الخميس، 30 أكتوبر، 2008

مع نفسي في المساء

مه لازم أكتب ، لو مكتبتش النحس ده مش هيتفك ! بقالي 3 أسابيع مش عارفة أكتب أي حاجة بالعربي خالص ،كتبت شوية كدة بالإنجليزي لكن العربي مش جاي و الموضوع ده عاملي إكتئاب ،مش عارفة مالي اصلاً .أدخل ع البلوج عشان أكتب أروح كاتبة 5 سطور و طالعة و مكملهمش ، مش قادرة أعلق عند حد ! بدخل أقرا المواضيع ومش بعرف أكتب تعليقات ! و في مدونات كمان تايهة مني ..

قررت أكتب شوية النهاردة يمكن التواصل يرجع المية لمجاريها ، أنا مضغوطة جداً و الكتابة دي عايزة مزاج عالي و روقان ،أنا في أوقات ببقى قاعدة جمب الكمبيوتر بقول اللي عايزة أكتبه بصوت عالي و مش قادرة أدوس على الكي بورد من كتر التعب ! وصلت للمرحلة دي تخيلوا !

في حاجة غريبة كمان ، بقالي شهر و نص مش حاطة غير شريط واحد ف العربية ،عمرو مصطفى الجديد ، الشريط عاجبني جداً و الواد ده أصلاً احساسه عالي و بحبه من زمان ، من زمان قوي ،من قبل ما يبغني أصلاً.ده في العربية ، انما ف البيت فالملكة هي فيروز التي أشعر بنفسي فيها ،أغمض عيني في المساء و أغني "أنا لحبيبي و حبيبي الي " ،هو صحيح أنا لحبيبي و حبيبي الي ؟ مش عارفة ..نوع من التوهان الجواني على رأي الأخ سعودي !

أشرف توفيق :قريت حوارك ف وشوشة جميل أوي ،تهامي : كنت منور صباحك سكر زيادة ، حمدي:قريت موضوع المنقبات و المترو ..تحفة ، حسام : أنت ديماً مدونتك على بالي ، كاريمان :بحبك جداً ، لولا: أنا لسة بدخل عندك،عمرو فاروق : أنا جزمة بقالي كتير ما دخلتش عندك و لا عند أشرف توفيق ولا عند أحمد حشمت.كل الناس اللي بتدخل هنا ..وحشني كلكم أوي أوي :)

أنت أيها المميز ، يامن تعرف أنك أنت المميز،يامن لاتدخل الي هنا أبداً ..رغم كل شئ في الدنيا ..سيظل مكانك في قلبي دوماً كما هو ..أتذكرك و أقابلك في كل أغنية لفيروز ..

عارفين أنا نفسي ف أيه دلوقتي ؟ نفسي أروح السينما ،فيلم زي النهاردة و فيلم تاني أجنبي بتاع بريس بروسنان مش فاكرة إسمه.و آكل ساندوتش تشيكن فيليه من هارديز ، بس يكون عليه جبة زيادة و ماشروم صوص ! و عايزة كمان واحدة كوكيز و سينامون رول ..
عايزة آخد العربية و أطلع ع الساحل لوحدي،عمري ما عملتها قبل كده ، بس حاسة اني وصلت لدرجة من الجرأه ان أعمل كده..الله ع الساحل ف الشتا وهو فاضي ، بنطلون واسع مزركش فضفاض و عليه بلوزة واسعة جداً و شبشب بصباع مريح و طاقية خوص عليها زهور ..عايزة أحط ياسمينة ف بقي و أمص الرحيق اللي فيها ببقي ، دايماً بعمل كده ، طعمه بيبقى حلو مش كدة ؟ ياااااااااااااااه ، هو ده يا ريت بقى لو فيه أصداف و صخور شكلها حلو أقعد أتفرج عليهم و المهم ف جردل بلاستيك ..ونجمة بحر كمان ، نفسي أوي أشوف نجمة بحر و أصورها جمب آثار الأقدام ...
الساعة واحدة وربع و غالباً بكرة هقوم مخضوضة على صوت المنبه الساعة ستة بيصحيني من عز النوم ..سلام ، أنا قايمة أغسل سناني و أنام ، خلي نجمة البحر دي ف الخيال و بس ..مش وقتها .
باي

السبت، 25 أكتوبر، 2008

الفصام اللي على أصله

أعيش الآن بشخصيتين مختلفتين تماماً ، الشخصية الأولى الست الهاي كلاس اللي بتشتغل مع أجانب و مع جامعات أمريكية و بتفطر بان كيك و كوكيز و بتقرا كل حاجة بالإنجليزي. الشخصية التانية بقى ،شيماء اللي بتروح شبرا و تشرب سوبيا في الكيس و تقرا عين ووشوشة و تجيب للواد فانلات من عند بيدق بتاع روض الفرج .

الشخصية التانية بتموت في أغنية جوجوجو و بتحب عماد بعرور.الشخصية الأولى بتركن العربية أدام أون ذا رن و تجيب شبسي برنجلز و سينامون رولز ،أما بقى شيماء التانية بتركن أدام عبده تلوث و تضرب واحد كبده ،بذمتكم فيه كده !! الموضوع ده بيلخبطني أوي هههههههه .أحياناً و انا بكلم مديرتي البريطانية بقلها نعم يا ختي.

مرة بقى خبطت فراجل و أنا ماشية ف شبرا أعد ت أشتمه بالإنجليزي قاللي نعم يا روح أمك ! أصلى كنت لابسة شال تيتة العتيق و شبشب زنوبة ! كان شكلي الست أم فراس مش اللي بتتكلم إنجليزي خالص

الأربعاء، 15 أكتوبر، 2008



عن "ستارة " و الفحت ...و أشياء أخرى

بجد والله مش عارفة أعتذرلكم ازاي، عارفة اني مقصّرة مع الكل ، لا بكتب بوستات جديدة ، ولا بقرأ بقالي كتير و حتى لما بقرأ مش بعلّق على كله و دي - والله- ما عادتي. السر يا أصحابي في تسلمي لوظيفتي الجديدة .كنت بشتغل في مدرسة دولية اسمها CESسبتها و اشتغلت في مركز اسمه "ستارة" وهو مركز متخصص في المسرح و الدراما للأطفال بس باللغة الإنجليزية. احنا بنقرا أصول القصص يعني المصادر الأصلية و بنكتبها بطريقتنا بطرية تربوية و مناسبة للثقافة بتاعتنا ، و بعد كده بنبعت نصمم الأقنعة و الدمى و المسرح في بريطانيا و نبتدي نعمل المسرحيات و الورش مع الأطفال..تمام كدة ؟ أنا دوري يكمن في إدارة هذا المكتب و الدعاية له و تصميم بعض البرامج .

نضيف على كده موضوع الكتابة ، أنا بجهز نفسي دلوقتي عشان أكتب باللغة الإنجليزية بجانب اللغة العربية و طبعاً اختكم لسة على قدها ، المقال بياخد مني مش أقل من 3 ساعات و ان شاء الله هيبقى عندي خبر كويس كمان شهرين كده.مش عايزاكو تزعلوا ، المركز و الكتابة و البيت و جوزي و ابني !! خلاص برج من نافوخي هيطييير..

الصور دي صورمن "ستارة" ، أيه رأيكم فيها ؟
الموقع :www.sitarakids.com

عن حفل توقيع كتاب مصطفى فتحي في "البلد"

يوم الجمعة اللي فاتت رحت حفل توقيع كتاب "ما تيجي ننجح" ل مصطفى فتحي. اليوم كان جميل و حفل التوقيع كام منظم جداً بالرغم من اني حضرت هناك كذا حفلة توقيع مكنتش منظمة خالص.
مين جه الحفلة ؟
طبعاً في ناس كتير معرفهمش ، بس اللي أعرف أقولهم دلوقتي: المتواضع و المحترم جداًكريم الشاذلي صاحب دار أجيال، أحمد الصباغ و اللي بجد مبسوطة أوي اني اتعرفت عليه، صبري سراج المتميز، الشاعر باسم حمودة، المدون غزالي ،حنان عادل الصحفية ، محمود أمين سعودي ، اسلام زيزا أحلي واحد بيرسم على التيشرتات ،سعيد محمود كلماوي أصيل و أحمد صلاح صاحب حملة احترم نفسك.

في حفل التوقيع وضع مصطفى فكرة كتابه و انه مش كتاب زي باقي كتب التنمية البشرية اللي بتقلك لازم تعمل ولازم تسوي.الكتاب ببساطة بيتكلم عن النجاح بمنظور بسيط يمَكن أي شاب عادي من انه يفهمه.فكرة مصطفى الجاية هي كتاب شبابي في التنمية البشرية يؤلفه 10 شباب في نفس الوقت..أعتقد أن هذه الفكرة جديدة تماماً.دائماً ما يأتي مصطفى بالأفكار المتميزة.

السبت، 11 أكتوبر، 2008


حصل الروائي الفرنسي جان ماري جوستاف لو كليزيو على جائزة نوبل للآداب للعام الحالي.و قد أشادت الاكاديمية الملكية السويدية للعلوم - مانحة الجائزة- بالكاتب و أسلوبه ووصفته ب "كاتب الإنطلاقات الجديدة ،و المغامرة الشعرية و النشوة الحسية و العمق الإنساني" خصوصاً رواية "الصحراء" التي صدرت عام 1980 و التي سبق للروائي الحصول على جائزة عنها وهي جائزة الأكاديمية الفرنسية.
و قد عبر الكاتب عن سعادته الشديدة بهذه الجائزة و اكد عزمه على حضور حفل توزيع الجوائز في ستوكهولم في ديسمبر المقبل.يذكر أن هذه المرة الأولى التي يحصل فيها أديب فرنسي على جائزة نوبل منذ عام 1985 و التي تقدر بعشرة ملايين كرون سويدي أي ما يعادل مليون دولار تقريباً.


الجمعة، 10 أكتوبر، 2008

معرض
يقام بوم السبت 11 أكتوبر في ساقية الصاوي معرض رسوم كاركاتورية بعنوان "عريس و عروسة" لفنانا الكاريكاتير مخلوف و مصطفى سالم. مخلوف هو أحد رسامي الكاريكاتير في جريدة الدستور بينما مصطفى سالم يرسم لروز اليوسف.

يناقش المعرض قضية الزواج و خصوصاَ قبل مرحلة الإنجاب مما يجعل اسم "عريس و عروسة" إسماً مثالياً للمعرض.يستمر المعرض لمدة اسبوع تقريباً.

الأربعاء، 8 أكتوبر، 2008


من فترة كدة كتبت مقال عن مسلسل نور ، لٌمت فيه روتانا على السي دي وقلت أيه لازمة السي دي ده !؟ ليه يعني نشتري سي دي ب 50 جنيه كله أغاني تركي مش فاهمين منها حاجة ..شفت السي دي في virginمن كام يوم و لقيته بعشرين جنيه ، و تقريباَ كان معايا قرشين محيرني فقلت أشتريه و خلاص أهه حاجة نسمعها ف العربية ..
المهم سمعت السيدي..السيدي تحفة ، حلو جداَ ،مفيهوش أغاني تركي ولا حاجة ،فيه 25 مقطوعة موسيقية جميلة جداَ أجملها:
left in the past
lost in your eyes
only in waters
light 2

المقطوعات اللي اخترتها دي ستيلها بوداباري شوية ..اللي بيحب بودا بار هتعجبه..يالله اسمعوا السي دي وقولولي رايكم فيه و في الحجات اللي اخترتها :)

الأحد، 5 أكتوبر، 2008


أجندة الشهر

1-10 الأربعاء
يا ترى النهاردة أول يوم العيد؟! أمسك نوتة التليفونات و عيد على كل قرايبك .

2-10 الخميس
فرقة عبد الحميد نويرة للموسيقى العربية ، دار الأوبرا ، مسرح الجمهورية ، 8-11 م .
-تاني يوم العيد ، جرب تدي عيدية لأطفال الاسرة!

3-10 الجمعة
-معرض رسومات أطفال "منة و حنين" ،قاعة الأرض ، ساقية الصاوي ، وحتى يوم 9.
-أوبريت الليلة الكبيرة ، عرائس،مسرح الجنينة،8 م

4-10 السبت
ما تجرب تشتري بورد board من المكتبة و تلزق عليها كل الحجات اللي عايز تعملها ، أيه رأيك تبتدي بالصفحة دي ؟!
5-10 الأحد
فرقة الموسيقى العربية للتراث، مسرح معهد الموسيقى العربية ، دار الأوبرا ، 8-11م.

6-10 الإثنين :
النهاردة أجازة رسمي ، هيص !

7-10 الثلاثاء
أغنيات مصرية معاصرة، فرقة بشاير ، الساقية ، 9 م .

8-10الأربعاء
- فلكلور شعبي ، دراويش القاهرة، الساقية ، 9 م .
- روك عربي ، فرقة كيان ، ساثقية الصاوي ، 8:30 مساء
.
9-10 الخميس
فكر في قضية شغلاك زي التعليم مثلاً و إنزل كلم ناس متعرفهاش و خد آرائهم و إبعتلنا.

10-10 الجمعة
Train candy and F.I حفلة روك في الساقية الساعة 8:30م. قاعة النهر
حفل توقيع كتاب "ما تيجي ننجح"، مكتبة البلد.

11-10 السبت
الساقية للعرايس ، عبد الحليم حافظ، 9 م
معرض رسم "عروسة و عريس" ، مخلوف و مصطفى سالم.

12-10 الأحد
لأول مرة ليلة كوميدية مع العرائس . ماري منيب –عادي خيري- ثلاثي أضواء المسرح الساقية ،9م.

13-10الإثنين
حفل بيانو عمر خيرت ، دار الأوبرا المصرية ، المسرح الكبير 8-11م.

14-10 الثلاثاء
فرقة مزمار بلدي،ساقية الصاوي ،النهر،8 :30 م .

15-10 الأربعاء
-خصص يوم كل إسبوع للمشي أو الجري ف شارع كله شجر!

16-10 الخميس
إعمل حاجة بايدك و بيعها و إتبرع بتمنها ( كروت ، أكل ، مشروبات، إكسسوارات،شموع).

17-10 الجمعة
Bad apple ، روك ، ساقية الصاوي ، الساعة 8:30
- موسيقى عربية من المشرق،مسرح الجنينة،8 م.

18-10السبت
فرقة أوتار ،موسيقى عربية، ساقية الصاوي ،قاعة الحكمة،8م.

19-10الأحد
كلثوميات،فرقة عبد الحليم نويرة للموسيقى العربية، 8-11م.

20-10 الإثنين
إرتجالات بيانو ، ساقية الصاوي ، 8:30 م .

21-10 الثلاثاء
فرقة حسان للتراث الشعبي،ساقية الصاوي ،قاعة النهر ،8م.

22-10الأربعاء
معرض طباعة على المنسوجات، مي السيد و عمر خالد ، قاعة الأرض ، الساقية، وحتى يوم 30.

23-10 الخميس
ريح في البيت النهاردة .

24-10الجمعة
يلا على حفلة وسط البلد ، ساقية الصاوي،النهر،8:30
حفل جاز مع الفنان يحيى خليل، المسرح الصغي،دار الأوبرا،8-11م.

25-10 السبت
حفل عمر خيرت،ساقية الصاوي، النهر،9 م. 45 أو 30 جنيه.

26-10 الأحد
إشتري قصرية زرع و إزرع نبتة ف بيتك .بنرشحلك ال"بوتس" مش بتحتاج ضوء كتير.

27-10 الإثنين
ما تجرب تربي حيوان صغير ..سمك أو عصافير مثلاً .

28-10 الثلاثاء
لم كل الكتب و الورق اللي مش محتاجهم و كلم جمعية "رسالة " الخيرية و هي تقولك تعمل أيه بعد كده
.
29-10 الأربعاء
كاريزما، إسكتشات ضاحكة ، ساقية الصاوي ، 9 م

30-10 الخميس
ليك في البانتومايم؟ ما تفوتش عرض الفنان أحمد نبيل في المسرح الصغير ،دار الاوبرا،8-11م.

31-10 الجمعة
الشهر ده كبيس قوي 31 يوم ، العدد الجديد عللى وشك الصدور ..جهز فلوسك !
- ريم بنا ، أغاني من فلسطين ، مسرح الجنينة ، 8م.
-----------------------------------------
نشرت بمجلة كلمتنا ، عدد أكتوبر

الجمعة، 3 أكتوبر، 2008


في أكتوبر عيد الفطر..وعيد الهالويين !

عيد الهالويين الأوروبي أصبح الآن على وشك الدخول في قائمة الأعياد المصرية ، فجميع المدارس الدولية و معظم مدارس اللغات تقيم له إحتفالاَ ويوماَ خاصاَ ، كما تمتلئ محلات لعب الأطفال الشهيرة بمختلف الألعاب و الأقنعة الخاصة بهذا العيد.

الهالويين أو "عيد جميع القديسين" هو يوم يُحتفل به في 31 من أكتوبر في كل عام . وفيه يرتدي الأطفال الملابس التنكرية و الاقنعة المرعبة و يطرقون الابواب طمعاً في الحلوى و يصيحون "خدعة أم معاملة؟ ?"trick or treat .و ترتبط بالهالويين أنشطة أخرى مثل حفر وجه "جاكو" على اليقطين -قرع العسل- و قراءة قصص الرعب و مشاهدة الأفلام المخيفة.

يرجع أصل هذا العيد إلى أيرلندا حيث نقله الايرلنديون إلى أمريكا الشمالية في القرن ال19 ثم انتقل لباقي الدول في أواخر القرن العشرين. وفي رواية أخرى يعود أصل هذا العيد لسوريا ، ابتكره الآراميون وسموه عيد "الحلافين" و معناها "الحلوين" و منه إشتقت كلمة "هالويين"Haloween .تحتفل دول كثيرة رسمياً بالهالويين نذكر منها :المملكة المتحدة،كندا،أيرلندا،بورتوريكو،اليابان ،نيوزلندا و جزء من أستراليا.

الخميس، 2 أكتوبر، 2008

العيد عند شوشي :

------------------------------

يعني محاولات خرقاء لتنظيف المنزل..

يعني لبس جديد و لعب للواد فرفور..

يعني كحك بملبن من اللي بحبه بتاع الشاعر أبو 25 جنيه و ما تسألوش ليه بجيب النوع الرخيص الردئ ده بس هو ده اللي بحبه!!

يعني عيدية من محمد و من بابا ..

يعني أي فيلم هابط و فكسان وخناقة مع محمد على النزول في العيد وسط الزحمة و الأرف..

يعني محاولة قوية جداَ لصلة الرحم

يعني رنجة أول يوم و بيتزا تاني يوم..

يعني ..كل سنة و أنتنوا طيبين و أحلى مدونين و قراء :)


تعريف متواضع بكتاب مصطفى فتحي في اليوم السابع :
-----------------------------------------------------
كتبت شيماء الجمال

صدر عن دار أجيال للنشر والتوزيع مؤخراً كتاب "ما تيجى ننجح.. حوارات شبابية عن النجاح والإيجابية" للصحفى الشاب مصطفى فتحى.
"الخيال ليس شيئاً غير ذى قيمة كما ينظر له البعض نظرة سطحية، بل هو القيمة كلها، وطريقك الحقيقى لتحقيق كل أحلامك وكل شىء عظيم كان خيالاً فى البداية، خيال سعى أصحابه لتحويله إلى حقيقة". هذه العبارة تعتبر من العبارات المفتاحية بالكتاب، فالنجاح من وجهة نظر الكتاب يأتى بإصرار صاحبه عليه وسعيه فى اتجاهه، والكتاب يزخر الذى بالعبارات الشبيهة.
ويعتبر هذا الكتاب الأول لمؤلفه، الذى ألهمه الوسط الشبابى الذى يعيش فيه واحتكاكه المباشر بنماذج وشرائح متعددة ومختلفة منه، أن يضعه ليكتب عن الشباب وللشباب، عن نجاحهم وإخفاقاتهم، وعن كيفية تحقيق هذا النجاح فى أصعب الظروف.
وأهم ما يميز هذا الكتاب عن غيره من كتب التنمية الذاتية، هو بعده عن الأسلوب العلمى المتكلف، والمصطلحات المتخصصة التى تستخدم بكثرة فى هذه الكتب، فالجزء الأول من الكتاب عبارة عن حوار بين الكاتب ومجموعة من الشباب اليائس المحبط، تمترج فيه الفصحى بالعامية السهلة التى شجعت الكثير من الشباب على قراءة الكتاب. أما الجزء الثانى فهو استعراض سريع لبعض قصص النجاح الشبابية التى شهدها الكاتب بحكم عمله.
Related Posts Plugin for WordPress, Blogger...

زوار المدونة