 12000دولار ،ورولا تقول انا محتاجة ممثل شاطر"للذي شاهد الكليب مالبراعة التي قام بها مهند في التمثيل؟ قولي بصراحة أنك تريدين إستغلال شهرته للترويج للكليب.

-"الفنانة رولا سعد تؤكد مهند ليس شاذا ".وكيف تأكدت رولا من هذا ؟

-"قناة روتانا تطلق سي دي جديد لأغاني مسلسل نور". عفوا!،ماهي أغاني مسلسل نور التي تحتاج لسي دي كامل؟ أغاني تركية لا نفهم منها شيئاً.

"مهند يقدم عمرو دياب في حفلته في سوريا، و بوستر مهند و عمرو دياب بنفس الحجم" هو مين اللي مفروض يقدم مين؟

-"العديد من حالات الطلاق بسبب مسلسا نور"هل وصلت التفاهة بالعرب لهذه الدرجة؟

-"مفتي السعودية يحرم عرض و مشاهدة مسلسل نور لأنه خبيث و منحل و به علاقات خارج إطار الزواج"و إشمعنى مسلسل نور بالذات؟ وماذا عن باقي المسلسلات الأخرى؟

-----------------------------------------------------------------


الأحد، 24 أغسطس، 2008



أقراص المسكن ..تجربة ناجحة بكل المقاييس

صدر أخيراً ديوان أقراص المسكن(شعر و رسم) للشاعر هاني سامي و أخيه الرسام شريف سامي عن دار ملامح .فكرة اتحاد الأخوين فكرة ناجحة ،كان لها أثرها العميق في ظهور هذا التناغم الذي تراه بين الكلمة و الصورة ..ستشعر أن الكلمة تحتاج الصورة ،والصورة تحتاج الكلمة و لن تستطيع تخيل عنصر ما بدون الآخر.


ما يميز هذا الديوان هو إختلاف و تنوع الأفكار .فالشاعر يتحدث عن العالم الجديد ،وأسطورة إيكاروس الإغريقية،و الموت البطئ،و قانوني أوم و نيوتن !! لذا فإن كنت ذلك الشخص الرومانسي الذي يبحث عن قصائد الحب الوردية من نوعية "حبيبتي أصابعها مرمرية و عيونها لوزية " فأنصحك بأن لا تشتري هذا الكتاب.

تأثر الشاعر بالطبيعة في بعض المفردات : "فراشات،عنكبوت،الشمس،أجنحة،حيوان،ديدان،تفحة،الثعبان" و في أحيان أخرى استخدم مفردات سوداوية كئيبة : " غضبي الأسود، فضاء الإنتقام،السفاح،السكاكين،الموت،تابوت،جثة،أموت.."
كما برع في استخدام التشبيهات : "حزين أنت في وسط أناس يشبهون حافظات نقودهم" ، "تطفئ هلالاً في عتمة الحجرة و تعلقه سواداً تحت جفنيها "مما جعل قراءة هذا الديوان تجربة ممتعة أنصح بها كثيراً.

بيانات أكثر عن الكتاب:

الطبعة الأولى سبتمبر 2008
السعر:20 جنيه
تصميم الغلاف : شريف سامي
عن: دار ملامح للنشر
عدد الصفحات :99
تجدونه في مكتبة الديوان
------------------------------------------------
تحديث: نشر المقال في جريدة "شباب مصر" الإلكترونية


صديقتي "الوجودية" بسمة !

مش عارفة ليه دايماً بقول عليها "وجودية" مع اني مش فاهمة معنى الكلمة دي كويس أوي،بس لما بقرأ عن الشخصيات ال"وجودية" في قصص احسان عبد القدوس بتخيل بسمة علطول .عصبية،فنانة،انطوائية،مثقفة،شتومة،دمها خفيف،صوتها عالي،مدخنة.......وجودية!!
بالنسبالي هي توأمي،متهيألي لو كان عندي أخت توأم مكنتش هتبقى قريبة مني كده.ما بينا تناقض شديد و تشابه أشد ، و ما تسألونيش ازاي .التناقض اللي عند بسمة موجود عندي،بس الفرق ان هي بتطلعه و بيبان في سلوكها،انما انا مش بطلعه قوي فبيفضل جوايا مؤدياً لمزيد من الكبت .بسمة بتمارس تناقضها على الملأ و اللي عاجبه عاجبه واللي مش عاجبه يتفضل يخبط دماغه في أجدع حيط ..عندها فصام من الآخر :)

عن التناقض :
بسمة 1: بتحب و رومانسية، و بتسمع حسام حبيب و عمرو مصطفى و سعاد ماسي و براين أدامز، و لابسة سلسلة عاى شكل قلب.
بسمة 2: بتكره الرجالة ،و بتلعن ابو الحب ،و سادية، و بتحب تشوف الدم و القتل، و بتتفرج على كليبات مرعبة في يو تيوب، و مرة كانت حطة خلفية رجل مفتوحة و كلها دم وطالع منها شريحة !

بسمة 1:محجبة وبتلبس عباية،بتسمع قرآن و ابتهلات ، و بتحضر دروس مصطفى حسني ،و كاتبة على سقف الأودة "أرأيت الذي ينهي عبداً اذا صلى".
بسمة 2:شعرها منكوش، بتلبس 4 حلقان في ودنها ، وحلق في منخيرها ، و حلق في ..ولا بلاش ! و لبساها قمة التحرر و بتشرب سجايرفرط من الكشك بتاع عم فارس !
كفاية تناقض لحد كده عشان ما تتعبوش : )
----------------------------------------------------------------
بسمة.. قضيت معاكي أحلى أيام حياتي ، ولسة بعيش معاكي كلمة الصداقة بكل معانيها، يعني عمري ما لقيت كلمة توصف علاقتنا غير انك الsoul mate بتاعتي. بحبك زي منت بشتايمك، بعصبيتك، بفصامك،بسجايرك،بضحكتك الحلوة اللي طالعة من القلب .

*فاكرة لما جيت الكلية و كنتي بتبقي قاعدة لوحدك بتقصي ضوافرك في المدرج و اتكلمنا و بقينا صحاب؟
* فكرة أيام المذاكرة السودة و كمية الدليفري المهولة اللي كلناها ؟
* فكرة لما جتلنا هوجة الفن و قعدنا نجيب لبعض تماثيل و و انتيكات وصور و كتب ؟
*فاكرة لما كنا بننزل الساعة 8 الصبح ننط في الأوتوبيس و نروح وسط البلد نفطر في المحل المقزز بتاع الفول و الطعمية و نتمشى ف سليمان باشا و طلعت حرب و بعدين نروح المتحف و أم الدنيا؟
*فاكرة لما طلعنا الرحلة بتاعة الأقصر و أسوان و طبت علينا المعيدة في الأوضة و لقيتها ولا أوض العزاب..سجاير و هدوم مرمية و كراكيب و ريحة الحمام مؤرفة؟..هههههه
*فاكرة لما زعقتي في المعيد أدام الناس كلها و كان هيصعد الموضٍوع لرئيس القسم ..لولا أنا كلمته و قلتله انك مريضا نفسياً و بتتعالجي ؟
*فاكرة لما كنت حامل و بذاكر عندك و لعبت عقلة ف بيتك وكان البيبي هيقع ؟
*فاكرة لما كنت حامل في التاسع وكنا بنرقص على أغنية بوسي كات بتاعت تومي جونز؟
*فاكرة لما طلعنا في موضة التان و بقينا نروح البسين نتحرق من الشمس عشان ناخد اللون، فاكرة لما عملت شعري أصفر كله عشان نبقى شبه بعض ؟
* فكرة لما كل الناس كانوا يشوفوا صداقنا و قربنا من بعض يسألونا "هو انتوا من اياهم "؟!!
*فاكرة لما كنتي بتقوليلي"شوشي" وأنا أقلك "بسابيس السكر"؟
*فاكرة لما كنا بنبات في شقة جدتك و كنت بترعب بليل لما أقوم و أشوف لوحات عمتك المخيفة ؟
*فاكرة لما اتنرفزتي من الواد أحمد سعد و خرمتي مناخيرك بإبرة سخنة..يا بت يا ماسوشية :)
*فاكرة صور الستات العريانة المعذبين في الأرض اللي كنتي أرفة أمي بيهم..ممكن تهدي المدونة رسمة من دول ؟
*فاكرة الفطيرة اللي كانت بتتحرك لوحدها يوم الخميس اللي فات?

بحبك مووووووووز مووووووووووووز







ابن عبد الحميد الترزي
هكذا أكمل عمر طاهر ثلاثية " الألبومات الساخرة" !

منذ أول وهلة تنظر فيها لهذا الكتاب تشعر بتميزه و الجهد المبذول فيه، بدءاً من الغلاف الذي أجاد الفنان أحمد اللباد أن يجعله مختلفاً عن غلافي كتابا عمر السابقين: "شكلها باظت" و "كابتن مصر "بالرغم من كون السلسة واحدة ،على الغلاف تقرأ "ابن عبد الحميد الترزي" وبعد قراءة الكتاب بالكامل لن تجد أن اسم "عبد الحميد الترزي" قد ذكر سوى على الصفحة الثالثة متبوعاً بإهداء للممثل الضيف أحمد .ولكن ما سر هذا الإهداء؟ السر يكمن في إختيار إسم الكتاب من فيلم " عودة الندل" فالفيلم من إنتاج، و إخراج، و تأليف "ابن عبد الحميد الترزي". و لهذا - في و جهة نظر الكاتب- استحق الضيف أحمد هذا الإهداء، وقد جاء إختيار عمر طاهر للجمل اللتي بدأ و انهى بها كتابه غريبة جداً . ففي بداية الكتاب ستقرأ عبارة "كل اللي بيروحوا السينما هيخشوا النار، محمود حميدة في بحب السيما" التي لا أعلم مبرر ذكرها ..هل هي للسخرية ؟ أم أن عمر طاهر مقتنع أن كل اللي بيروحوا السينام هيخشوا النار ؟!، أما الجملة التي ينهي بها كتابه فهي " كلنا هناخد فيها ، أشرف عبد الباقي في خالي من الكوليسترول.!


يرى عمر طاهر أن السينما هي أصدق كتاب تاريخ سجل بالصوت و الصورة كيف كان يعيش مجتمعنا خلال العقود الماضية و نتيجة لذلك فهذا الكتاب يعتبر أحد كتب التاريخ بشكل أو بآخر .يتناول الكتاب عدة موضوعات مثل :"كيف تعرف أن تشاهد فيلماً من قبل ثورة يوليو مرورأً بالنكسة،والعبور،,وحرب أكتوبر،والسادات،وجيل الموبايل،حتى تصل للألفية الثالثة، و كل ذلك طبعاً في عرض شيق بأسلوب عمر طاهر الساخر.ومن اطرف المواضيع التي يطرحها الكتاب :"كيف تعرف أنك تشاهد فيلماً دينياً؟،كيف تعرف أن الإغراء في سياق الدراما؟،كيف تعرف انك تشاهد فيلماً في دار عرض مصرية؟،كيف تعرف ان كاتب الفيلم سينارست مصري؟".وينهي عمر طاهر كتابه بأفضل 100 جملة سينمائية يمكن كتابتها على مؤخرة الميكروباصات و التكاتك..وقد أعجبت شخصياً بمعظم هذه العبارات ووجدتها أقيم و أجمل من أن تكتب على مؤخرة الميكروباصات و التكاتك!
عمر طاهر ..شكرأ على إصرارك الشديد أن تمتعنا و تسعدنا في كل كتاباتك ..
------------------------------------------------------------------
خارج النص:

عمر طاهر سينارست كتب عدة حلقات من" تامر و شوقية"، و مسلسل "سوبر هنيدي" الذي عرض في رمضان،وهو شاعر أيضاً ليه ديوان في السوق بعنون "قهوة و شيكولاتة"،و شاعر غنائي اذكر له أغنية أصالة "خليها على الله" و أغنية "كلمة" بتاعت رامي صبري الجديدة، وهو صحفي أيضاً يكتب في مجلة احنا، و مترجم، ترجم احدى روايات" باولو كويلهو"....


عمر طاهر في ويكي بيديا

السبت، 23 أغسطس، 2008

فرق مصرية ...

من كام سنة فاتوا كان المطربين و العازفين الكبار بس اللي بيتكتب عنهم في الجرايد واالمجلات ،كان صعب جداً تلاقي مجلة بتتكلم عن شباب ما كملش عشرين سنة. لكن دلوقتي حاجة تانية ،الشباب بيتكتب عنه في المجلات صفحات و صفحات ،بجد أصبح في نماذج مبهرة ، تجبرك إنك تسمعها و تحضر حفلاتها،وهما دول اللي هنتكلم عنهم دلوقتي فرق شبابية استطاعت ان تحفراسمها بفونت كبير جداً على صفحات الفن !ومش معنى اننا اتكلمنا عن الفرق دي بس ان مفيش فرق تانية ناجحة،لكن لو اتكلمت عن الشباب الناجح في مصر يبقى لازم اكتب بوست مهول.
فرقة وسط البلد:


تعتبر من أول الفرق الغنائية الشبابية اللي ظهرت في مصر، في الأول كان اسمهم grey ratلحد ماسامح العزب أطلق عليهم اسم وسط البلد لأنه ده كان أكتر مكان بيتقابلةا فيه ، فضلوا يكافحوا و يكافحوا لحد ما وصلوا لجاليري المشربية و عملوا فيه أول عروضهم و كل فرد قبض 30 جنيه !!
بعد كده قدروا يوصلوا بمجهودهم للعديد من الأماكن الثقافية زي القلعة و برلتز و كايرو جاز كلوب و ساقية الصاوي و بدأوا يمثلو مصر في مهرجانات عالمية ، ظهروا على شاشات السينما أول مرة مع الفنانة عبلة كامل في فيلم عودة الندلة .و نزلوا أول البوماتهم رسميا في 2008 وهو البوم قربيلي.
مزيكا وسط البلد بجد مش زي أي مزيكا ، كل واحد في لبفرقة ليه شخصيته المميزة و جمهوره العريض ولو حد منهم مجاش مرة حفلة تحس ان في حاجة كبيرة ناقصة .وسط البلد بيلفوا بيك العالم و انت بتسمعهم ، بيلعبوا كل انواع الموسيقى اللي في الدنيا عشان كدة مزيكتهم اسمها "world music"
أعضاء الفريق: أدهم السيد-غناء
هاني عادل-غناء،جيتار.
أحمدعمران-عود
إسماعيل فوزي-غناء
محمد جمال الدين-بيركشن
ايهاب عبد الحميد بركشن
أسعد نسيم -سبانش جيتار

إفتكاسات :
فريق "إفتكاسات" هو واحد من الفرق القليلة اللي أثرت في الموسيقى المصرية، يمكن في ناس كتير بتغني و ناس كتير بتسمع مطربين،لكن مش بسهولة بنلاقي عازفين موهوبين يخلوا الناس تسمع موسيقى بس من غبر كلام..إفتكاسات عملوا ده و دخلوا نوع جديد من الموسيقى لمصر و هو "الجاز الشرقي" أو ما يسمى احيانا ً بموسيقى الدمج(fusion) لأنهم دمجوا بين العديد من أنواع الموسيقى في مقطوعاتهم.
البومهم الأول "مولد سيدي اللاتيني" تجربة فنية متميزة، ففي هذه المقطوعة يتخيل المؤلف نفسه في مهرجان لاتيني بكل صفاته،ثم يتخيل نفسه في مولد آخر مصري و فجأه يجتمع الحدثان سوياً فتسمع تداخل رائع بين الفن الشرقي و اللاتيني. دي تعتبر رسالة إنسانية ثقافية هدفها توحيد الثقافات.
أنشئ الفريق عام 2001 وقد إكتسب شعبية واسعة بعد حفلته الناحجة جداً في" كايرو جاز كلوب" عام 2002 ثم انتشر الفريق أكثر فبدأ يعزف في "الساقية "و مهرجانsos music و العديد من مهرجانات الجاز العالمية.
أعضاء الفريق:
عمر صلاح - بيانو
سامر جورج -باص
عمر خيري-درامز
هاني بدري-ناي
اوسو-جيتار
محمد مدحت-فيولينة
هاني بدير-إيقاع.

بلاك تيما:
3 شباب مصريين نوبين بيقدموا موسقى السود زي "الراب "،و "الهيب هوب:، و"الريجى "،و "النوبي "عشان كده اسمهم "بلاك تيما" ، و كلماتهم بسيطة جداً من قلب الشارع المصري بجد و بتعبر عنه.
و الفريق يتكون من 3 مغنيين أساسيين هما :أمير صلاح وأحمد باهر ومحمد عبده.أما العازفين فأنهم غير ثابتين و بيتغيروا كل فترة.الفريق اتأسس عام 2004 على يد أمير صلاح و محمد باهرثم انضم اليهما محمد عبده وكانت أول عروضهم في ساقية الصاوي


نغم مصري:

فرقة نغم مصري أسسها كل من شربيني و أوسو عام 2000 و هما بيغنوا اشهر أشعار القرن العشرين وبالذات أشعار صلاح جاهين،و أحمد فؤاد و امل دنقل. يتميز غناء الفرقه بأنه شرقي جداً ذو توزيعات حديثة ، أما أوسو فهو موهبة لا غبار عليها فكل من يراه على المسرح ينبهر من عزفه على الجيتار.


إسكندريلا:
لما تسمع اسكندريلا عمرك ما هتصدق انهم بيغنوا أغاني بقالها 100 سنة و أكتر بالعكس هتحس انك قاعد في جو شبابي جداً و بتسمع أغاني تغلب عليها الأصالة ، اسكندريلا شديد الأيمان بدور سيد درويش والشيخ إمام عيسى في تطوير موسيقى القرن كله وعشان كدة قرروا انهم يعيدوا أحياء فنهم من جديد و يدوا للناس دي حقها وسط جمهور الشباب. الفرقة بدأت عام 2002 و لكنهم ماقدروش يستمروا لأسباب خارجة عن ارادتهم و لكنهم رجعوا بقوة عام 2005.واللي بيميز فرقة اسكندريلا هو صعوبة الفن اللي بيقدموه و ده لأنهم دايماً بيتحطوا في وضع مقارنة بين القديم و الحديث.
أعضاء الفرقة:
حازم شاهين - عود و غناء
شادي مؤنس-عود و غناء.
سامية جاهين-غناء.
آية حميدة - غناء.
نور بهجت-بيانو و غناء.
هاني بدير-إيقاعات.

فرقة: Gipsea
تقدو فرقة Gipseaنوع جديد من أنواع الموسيقى و هو "الفلامنكو الشرقي" و هو مزج الموسيقى اللاتينية و الفلا منكو بالموسيقى الشرقية.أول مرة سمعتهم كنت سامعة الموسيقى و مش شايفاهم ،أفتكرت فالأول ان حد مشغل شريطgypsy kingsلكن في الآخر طلعوا gipseaمكنتش مصدقة نفسي ، الفرقة دي وصلت لدرجة كبيرة من الأجادة.
أعضاء الفرقة:
مينا أطوان- كمان
شريف فهمي- سبانش جيتار
جهاد طلبلني-سبانش جيتار
محمد نبيل-بيركشن

الجمعة، 22 أغسطس، 2008


فراس و أنا : الحلقة الثالثة
بالرغم من كل الضغوط ، أصبحت أستمتع بفراس كثيراً و أحب البقاء معه،أقمت عند والدتي مدة الفصل الدراسي الثاني بأكمله،وذلك لأننا نسكن في التجمع الخامس،مما جعل الذهاب للجامعة كل يوم عبئاً ثقيلا،ً بالإضافة لفراس ..صغير جداً على الحضانات! أصبح لقبي في الكلية هو "ماما الكول" كنت في قمة إنطلاقي ،آخد فراس في العربة المتحركة و أذهب للنادي،أذهب للقراءة و معي فراس،كنت آخذه الي كل الأماكن و ما بيفرقش معايا..حتى الجامعة زارها فراس الصغيرعشان أصور ورق :).
أما بالنسبة للمذاكرة،فقد كنت أكره المذاكرة وحيدة بدون أصدقائي ،وفي نفس الوقت لا أستطيع تركه مع أمي كل هذه الساعات بسبب الرضاعة،فبدلاًَ من الذهاب و الإياب كل عدة ساعات لبيت أمي ،فضلت أن يكون معي،أضعه في "الكريكوت " الصغير على ترابيزة السفرة و أستذكر دروسي، كانت أجمل الأيام ..
أمي..امي..أمي..أصبحت أشعر بها دوماً،صرت مدينة لها بعمري،كلما فكرت أنها مرت بما أمر به الآن مع إبني لأجلي...ياااه كم تتعب الأم !!

الخميس، 21 أغسطس، 2008



رمل و زبد...متعة عقلية خالصة
إذا كنت تنوي أن تقرأ أعمال جبران فأنصحك بأن تبدأ بهذا الكتاب، فإنه من أيسر وأجمل كتبه،ترجمه للعربية الدكتور ثروت عكاشة ترجمة سلسة بلا تعقيد ولا تصنع. الكتاب عبارة عن أقوال مختارة لجبران دونتها صديقته "باربرا يونج" على قصاصات من الورق ثم جمعتها له في كتاب واحد.
عن دار الشروق ، 2008
سعر الكتاب : 10 جنيهات
--------------------------------------
مقطتفات من الكتاب:

أنتَ حرٌّ طليقٌ تحتَ شمس النَّهار. وأنتَ حرٌّ طليقٌ تحتَ نجوم اللَّيل. وأنتَ حرٌّ طليقٌ إذ لا شمس ولا قمر ولا نجوم. لا بل أنتَ حرٌّ عندما تٌغمِض عينَيكَ عن كلِّ ما حولك. ولكنَّكَ عبدٌ لمَنْ تُحِبّ .. لأنَّك تحبُّه. وأنتَ عبدٌ لمَنْ يحِبُّك .. لأنَّه يحِبُّك
--------------------------
احتقرتُ نفسي سبعَ مرَّات:

الأولى، عندما رأيتُها تتظاهرُ الوضاعة وهي تنشدُ الرِّفعة.

والثانية ،عندما رأيتها تترنَّح متجاوزة العَرْجى.

والثالثة ،عندما خُيِّرتْ بين السَّهل والشَّاق ففضَّلت السَّهل.

والرابعة ،عندما اقترفَتْ ذنباً وراحتْ تبرِّره باقتراف الآخرين ذنوباً مماثلة.

والخامسة ،عندما عجِزَتْ عن فعل شيء لضعفها وعزَتْ صبرَها إلى القوَّة.

والسادسة، عندما احتقرتْ بشاعة وجهٍ تبيَّن أنه أحدُ أقنعة نفسي.

والسابعة ،عندما غنَّتْ مديحاً واعتبرتْ غناءَها فضيلة.
------------------------

كنَّا، بني البشر، مخلوقاتٍ هائمةً تُنْشِدُ ذاتَها الضَّالَّةَ في الأحراج، قبل أنْ تمنحَنا البحارُ والرِّيحُ كلماتِها بألفِ ألفِ سنة. كيف إذن نستطيع أنْ نعبِّرَ عن غابر الأيام بأصواتٍ متواضعةٍ تعلَّمْناها ما سوى في الأمس القريب؟!.
-----------------------
جبران في ويكي بيديا.
لقراءة جزء كبيرمن الكتاب ،
إضغط هنا

ملحوظة:النصوص اللي هنا مش من ترجمة الدكتور ثروت عكاشة، ترجمته أسهل بكتير من دي !

الأربعاء، 20 أغسطس، 2008



أغار عليك

من فاتنة لعوب ،تضعف أمام ثوبها المكشوف، و رائحة عطرها النفاذة ،فلا تستطيع أن تمنع نفسك عنها..

من صديقة مخلصة، تمزح معها ،وتضحك من قلبك،وتحكي لها عني..

من زميلة لك ،تضطر أن توصلها بسيارتك،فتجلس على كرسيً،و وتحرك ظهره على حسب مزاجها، و تطلب منك أن تخفض صوت جهاز التسجيل لأنها متعبة..

من أختك الصغيرة ،تحتضنها ،وتحضر لها الحلوى ،وتخاف عليها من نظرات الرجال..

من سيجارة ، تضعها بين شفتيك و تعطيها أنفاسك..

من فنجان شيكولاتة ساخنة يدفئك -بدلاً مني- و يذوب في دمائك..

من وسادة ناعمة تضع عليها رأسك و تحتضنها في المساء..

من مطربتك المفضلة،تستمع اليها و حيداً ، فتثير شجونك..

من فراش يحتوي جسدك باكمله..

من نفسك، التي تفضل الإختلاء بها كثيراً..

إهداء لك أنت وحدك

و ياما في الجراب يا حاوي !

رجل مشهور،تراه كل ساعة،أو كل يوم، أوكل إسبوع ..حسب ظروفك.تمقته،وتتشائم منه،بالرغم من أنك لا تعرفه شخصياً و لم تقابله في حياتك!! إنه " حمدي أحمد بيومي "الشهير ب "حمدي بلالى" ذلك الرجل الذي شُرفنا بوضع صورته على علب السجائر و هم نائم على فراش الموت و "بيطلع في الروح"مرتدياً ماسك أكسوجين و لصقات جهاز القلب.حمدي مساعد مدير انتاج بأحد شركات الأعلان،طلب منه مديره في يوم ما أن يذهب لوزارة الصحة و معه بعض" الكومبرسات " إلى وزارة الصحة لتلبية "أوردر" تصوير،وعندما ذهب حمدي مع الرجال الي الوزارة و عرضهم على المصور، قال له المصورأن إختياره للكومبرسات جاء غير موفق ،فكلهم يتمتعون ببشرة وردية دليل الصحة، وقال له أنه يريد شخصاً نحيفاً يبدو عليه المرض ! ثم ما لبث المصور أن إقترح على" بلالى" أن يسمح له بإلتقاط صورته هو فهو نحيف الوزن و شكله "عيان"! إستطاع المصور أن يقنع صاحبنا أن يتم تصويره لوضع صورته على علب السجائر كنوع من أنواع التوعيه و قال له- طبعاً -أن هذا عملاً إنسانياً سيشكره عليه كل المصريون، فوافق حمدي على الفور و كانت النتيجة الصورة "إياها" التي نراها على علب السجائر.

الكوميدي في الامر أن حمدي مدخن،وهو غير مقتنع على الإطلاق بأن يقلع عن التدخين، حتى بعد الوضع المخيف الذي كان عليه وقت التصوير ! يقول حمدي في مقابلة مع المذيع تامر أمين في برنامج البت بيتك : "أنا بدخن، وبشتري علبة السجاير اللي عليها صورتي ، وبقعد أشرب السجاير وأنا بتفرج على الصورة" ! ..أرى كماً غير عادي من التناقض هنا،فكيف يتم تصوير شخصاً كهذا ليقنع الناس بالإقلاع عن التدخين؟ أين المصداقية؟ كان من المفروض أن يكون راعي هذه الحملة رجلاً كان مدخناً بالفعل و أقلع تماماً عن التدخين حتى يكون قدوة صالحة، أو على الأقل شخص على فراش الموت بالفعل ، لا أن يقوم الشخص الموضوع صورته على العلب بالإفصاح عن استمرار تدخينه في برنامج مثل البيت بيتك يذاع على القنوات الأرضية و يحظى بأعلى نسب مشاهدة!

الصورة لم تعجب الناس و أصبحت فألاً سيئاً يتشائم منه كل من يراه، في يوم ذهبت لشراء بعض الأغراض من "السوبر ماركت "حينما سمعت رجلاً يطلب من البائع علبة سجائر " بس و النبي بلاش اللي عليها الصورة دي ، بتشائم منها أوي " و عندما أجابه البائع بأن كل العلب الموجودة عليها الصورة، رفض الرجل أن يشتريها.و لكن هل إستمر الحال هكذا؟ بالطبع لا ، فالشعب المصري يؤمن بمقولة " الشيء لزوم الشيء"، إنتعشت تجارة علب السجائر المعدنية "الكارتيلات" بكل الأسعار و الأشكال و أصبحت هدية "السيزون" علبة سجائر معدنية أنيقة ..مصائب قوم عند قوم فوائد.

الثلاثاء، 19 أغسطس، 2008



"فراس و أنا " الحلقة الثانية :
كنا في الحلقة الماضية قد توقفنا عند حقن "الفولتارين" ..هل تذكرون ؟سأحدثكم اليوم عن الإمتحان و ما بعد ذلك..

باقي على الإمتحان يومين و قد استعددت جيداّ فأنا أعلم أنها المادة الأولى بعد الولادة لذا فقد أوليتها اهتماماً خاصاً منذ بداية السنة. اليوم يوم الأمتحان،أشعر بأنني لن أستطيع الجلوس فوق ال"بنش"الصلب،احضر معي وسادة صغيرة..نعم لا تتعجبوا ، لم يكن هناك حل آخر ،أدخل القاعة،مرتبكة، خائفة،لا يريد أن يراني أحد بذلك الثوب الفضفاض المضحك و هذا الوجه الأصفر كحبة الليمون،أهرب من العيون و الإبتسامات ذات المغزى وأجلس،أكتب ..اكتب ..أنظرللورقة،أشعر أني تعبت و اكتفيت،ورغم عدم انتهاء الوقت، و رغم عدم نفاذي من إجابة الأسئلة،أسلم الورقة و أهرب....


أعود لغرفتي،أقف أمام المرآة عارية،أتأمل جسدي..أشعر أنني امرأة أخرى،امرأة غير شيماء..هل هذه أنا ؟!!هل هذه شيماء الفتاة الرشيقة ،الجميلة ،التى كان الجميع يحسدونها على جسدها الرياضي؟هل هذه شيماء التي كانت في الشهر السابع تذهب للسباحة فيتعجب الجميع "ايه ده هي حامل؟ طب ازاي بتعوم كده؟و ازاي بتجري كده؟" ما هذا الجسم البدين المترهل .في الشهر السابع هددني الطبيب بأنني اذا لم أتوقف عن هذا المجهود البدني فسوف الد مبكراً جداً عن الموعد المحدد، كنت أذاكر للجامعة، و أذاكر للجامعة الأمريكية و أخشى الولادة جداً..أصبت بإكتئاب و توقفت عن الرياضة و صرت آكل كالخنزير البري ..فإزداد وزني 20 كيلوجرام !!

أصبحت أكره شكلي في المرآه ،والعن ساعة الخروج من المنزل التي أفكر بها ماذا سأرتدي،شعور غير عادي بالنقص..شعرت لوهلة انني "خلاص راحت عليا ".بعد فترة ما لبثت طبيعتي المتفائلة أن تغلبت على ،فعدت أضحك من جديد و تقبلت فراس و بدأت الرياضة و تنظيم الوجبات.

----------------------------------------------------------

خارج النص: خسرت الآن العشرين كيلو الزائدة :) يا هوووو

الأحد، 17 أغسطس، 2008

ه
خارج هذا النص

و خارج كل النصوص

أكتب لك هذا الكلام

اشتقت اليك يا صديقي !

نعم..إشتقت لنظراتك المرحة

التي ليس فيها أي رغبة

إشتقت لكمة .."أحبك "

هكذا وبكل بساطة بدون أي أغراض

أفرح من أعماق قلبي عندما

أعلم أنك تحب روحي..و تعشق عقلي

أطير من السعادة

لاني أمتلك صديقاً مثلك!

خارج النص: حالة جميلة بحسها لما بلاقي حد بيحبني فعلاً زي أخته أو صديقته ..لما أحكيله كل حاجة من قلبي و أهزر معاه براحتي و أكون على طبيعتي تماما ً و أنا متأكدة أنه عمره ما هيفكر فيا غلط أو يترجم كلامي معاه على إني بحبه أو اني معنديش مبادئ..

السبت، 16 أغسطس، 2008

ربما اليوم هو اليوم الأول الذي سأحدثكم فيه عن علاقتي بإبني فراس بناءً على طلب أحد الاصدقاء ، قال لي أنه كمتابع للمدونة يريد أن يقرأ أكثر عن فراس و عن الأمومة المبكرة و رأيي فيها ..بصوا الموضوع طويييييل جداً صعب يخلص في بوست واحد عشان كده -للمهتمين-تابعوا بوستات" فراس و أنا " ..يعني تعالوا نعتبرها حلقات :)

"فراس و أنا " الحلقة الأولى :
أذكر جيداً يوم ولادتي 12-12-2006 ،كانت إمتحانات الكلية على وشك البدء ،باقي من الزمن 8 أيام، و كنت قد طلبت من دكتورة سحر أن تعجل بولادتي قليلاً حتى استطيع دخول الإمتحانات !! جربت كل شيء. مشي، أقراص،حقن،خروع، كل الطرق و الوسائل الممكنة و الحمد للة ذهبت للولادة مبكراً،15 يوم بدري عن الموعد العادي ..
أتذكر عندما إشتريت "شربة الخروع" نظرت لزجاجة الزيت بقرف شديد"يععع، أنا هشرب القرف ده ازاي بس".. ولكني تحملت ،و عصرت على نفسي ليمونة ، ورشفت الزجاجة كلها في رشفة واحدة و بعدها كوب ماء و ربنا ستر :)

المهم الساعة 12 ظهراً ظهر تأثير كل هذه الوسائل و العقاقير فأخذت الحقيبة و ارتديت ملابسي وانطلقت للمستشفى .ذهبت مع بابا و ماما و أخي و كان محمد في العمل ..لا أريد أن أطيل عليكم بتفاصيل الولادة..قامت الممرضات بكل الإجراءات حتى حضرت الطبيبة في الساعة الثامنة ، و دخلت غرفة الولادة، وتمت الولادة بسلام و جاء فراس للدنيا..لكن المشكلة انه بعد الولادة حدث نزيف رهييييب ..انفجرت الاوردة و الشرايين ،لست أدري كيف!..و استمر الأطباء أكثر من ساعة في محاولة دؤوبة لسد هذه الشرايين عن طريق لكم الرحم من الداخل !..و عندما أفقت من تأثيرالبنج شعرت أنه تم لكمي مئات البوكسات في بطني!!

و مر علي أسوأ أسبوع ألم رايته في حياتي كلها..بجد ربنا ما يوري حد..جسمي مفكك من الولادة ، بطني تؤلمني من الذي حدث،حساسية في كل جسمي من البنج و العقاقير،في يدي قطعة لحم طرية مش عارفة اعمل فيها أيه،لا أستطيع حمله ،لا اعرف كيف أطعمه،كنت أنظر له في يأس و أحتضن أمي و أنفجر في البكاء,أقول لها لا أريده،خذيه..شعور غريب كان يعترمني أكرهه و أشعر انه سبب كل عذابي و المي..وفوق كل هذا الإمتحان لم يبق عليه سوى أسبوع و أنا مصممة على النجاح..كنت أذاكر و الصبي على فخذي ومن شدة إعيائي ووهني أدوخ و يسقط رأسي فوق الكتاب، وأبكي مجدداً..لا منجي من الألم سوى حقنتين فولتارين ، وحقنة حديد "تراي بي" ، أتحملهم مضطرة لأني أعلم أنهما العلاج السريع..بعد النزيف أصبح هيموجلوبيني 9!! و لمعلوماتكم فالمفروض أن تكون نسبة الهيموجلوبين 12-13 على أقل تقدير ،وكان هذا يصيبني بالدوخة الشديدة و الإعياء.
كنت أحمد الله في سري بأني لست مدمنة ، فمن يراني و أنا أصرخ طلباً للحقن لا يتخيل ابداً أنني كذلك - "ماما..الحقنة و النبي ..بكاء ..بكاء..أبوس أيدك" -"يا بنتي لسة معادها مجاش منت لسة واخدة واحدة من ست ساعات بس "-"ماما مش قادرة أبوس أيدك" و أنحني بالفعل -رغم ألمي- لأقبل ايديها طمعاً في الخلاص !!

هنقف لحد كدة و نكمل بعدين :) باي

الجمعة، 15 أغسطس، 2008



كتب أعجبتني :
هذه سلسلة كاملة لكل محبي الغرائب و الخوارق وعلوم ما وراء الطبيعة ..تتكون السلسة من ست كتب وهم :أعجب البشر،أعجب الأماكن،أعجب قدرات العقل البشري،أعجب الظواهر الغامضة،أعجب العقائد الخاصة،أعجب الكائنات.
إسم السلسلة: سلسلة عجائب
إسم الكاتب:راجي عنايت
عن نهضة مصر للنشر و التوزيع
سعر الكتاب الواحد 7 جنيهات.

الاثنين، 11 أغسطس، 2008


مزيكا..وكريم..والسورية!!


زهقانة ..قرفانة جداً ..الساعة الآن 2 و ربع صباحاًَ ، أفتح التلفاز على قناة مزيكا فأشاهد التالي:

برنامج مسابقات و شاب "كول"يرتدي ملابس طبيب،و السؤال المعروض على الشاشة هو: "فصل بس مفيهوش تلامذة ..يبقى أيه؟" ،" ها ؟ ردوا يا شباب ..يبقى ايه؟ اتصلوا دلوقتي ،الجايزة جامدة جداً 25000 جنيه"!

تتصل فتاة من مصروتحدث المذيع باللهجة السورية و بالمناسبة المذيع إسمه كريم.

البنت-بمنتهى المياصة اللي على وجه الأرض-: كيمووو

كريم:قلبي ..ازيك؟

البنت: انت عارف أنا مين؟

كريم : وحد بس يتوه عنك ..عارفك طبعاً، أنتي فلانة..

البنت: تضحك ضحكة رقيعة..

كريم : ها ؟ عرفت إجابة السؤال؟

البنت: آه..تضحك..بس مش هقولك..تضحك

كريم : ليه بس؟ و حياتي قولي

البنت: ماشي يا كيمو..عشانك انت بس..تضحك

كريم: هه؟

البنت: فصل الشاحن..تضحك

كريم:ههههههه والله إجابة مقنعة..بس للأسف تخسري.

البنت بمياصة متناهية: لأ طبعاً مش هخسر ..طالما سمعت صوتك يبقى أكيد هكسب!!

كريم: هو انت سورية بجد ؟ ولا بتضحكي عليا؟

البنت تضحك ضحكة رقيعة جداً: ليه بس بتقول كدة؟ أنا سورية أباً عن جد.

كريم ضاحكاً: أوكى هنتكلم في الموضوع ده بعدين..

البنت:بااااي

كريم: باي يا قمر !!

و النبي أيه ده؟ بالله عليكم أيه ده؟ و بعدين هيكلمها بعدين إمتى ؟ هو ظبط خلاص و لا أيه ؟! هو الإسفاف وصل للدرجادي،إستهانة رهييبة بعقول الناس اللي بتتفرج،زي مانكون جهلة أو متخلفين،وبعدين هو كريم ده بيذيع برنامج و لا جي "يظبط" !!

السبت، 9 أغسطس، 2008

H دبور
إسكتشات هزلية تضحكك في بعض الأحيان !

أن يضيع شاب موهوب نتيجة "كروتة" مخرج و ضعف سيناريو فهذا ظلم كبير للممثل، فبالرغم من أن أحمد مكي كوميديان شاطر و ممثل جيد -وليس هذامجرد رأى شخصى- إلا أن المؤلف، و المخرج ،وكل فريق العمل اعتمدوا على أن شخصية دبور شخصيه نجحت بالفعل ، فلم يبذل أحد منهم ربع المجهود المتوقع فكانت النتيجة فيلماً سطحياً و تافهاً و" مش راكب على بعضه".
أول لقطة في الفيلم لأحمد مكي يظهر فيها وهو يجلس على طاولة في أحد البارات، يحتسي الخمر و يكسر الكأس بغضب -بدون أي سبب- ثم يبدأ في الرقص و تصفق له الفتيات!! اتش دبور شاب غني جدا، يمتلك والده-حسن حسني- مصنع شامبو مشهور،هالة فاخر- منافسة والده التي كانت تحبه في الماضي- تغار من نجاحه فتسلط من يضيف تركيبة ضارة تسبب سقوط الشعر في تركيبة شامبوهات حسن حسني!! فيدخل حسني السجن و يخسر كل أمواله و يتم الحجر على قصره،عندها لا يجد أحمد مكي مكاناً آخر يبيت فيه فيذهب للإقامة في الحارة في منزل سائق حسن حسني-لطفي لبيب- ويقع في حب ابنته -انجي وجدان- و و بمساعدة أهل الحارة يستطيع دبور في النهاية أن ينقذ والده من السجن بحيلة ساذجة تذكرنا بأفلام "مستر إكس"، وفي آخر مشاهد الفيلم يصرح أحمد مكي بحبه لأبنة السائق ويقول لها جملة مؤثرة جداً تلخص رسالة الفيلم : "أنا كان نفسي زمان أتجوز واحدة ستايل و سيكسي و عندها تاتو في بعض المناطق..بس دلوقتي عايز أتجوز واحدة جدعة بجد"!!

هيثم مكي : لا نستطيع أن نصدر عليه حكماً نهايئاً من أول فيلم ، لديه مقومات النجاح و يستطيع ببراعة تأدية المشاهد الكوميدية الغربية،أعتقد أنه سيدخل نوع جديد من الكوميديا الى الأفلام المصرية.
حسن حسني: كان دوره مقحما على الاحداث ..لم يضف أي شيء و لم يستطع أن "يشيل الفيلم " كعادته.
هالة فاخر: كانت سبباً رئيسياً من أسباب فشل الفيلم فنياً فقد حاولت أن تتصنع الكوميديا و لكنها للأسف لم تستطع tفجاءت مشاهدها إستفزازية جداً.
إنجي وجدان:أداء جيد بالنسبة لأول مرة في السينما .
لطفي لبيب: هذه المرة هو اللي" شال" الفيلم بدلاً من حسن حسني.
سامح حسين: كان يشكل ثنائياً جميلاً مع مكي ..أعتقد أن نجمه سيلمع قريباً.

يعتمد الفيلم في المقام الأول على كوميديا الأفيه و طبعاً يستخدم مكي كل إفيهات تامر و شوقية مثل "سلطاته و بابا غنوجه " و "بيوتيفول" و "كبر الجي و نروق الدي" وكل حركاته المعهودة ،و كذلك سامح حسين فإنه يؤدي دوره بنفس شخصيته في مسلسل "راجل و ست ستات "، شخصية الغبي ، و مع ذلك كان أداؤه مقبولاً جداً. و هذا لا يمنع أن الفيلم لم يعتمد على الإفيه فقط بل كان به أيضاً العديد من المواقف الكوميدية .

أما عن الموسيقى التصويرية فكانت موفقة جداً في هذا الفيلم، و كان لها دوراً واضحا في إظهار كوميديا المواقف فنجد مثلاً موسيقى زورو أحياناً ،و مشهد آخر لمكي و حسين يشربان الجوزة و أكثر ما يضحكك في المشهد هوالقطع الموسيقية المختارة و منها " حبيتك بالصيف لفيروز"!


الجمعة، 8 أغسطس، 2008

فيلم أحمد حلمي..من ساعة ما شوفته و أنا في حالة حزن عميقة ..مش عارفة أنام !!
مشهد أحمد حلمي و هو قاعد مع منة شلبي ع البحر و بيقولها "أنا نفسي أبقى زيك ، نفسي أضحك،نفسي أعيط"
مشهد أحمد حلمي لما جاله الدكتور النفسي في البيت و قعد يترعش و يزعق"
مشهد دلال عبد العزيز وهي بتقول لأحمد حلمي "أبوك مات ..مات..مات"
مشهد أحمد حلمي بعد لما ضرب البنت بالقلم و قعد ع الأرض يعيط.
مشهد أحمد حلمي و هو بيفتح الكاميرا و مش لاقي صور خالص لحبيبته"
مشهد حلمي و هو بيشرب سيجارة في الحمام و فاتح عنيه تحت المية.
مشهد حلمي و هو داخل المستشفى.
مشهد حلمي و هو بيكلم بباه في المستشفى.
أغنية شيرين ...أحلى إحساس في الدنيا
"مشهد حلمي لما رجع البيت و دخل مكتب بباه"

في المراية
هتعمل ايه لو نمت يوم وصحيت
بصيت وشوفت نفسك في المراية بكيت
جواك سؤال تصرخ تقول انا مين
انا زي ما انا ولا اتقسمت انتنين
وبعدين ..
قول يلي في المراية فهمنى ايه الحكاية
فرحان تعبان مرتاح ندمان؟
حاجات كتير في حياتنا
اتسببت في حيرتنا وادينا عايشيين
راضيين جايين ورايحيين
هتعمل ايه لو نمت يوم وصحيت
ولقيت اقرب ما ليك في الدنيا مش حواليك
هو انت مين اللي عمل كده فيك
مش انت ولا في حد غمى عنيك
وبعدين ..
قول يلي في المراية فهمنى ايه الحكاية
فرحان زعلان مرتاح ندمان
---------------------------------------------------
أغنية فيلم أحمد حلمي الجديد ، أول ما شفتها في الفيلم مبطلتش عياط !!!
كلمات:أيمن بهجت قمر
الحان:محمد يحيى
ما تيجي نسمع سوا الغنوة دي من الفيلم؟!

الأربعاء، 6 أغسطس، 2008


حد فيكم شاف الصورة دي قبل كدة ؟!

الصورة دي بحبها أوي ،شفتها وأنا عندي 16 سنة مثلاً و عجبتني ،ولما شفتها النهاردة حبيت أقرأ عنها أكتر ،وده اللي عرفته عنها: دي صور تماثيل إسمها الموي Moai ، موجودة في جزيرة إسمها جزيرة الفصح Easter Islandفي المحيط الهادي. ..تمام كدة ؟
في عام 1722 كانت هذه الجزيرة غير مكتشفة بعد،وفي أحد أيام الآحاد عثر أسطول هولندي على هذه الجزيرة ،وقد كان هذا في وقت الفجر و عندما استيقظوا في الصباح وجدوا مجموعة من البشر-الرابانوي Rapa nui- يمارسون طقوساً دينية أمام هذه التماثيل.وقد دقق ربان السفينة في هذه التماثيل فوجدها مستطيلة الشكل ، متشابهة ، طولها يتراوح من مترين ونصف الى عشرة أمتار .أطلق الربان على الجزيرة اسم "جزيرة الفصح" و هذا هو الإسم الذي تعرف به حتى الآن وذلك لأنت يوم رؤية التماثيل كان يوافق يوم عيد الفصح.
المهم..الى الآن تعتبر هذه التماثيل الآثار الغامضة الي أرهقت العلماء، فلم يكتشف أحد كيف شيدت ، وما هي العقيدة التي كان يعتنقها أهل الجزيرة..لا يوجد دلائل واضحة ..مجرد إجتهادات..

صورة لقبائل الرابانوي يؤدون طقوسهم أمام التماثيل
------------------------------------------------

المصادر: أعجب الأماكن،راجي عنايت،نهضة مصر،صفحة33\موسوعة ويكيبيديا.

الثلاثاء، 5 أغسطس، 2008

سعيدة إني عرفتكم!


من كتر قعادي ع النت الأيام دي اتعرفت على شوية ناس كده مكنتش أعرفهم كويس .و بجد لما سمعتهم أكتر فرحت أوي ، مش دايماً بلاقي مزيكا حلوة اسمعها:)
كاميليا جبران: مغنية وملحنة مختصه في الموسيقى العربية الكلاسيكية. ولدت في عكا لوالدين فلسطينيين.بدأت كاميليا في تعلم العزف على العود و القانون في الرابعة من عمرها على يد أبيها إلياس جبران مدرس الموسيقى وصانع الآلات الأصيلة. انتقلت إلى القدس في 1981وانضمت إلى الفرقة الموسيقية الفلسطينية صابرين في سنة 1982. تمثل الفترة التي عاشتها فرقة صابرين مرحلة عميقة وحيوية ساهمت في خلق أسلوب جديد لها.في نهايةالتسعينات ، دخلت في عمل مواز موسع في فرنسا واتجهت في العام 2002إلى أساليب موسيقية مختلفة. تجسد ذلك بشكل أساسي في مدينة بيرن عندما أنتجت 'محطات'. عام 2004 قامت بالمشاركة مع فيرنر هيسلر المختص السويسري في الموسيقى الإلكترونية بعمل ألبوم حمل اسم "وميض".لسماع و تحميل أغانيها ..إضغط هنا.


لينا شماميان: بدأت لينا شماميان،سورية من أصل أرمني، الغناء في سن مبكر وقامت بأول حفلة لها في سن الخامسة، وازداد شغفها بالغناء مع الزمن حتى قررت الانتساب للمعهد العالي للموسيقا، وذلك بعد تخرجها من كلية الاقتصاد عام 2002 وحصولها على الجائزة الثانية في مهرجان الدول الفرانكفونية.و حصلت على منحة المورد الثقافي في مصر لانتاج البومها الاول هالأسمر اللون عام 2005، وعلى جائزة الشرق الاوسط من اذاعة مونت كارلو عام 2006.
وبالاضافة لدراستها الغناء الكلاسيكي اهتمت أيضاً بألوان موسيقية مختلفة مثلا الجاز، الموسيقا الأرمنية ، والموسقى الشرقيه، فانعكس هذا المزيج على اسلوبها في الغناء.
هنا ممكن تسمعوها: أحلى حاجة ليها عجبتني بالي معاك.



أميمة الخليل: أميمة الخليل فنانة لبنانية ملتزمة بقضايا الانسانية رافقت الفنان مارسيل خليفة في رحلته الفنية غنت معه و غنت منفردة من الحانه من أهم اعمالها عصفور طل من الشباك و من أهم اعمالها مع مارسيل خليفة بوليس الاشارة, الخضرجي ، تملك أميمة الخليل صوت نادر أدت بعض الاغاني بدون موسيقى و كان لها وقع رائع على الاذن .اسمع لها :ليه ، يا حبيبي ، مزاج ، طفل ، زوروني.


ربى صقر:مطربة و كاتبة أردنية، أشتهرت بغناء الأغاني الصوفية.بس للأسف مش لاقية أغاني كتير ليها ،لوحد فيكم لقى ابقوا قولولي :) .ودي الصفحة بتاعتها في My space، و أغنية حلوة إسمها في الظلام.



مارسيل خليفة:مؤلف موسقيي ومغني وعازف عود لبناني . يعتبر مارسيل أحد أهم الفنانين العرب الملتزمين بقضية فلسطين ،عرف مارسيل دوما بأغانيه التي تأخذ الطابع الوطني، وبأسلوب دمجه بين الموسيقى العربية والآلات الغربية كالبيانو. اعتقل على يد الاحتلال و تعرض للتعذيب .ممكن تسمعه هنا.


ملحوظة: بيانات الفنانين كلها من موقع ويكي بيديا..عشان الأمانة العلمية بس :)
_______________________________

خبر بمليون جنيه..مسلسل نور هيتعرض عالتلفزيزن الأرضي عالقناة التانية !! و شكلها كدة في رمضان .بجد دي مؤامرة ،هو الشعب ناقص تناحة! اذا كان مسلسل "أوشين" لما إتعرض كان عامل للناس هبل ،أمال نور و مهند هيعملوا أيه في الناس ؟! و يا ترى رمضان هيبقى عامل ازاي مع مهند ;) ؟ قولولي يا بنات ..هه؟



الأحد، 3 أغسطس، 2008


أنا النهاردة مبسوطة جداً اني كسبت صديقة جديدة من عالم المدونات...امبارح و أنا بشوف تعليقاتي ،لقيت إن كاريمان زمزم صاحبة مدونة قطرات من شواطىء الحياة بتمررلي تاج "كراسة الواجب" ...الصراحة جه ف وقته أنا أصلاً زهقاانة جداً و عايزة أفضفض شوية.شكراً أوي يا كوكي إنك إفتكرتيني :)

شروط "كراسة الواجب":
1-امرره لسته من المدونين مع ذكر اسمائهم.

2-اعلمهم بموضوع الواجب.
3-والواجب انى اذكر ست اشياء عن نفسى لا يكتشفها فى من يرانى لاول مرة.

أول حاجة: دايماً اللي بيشوفني أول مرة مش بيعرف اني رومانسية وحالمة ، أنا علطول بهرج و بهزر و شعنونة و صوتي عالي و بشتم ..محدش يعرف حتة التأمل و الهدوء الشديد اللي بتجيني غير اللي يعرفني كويس.أحلى الليالي هي ليالي الشتا اللي بسمع فيها فيروز وأنا مولعة الدفاية و بشرب فنجان شيكولاتة بيضاء و بقرأ جبران أو نزار.
تاني حاجة:اللي يشوفني أول مرة و هو ما يعرفش ظروفي يقول عليا مدلعة و مرفهة جداً، لكن اللي بيتكلم معايا فترة بيعرف ظروفي أكتر بيعرف إني شلت مسئولية بيت كامل وأنا عندي 19 سنة و كنت حامل و لسة ف كلية.
ثالث حاجة:إني بكره السياسة و بكره أتابع الأخبار و النشرات و مش بشغل بالي خااااالص بيها، ولا حتى سياسة مصر.
رابع حاجة:إني عشت 15 سنة في السعودية و لما جيت مصر إشتغلت مع الأجانب علطوول وده عمل تناقض غريب جداً في شخصيتي ..ف حجات تحس إني متدينة جداً و ف حجات تانية تحس إني متحررة جداً.
خامس حاجة:إني مش بحب الشاي ، ولا القهوة تماماً، ولا البيبسي و بكره التدخين..مع إني بمووت ف ريحة الشيشة تفاح !
سادس حاجة:اني مش مهرجلة خالص خالص...كل حاجة بنظام ، وكمان سلوكياتي متحضرة جداً ..مثلاً مش باكل دهون ،عمري ما بركب العربية من غير حزام، عمري ما أمشي عكسي،عمري ما اتكلم في التلفون و أنا سايقة،بقول للفراشين والكناسين" حضرتك" لدرجة انهم أحياناً بيفتكروني بتريق عليهم، مش بعرف أنافق خالص...والله مش بمدح في نفسي بس في ناس كتير لما بيقابلوني كذا مرة و نخرج سوا بيقولولي انتي مثاليتك دي زيادة في المجتمع بتاعنا و ان عمري ما هاخد حقي و انا بالأدب ده.
أما عن اللي همررلهم التاج فهم:
عمرو النحراوي ، صاحب مدونة Aftermath
أميرة حسن صاحبة مدونة "أنا اللي بالأمر المحال إغتوى".
و بصراحة كل اصحابي دلوقتي إتمرر لهم التاج بالفعل فهستنى شوية وأفكر و أبقى أضيف ناس تانيين للقائمة.
Related Posts Plugin for WordPress, Blogger...

زوار المدونة