تأملات فيسبوكية

قبل ما تقعد تتريق على الناس وتشتمهم وتتفرغ للبحث عن فضايحهم عشان تاكل من وراها عيش.. فكر في نفسك.. عمرك ما كدبت؟ عمرك ما قلت كلام وغيرت رأيك؟ عمرك ما كنت مصدق حاجة واتضح لك بعد فترة طويلة إنها غلط؟ عمر ما كان عندك علاقة مش نضيفة في حياتك ؟
لو فكرت لحظة إن كل بلاويك وعيوبك هتتكشف أدام الناس أكيد هتفكر ألف مرة قبل ما تعمل النوع ده من الشغل .. على فكرة، لا اقصد أي شخص بعينه وانا بكتب الكلام ده.

تأملات

هو ليه الناس مش قادرين يفهموا إن إسرائيل حاجة وإن اليهود حاجة تانية .. إسرائيل دولة واليهودية ديانة .. برده عملين يشتموا في اليهود واليهودية!! يا جماعة اتعلموا تفصلوا أبوس ايديكم !! في يهود في كل دول العالم .. اليهودية ديانة سماوية زيها زي المسيحية وزي الإسلام .. يارب نفهم

أقسم بالله كل ما أتفرج على برنامج خواطر أو برنامج مذكرات سائح وأخرج بكل هذا الكم من المعلومات أقول الله يخرب بيت البرامج التافهة اللي مضيعين فيها فلوس البلد

أي حد عايز يعمل برنامج النهاردة يخترله حد يتريق عليه، ويجمع له كام تصريح من هنا على كام فيديو من هنا، على كام مانشيت من هنا ويدعم كلامه بأدلته القوية الجبارة ويقعد يعيش على أهلنا دور القديس اللي عمره ما غلط .. و يلا يا عم لم كله في المونتاج وكل عيش ..

تأملات

مشكلة الناس إنهم مش عايزين يفهموا إن كل واحد بيحب دينه ومؤمن بيه جداً وده شئ صحي ورائع .. لأنك ببساطة لو مكنتش بتحب الدين ده ومؤمن بيه ومستعد تدافع عنه لبكرة الصبح أمال بتعتنقه ليه! وده ينطبق على أي شئ تاني في الحياة .. جميل إنك تؤمن بدين وأشياء وأفكار في حياتك وتدافع عنها وتموت عشانها كمان .. لكن العبط إن ما تديش الفرصة لناس تانية يؤمنوا بدين غير دينك وأفكار غير أفكارك ويبقوا برضه بيدافعوا عنها ومستعدين يموتوا عشانها، ولازم تحترمهم لأنهم بيعملوا بالظبط اللي إنت بتعمله لكن بطريقتهم الخاصة.

مع- ضد

لكل الناس اللي مش فاهمين موقفي من السلفيين واللي بيدو معقد شوية أكتب الآن هذه السطور

أنا ضد السلفي اللي بيكفر الناس

وضد السلفي اللي فاكر نفسه وصي ع الناس

وضد السلفي اللي فاكر إن هو بس اللي بيمثل الإسلام

ضد السلفي اللي أسهل كلمة على لسانه ..حرام

ضد السلفي اللي فاكر إنه لما يجرح حد ويضايقه ويهينه يبقى هو كدة بينهي عن المنكر

ضد السلفي اللي مش مهندم في شكله

وركزا على كلمة ضد .. لأنها بتمثل موقفي.

كلمات زي كره وشتيمة وتريقة وسخرية مش موجودة في قاموسي لأنني ببساطة مش بكرة حد

على العكس بقى

أحب السلفي البشوش المبتسم اللي دمه خفيف

أحب السلفي اللي بيعمل بالقياس ويحاول يسهل على نفسه وعلى الناس

أحب السلفي اللي شايف إن الدين مش مشقة

أحب السلفي اللي ينصحني بالحجة وبصوت خفيض وبإسلوب مهذب ولو ما سمعتوش ما يضغطش عليا ويفضل يحبني زي ما أنا

أحب السلفي اللي بيحاول يبقى زي الرسول والصحابة ويتحلى بأخلاقهم لكنه عمره ما فرض على الناس بيقوا كدة لأن قدرتنا على أن نكون مثل الصحابة متفاوتة ولأن ربنا هيهدي كل واحد في الوقت المناسب

أحب السلفي اللي وسطنا ومختلط بينا.. معانا في النادي وفي المكتبة وفي الجامعة وفي الملاهي

أحب الدقن ..طالما ما بتضايقنيش

أحب النقاب.. طالما ما بيجرحنيش

بلاش تعميم.. مش كل سلفي متعصب ومتزمت

ومش كل ليبرالي فاسق وفاجر

كل واحد فينا بيحب ربنا ونفسه يدخل الجنة وما يدخلش النار.. اعتقد إن ده شعور أغلبنا بيحس بيه إلأ الناس اللي مش مؤمنة إن فيه ربنا أصلاً

كل واحد فينا بيحقق ده بالشكل اللي يريحه وبالشكل اللي قادر يتكيف معاه

في حد شايف إن صفاء القلب والنية يكفوا

في حد شايف إن صلاة الفروض تكفي

في حد شايف إن صلاة الفروض وحدها لا تكفي وإن السنن واجبة

في واحد شايف إنه ده مش كفاية ولا زم قيام ليل وتهجد

كل واحد مننا بيحاول يوصل للمعادلة بالشكل اللي هو مقتنع بيه وحاسه

الفرق بين المعتدل والسني والصوفي والسلفي إن كل منهم يحاول الوصول إلى الله بطريقته

ودي الغاية

يارب ما ننساش ده ونفضل نشتم في بعض ونكفر بعض

يارب حببني في كل الناس.. يارب ساعدني إني أقبل الجميع

تركان.. بعد ما طردوه بقى رمز في المزيكا!

أول ما المطرب التركي تاركان طلع سنة 92 تركيا حاربته عشان كان بيرقص وكان بيلبس حلق.. كان أول مطرب تركي يلبس حلق .. الهجوم استمر شهور عليه لحد ما طفش وراح ألمانيا .. الكوميدي إن تركيا سنة 2003 استخدمت البومه وأغنياته للترويج للسياحة في تركيا! واغانية كانت بتنزل على كتير من الإعلانات السياحية!!!

http://www.youtube.com/watch?v=VJw-JZh8BpQ&feature=relmfu

دي الأغنية اللي كانت بتستخدمها تركيا للترويج للسياحة.. واحدة من اشهر الهيتس التركية

دي بقى أغنية شيكدوم شيكيدوم .. بدون مبالغة اشهر أغنية تركية في أوروبا والشرق الأوسط..ولو اتفرجتوا عليها هتعرفوا إن تامر حسني مش بيأفور خالص خالص:)

http://www.youtube.com/watch?v=g2uy7Cfl6kU

وده اعلان ترويج للسياحة التركية على أنغام أغنيته الأشهر شيكدوم شيكدوم

http://www.youtube.com/watch?v=SnSu-bpxsgE

اشتهر تاركان في بداياته في بريطانيا وأوروبا بأنه المطرب اللي بيغني وبيتكلم بعنيه! عيون تركان عملت هلع للبنات لدرجة انه كان بيتصور صور وبوسترات لعنيه بس لأنها كانت بتتباع بشكل مهول، في الفيديو ده المذيع طلب من تاركان إنه يشرح إزاي بيعرف يغري الناس بعنيه

http://www.youtube.com/user/shoo303?feature=mhee#p/f/1/cHrVZfGT3Fo

الكلام ده ملوش اي مناسبة ..بس بقالي كام يوم بسمع أغاني تاركان اللي كنت متعودة اسمعها زمان وقريت شوية مقالات كده فكتبت الكلام ده

مثير وملفت للانتباه: قصص من حياتنا

شيماء الجمال، Cairo 360

العنوان: مثير وملفت للإنتباه

المؤلف: مصطفى الحسيني

النوع: روايات

تاريخ الإصدار: حالياً بالمكتبات

اللغة:عربى

السعر: 15.0جم

متوفر في: المكتبات

كتاب مصطفى الحسيني الجديد «مثير وملفت للانتباه» هو فعلاً واحد من المجموعات القصصية الممتعة اللي صدرت مؤخرًا في وقت كل الكتاب فيه بـ يركزوا على كتب بـ توثق الثورة. الكتاب عبارة عن 14 قصة إنسانية مستوحاة من الواقع، يعني هـ تلاقي في الكتاب قصص واقعية تمامًا وقصص ثانية بُنيت على خلفية واقعية مع جزء من خيال المؤلف وده الجميل في المجموعة دي، أنك بـ تحس بالتفاعل مع كل قصة في الكتاب وأنك بـ تقرأ شيء له علاقة بك وبالواقع اللي أنت عايشه.

عنوان الكتاب من أكثر العوامل اللي هـ تجذبك لقراءته وهو "مثير وملفت للانتباه" ولو عاوز تعرف قصة العنوان وليه قرر مصطفى أنه يسمي كتابه كده ما عليك إلا أنك تبدأ بقراءة الغلاف الخلفي اللي بـ يشرح فيه مصطفى مراحل اختياره لاسم كتابه.

مصطفى كتب قبل كل قصة 3 سطور في صفحة منفصلة هـ تقدر تفهم منها روح القصة وفكرتها قبل ما تقرأها وده هـ يخليك متحمس للقراءة وهـ تحس أنك فاهم الكاتب عاوز يقول إيه من كل قصة.

في القصة الأولى بعنوان "نظرة رحمة" بـ يحكي مصطفى قصة أحد الشباب اللي قُتل في ثورة 25 يناير على يد أحد رجال النظام السابق واللي ما وضحش مصطفى هو مين بالظبط، القصة هـ تأخذك إلى روح الثورة وهـ تعيش معاها موقف عاشه آلاف الثوار.

القصة الثانية مصطفى بـ يشرح لنا قبلها ليه كتبها وبـ يقول: "هي مجرد كلمات جالت في خاطري.. عندما ملكنا العالم بأسره يومًا.. واليوم لم نعد حتى نملك زمام أمرنا!". القصة مقسمة لجزئين، جزء بـ يدور أيام حضارة الأندلس الإسلامية، والجزء الثاني بـ تحصل أحداثه دلوقتي، وأنت بـ تقرأ القصة البسيطة العميقة دي هـ تقعد تفكر هو إزاي العرب كانوا عظماء كده وإزاي وصل الموضوع لدرجة أن كلمة "عربي" دي أصبحت تقريبًا شتيمة في الدول الغربية!

من أجمل قصص المجموعة القصة الثالثة بعنوان "جائزة الحب" اللي بـ يحكي فيها مصطفى موقف حصل لصديقه محمد مفيد مع مراته.. واللي بـ تعلمنا إزاي البني آدم يبقى عنده إيثار وإزاي يحب الخير للناس زي ما بـ يحبه لنفسه، وإزاي زوج ممكن يبقى نفسه في حاجة قوي ولما يعرف أن زوجته محتاجاها يفضّل زوجته على نفسه، قصة بسيطة وموقف بـ يحصل زيه كثير في الحياة الزوجية لكنه بجد هـ يلفت نظزك لحاجات كثير حلوة.

من القصص اللي هـ تلفت نظرك كمان قصة "خير أجناد الأرض" واللي بـ يهديها مصطفى للنقيب ماجد بولس اللي وصفه بـ"أسد التحرير" في موقعة الجمل، القصة بـ تشرح إزاي النقيب ابن الجيش قرر في يوم موقعة الجمل أنه ما سابش البلطجية يعدوا ويقتلوا حد وقرر ينضم للمتظاهرين ورغم أن كثير مننا قرأوا عن الموقف ده إلا أن مصطفى كتب القصة بمهارة شديدة وركز على مشاعر إنسانية جميلة ظهرت في الثورة.

الجميل في قصص مصطفى كلها أنه بـ يغلفها نسيج إنساني يخليك تتأمل في مواقف كثير ممكن تكون مرت عليك أو قرأت عنها في الجرائد والإنترنت لكن عمرك ما فكرت تبص للجانب الإنساني اللي فيها وتحلله بالشكل المميز اللي عمله مصطفى علشان كده ننصحك بقراءة المجموعة القصصية الأولى لمصطفى الحسيني.

عن المؤلف:

مصطفى الحسيني، صدرت له رواية بعنوان "2025 النداء الأخير". بـ يشتغل حاليًا مراسل ومقدم برامج لقناة 25 واشتغل قبل كده في قناة "أزهري" و"الرسالة" وهو مؤسس ومالك موقع دار الكتب.

أحمد حجاجوفيتش.. رحالة في حب مصر

كتبت: شيماء الجمال

عندما ترى الفيديوهات الكثيرة الخاصة به على موقع يوتيوب ستشعر بالأمل والتفاؤل وبأن الحياة جميلة وتستحق منك أن تعيشها بالطول والعرض وأن تحقق أهدافك ويكون لديك رسالة في نفس الوقت.

أحمد حجاج أو حجاجوفيتش كما يطلق عليه الآخرون، لم يقتصر حبه لبلده على لبس حظاظة تحمل إسم مصر أو حتى رسم علم مصر على وجهه في الماتشات الدولية، بل إن رسالته في الحياة ربما تبدو غريبة بعض الشيء لشباب لا يعرف سوى التسكع على المقاهي.. فأحمد حجاج يسافر حول العالم بلا ملل ولا تعب ليرفع علم مصر في كل بلد ويعرف الأجانب من هو المصري وكيف هي مصر الحقيقية.

وخلف هذه الرسالة المهمة المشوقة العديد من التفاصيل والمغامرات التي يرويها أحمد لنا في السطور القادمة:

بدأ احمد حديثه معنا قائلا: هناك من يدمنون الشاي ومن يدمونون الشيكولاتة أو القهوة ومثلهم تماما أدمنت السفر منذ أن كنت طفلا بسبب تأثري وارتباطي الشديد بجدي الذي كان يصطحبني معه في العديد من رحلاته، وكنت أسافر أيضاً في بطولات السباحة ومع مجموعات ولكن أول رحلة أسافر فيها وحدي كانت لألمانيا وقد تعلمت منها الكثير، بعدها قررت أن تكون رحلاتي لهدف معين وهو تعريف الغرب بالشخصية المصرية وبمصر الحقيقية البعيدة عن اعلانات نورت مصر التي تظهر المصريين بجلابية وتركز على الأماكن التاريخية فقط فتجعل السيّاح يعتقدون أنا متأخرون.. أريد أن أرى الغرب أن المصري شخص ذكي وخفيف الدم ومثقف ومتحضر ومنطلق وليس ارهابيا ولهذا أقوم بأداء رقصة إيقاعية بسيطة مع سكان كل بلد أزورها على سبيل التودد لسكان البلد ولتوثيق الرحلات بشكل جذاب ومسلي.

سفر أحمد الدائم بمفرده ساعده كثيراً في الإستفاده من رحلاته، فأحمد يتحدث خمس لغات وذو ثقافة عالية في الجغوافيا والتاريخ وثقافات الشعوب المختلفة وعن هذا يعلق: أحب دائما السفر وحدي وأرفض الإنضمام لأي مجموعات حتى أكون دائماً حراً في التحرك والإختلاط بالسكان والتعلم منهم ومن هنا لتعلمت عدة لغات منها اللغة البرتغالية التي أتقنها كالعربية تماما والإنجليزية أيضاً. وهذا يأتي من أني أرفض التحدث بلغة أخرى غير لغة البلد ولا أستسهل وأطلب من السكان أن يصوبوا لي أخطائي دوماً.

برغم سفر أحمد للعديد من البلاد ومعرفته بآلاف الأشخاص إلا أنه لم يكوّن أي أعداء وهذا كله بسبب الإبتسامة التي يرى أنها مفتاح الآخر فبالإبتسامة تستطيع أن تدخل قلب أي شخص.. ولهذا أيضا ًيرقص أحمد رقتصه الإيقاعية الشهيرة مع كل من يقابله لأن الرقص ليس له لغة ولهذا ستجدالعديد من الكليبات المشوقة على موقع يوتيوب على قناته الخاصة Haggagovic.

ويضيف أحمد بأنه على استعداد للذهاب لأي بلد في العالم مهما بلغت درجة المخاطر في هذه هذه الرحلة حتى أنه يتمنى الذهاب للقدس ورفع علم مصرهناك وأكد أنه سيذهب إلى آخر مكان في العالم ولكنه لن يذهب أبداً إلى تل ابيب أو إلي أي مقاطعة إسرائيلية إلا بعد أن نحررها.

وعن الأاشخاص الذين لا ينساهم أحمد أبداً في رحلاته يقول : صديقي الروسي مارسيل تايبوف الذي تعرفت عليه في أحد رحلاتي وهو من أطلق علي إسم حجاجوفيتش الذي أصبح يطلقه علي الجميع بعد ذلك وقد أصبح صديقي من يومها حتى أنه جاء إلى مصر وزارني ورقصنا الرقصة الشهيرة أمام الأهرامات.

يعلق أحمد: " كال هذه اللحظات الرائعة لا أستطيع أن أنساها ودائماً ما أجد في أحد جيوب بنطالي وفي دولابي أو حتى في جراب الكاميرا قصاقة ورق أو حتى ورقة شيكولاتة أو تذكرة قطار لتذكرني بمن قابلتهم وبالأيام والساعات التي عشتها خارج البلاد .

ولا ينسى أحمد ابدا المواقف الخطيرة التي تعرض لها ومنها حادث السرقة الذي تعرض له في أحد البلاد التي لا يريد ذكر أسمها والذي ضرب فيه من اللصوص في مدخل عماره في الساعة الثانية ظهرا حتى انكسر له ضلعان.

وفي النهاية يرى أحمد أن الخطوة التي يقوم بها أهم كثيراً من طبع البوسترات والكتيبات السياحية المملة، وأهم كثيرا من البعثات الدبلوماسة العادية التي تخاطب النخبة، ولكن الأهم لترويج السياحة المصرية هو تيسير سفر الشباب المصري للبلاد المختلفة حتى يصبح هذا الشباب سفيرا عن بلده بشكل مشرف، كما يجب أن تهتم مصر بترخيص أسعار تذاكر الطيران اليها وانشاء بيوت شباب وضيافة على أعلى مستوى كما بفعل الغرب وحينها سيتم الترويج للسياحة لأن الشباب هم أكثر فئة مستعدة للسفر.

ويتمنى أحمد أن يصبح له راعي رسمي في مصر يرعى سفرياته ويساعدة في ترتيب رحلاته واستخراج الأوراق التصاريح التي تستلزم من أحمد وقتاً ومجهودا خرافيا.

بيبسي

اعلان بيبسي الجديد بتاع دنيا سمير غانم.. كالعادة اعلان بيحاول يغسل دماغ المستهلك وبيبرمج العقل اللاواعي .. مفهمش الدرس عشان ما شربش البيبسي .. جملة هتخلي المستهلك مع الوقت يجيله اعتقاد دفين إنه مش هيفهم ولا هيعرف يركز غير لما يشرب بيبسي زي فكرة مش بركز غير لما بشرب سيجارة ود هممكن يحصل طبعا! عشان الكافيين .. اعلان بيبسي الجديد دعوة لإدمان الكافيين بس بشياكة :) بحب أنا أفك شفرات ما بين السطور في الإعلانات

تدوينات العمرة السريعة

تدوينات سريعة قصيرة خلال رحلة العمرة التي قمت بها في الفترة من 2 ل 12 أغسطس 2011 لم أنشرها لأنه لم يكن استخدام الإنترنت سهلاً وإنما كنت أدونها على ال "لاب توب".

هذه التدوينات والملاحظات القصيرة كتبتها خلال رحلة العمرة التي قمت بها بعد 11 سنة من عودتي النهائية من السعودية مع العلم بانها أول مرة أزور في مكة والمدينة بعد عودتي.. هذه الملاحظات بعضها شخصي، بعضها معلوماتي، بعضها ثقافي واجتماعي ربما تفيد بعض من ينوي الذهاب للعمل أو للعيش في مكة او المدينة ويمكنكم اعتبارها فضفضات.

أعتبر أن هذه الملاحظات مهمة لأنها ترصد اختلاف تفكيري واختلاف البلد واختلاف الطريقة التي أصبحت أقيم بها الأمور.

2 أغسطس

لأول مرة في حياتي كلها..ركب الطائرة ولا أشعر بهذا الخوف المرضي.. أخيراً تخلصت من الفوبيا المرضية من الطائرات.. اخيراً نظرت للسماء من الشباك بدون التخيل بان الطائرة ستسقط في البحر ! بس كنت بتخيل بصراحة ان الجناح هيتكسر من الهوا.. عالعموم تخيل أن الجناح سيكسر أفضل مائة مرة من تخيل أن الطائرة ستسقط.

مطار جدة شيء مقزز .. لم يعجبني على الإطلاق.. وخصوصا الجزء الخاص بالمعتمرين والحجاج.. الذين هم المفروض ضيوف الرحمن.. بصراحة شكرت أحمد شفيق في سري عندما تذكرت الرفاهية في مطارنا الجديد.

تقول امي بأن مشرفة التفتيش في الحرم يمكن أن تأخذ الكاميرا مني على البوابة لأن التصوير حرام.. ذهلت.. ذهلت .. هو تصوير كعبة الله حرام.. هي صورتي وأنا ورايا الكعبة حرام؟!

هل تعلم أنه لا يوجد في مكة وجدة( على أقل تقدير) أي إعلان في الشارع عليه صورة امرأة حتى لو كانت متحجبة... هل تعلم أيضاً أنه في مكة لا يمكن للمرأة أن تجلس في ماكدونالدز أو أي مطع JUNK FOODلتناول الطعام وانما تحصل على طلبها من شباك صغير لا يتعدى النصف متر؟

(عرفت بعد كدة انهم سمحوا للستات ياكلوا في المطعم.. بس في جزء مغطى بستارة!!)

خلال صلاتي في الحرم اليوم قال لي شيخ بمنتهى الفظاظة بأن صلاتي لا تجوز لأنني لم أضع رأسي على الأرض أثناء السجود.. الله وحده يعلم أنه لم يكن أي مكن أضع فيه راسي وهذه ليست مبالغة..

احساسي عندما رأيت الكعبة .. احساس لا يمكن أن أصفه بالكلمات .. لم أبك كغيري.. تنحت.. وقفت أنظر لها فترة طويلة في محاولة لأدرك .. لماذا هي مقدسة، لما تشيع هذا الكم من الطمأنينة والأمان عند النظر إليها؟

عندما سمعت الأذان أول مرة في الحرم بكيت.. أخيراً الأذان LIVEوليس من التيلفزيون. علماً بأنني سمعته مئات المرات عندما كنت أعيش في مكة.. ولكن هذه المرة كان مختلفاً .. مختلفاً جداً.

3 أغسطس

مات الرسول الكريم والصحابة بيدفنوه والملايكة بتحرسه وبلال بيبكي في الآذان ومهما قالوا ويواسوه قال يارتني أونسه- عن سيدنا بلال- من كلمات نبيل خلف.

أشاهد الآن برنامج خواطر على قناة M.B.C... المذيع السعودي أحمد الشقيري رجل رائع أحترمه بحق

مكة مليئة بالسود الذين يطلق عليهم هنا "تكارنة" ولم أستطع حتى الآن أن أعرف سبب هذه التسمية التي أشعر دوماً أنها عنصرية., يقولون التكروني راح.. التكروني جاء.. على العموم هم سود دخلوا إلى السعودية بدون إقامة.. ينجبون بشراهة ويعيشون على الجبال ويعملوان كشيالين أو شحاتين او عمال نظافة، قليل منهم فقط حصل على الجنسية السعودية ولهذا لا تتعجب اذا وجدت سعوديون في لون الأفارقة شديد السمرة.

4 أغسطس

على الرغم من اكتظاظ الحرم والأماكن المحيطة به ببشر من كل الجنسيات إلا أني أستطيع تمييز المصريين بدون أن يتكلموا كلمة واحدة.

يعد مركز مكة واحداً من أهم المراكز التجارية التي تحيط بالحرم، فهو ملئ بالمطاعم والمحلات التجارية ويميزه وجود هايبر ماركت بن داوود الذي يعشقه المعتمرون المصريون ودئماً ما يشترون منه الشامبوهات والكريمات والشيكولاتة المستوردة.

مشروب التوت المثلج هو المشروب الأهم في مكة ودائماً ما تجده يباع في كل الكافيتيريات والمولات ويتراوح ثمن الكوب منه بين 3-5 ريالات... أذا أعجبك المشروب ورغبت في تناوله في مصر فعليك وعلى "فيمتو" شراب التوت الذي ستجده في معظم الهايبر ماركت في مصر.

على الرغم من وجود مئات المطاعم التي تقدم الدجاج في مكة يظل البيك هو الأكثر نجاحاً يليه دجاج الطازج( فروج فقيه المشوي) .

يا سيدي العيال الهنود دول والباكستان بيعملوا فراخ وهمية !! بيحطوا الفراخ الصغيرة في السياخ ويسبوها تلف تلف لحد ما تستوي .. بحبها من ساعة ما كنت صغيرة.

5 أغسطس

للأسف الشديد لم أستطع التقاط الصور بالكاميرا ! أمن الحرم يمنع التصوير وكلما رآني أحد أفراد الأمن أقوم بالتصوير منعني وحذرني من أنه سيتم أخذ الكاميرا مني.. نظرت لأحد رحال الأمن وسألته .. هل تصوير الحرم حرام .. هل تصوير بيت الله حرام ... فنظر إلى ولم يجب .. هز رأسه أن " ملوش دعوة بالقرار ده" وتركني وانصرف !!

6أغسطس

بغض النظر عن منعهم التصوير في الحرم، إلا أنني مبهورة بنشاط الشرطة في مكة .. الشرطة بكل أقسامها .. ظباط، حراسة الحرم، ضباط المرور ... الظباط يقومون بمجهود جبار للحفاظ على أمان ونظافة ونظام منطقة الحرم التي يبلغ تعداد من فيها اليوم على الأقل 3 مليون.

نشطاء كالنحل، يساعدون الجميع، يساعدون كل شخص يرغب في الصلاة أو في أداء أحد المناسك، يرشدون التائهين، يساعدون كبار السن .. والغريب أنني لم أشهد حالة تحرش أو معاكسة واحدة من أي ظابط أو عسكري بأي رتبة وده شيء أذهلني بصراحة.. ده مفيش حتى حد بيبص .. مجرد بص !

7أغسطس الأحد

أتابع بشغف برنامج خواطر لأحمد الشقيري وبرنامج مذكرات سائح وبرنامج بني آدم شو في تركيا ومسلسل كارتون قصص الحيوان في القرآن .. فيها إيه لما إعلامنا يبقى كدة؟ حياتنا جرى فيها إيه من غير مسلسل غادة عبد الرازق وسمية الخشاب وفيفي عبده؟! ولا حاجة .. بالعكس دماغنا بقت أنضف.

8 أغسطس الإثنين

النهاردة علمت طواف الوداع الساعة 3 العصر.. الدنيا كانت حر جداً.. ودرجة حرارة الجو كانت خمسين ومع ذلك الناس كانوا مبسوطين وكانوا بيحاولو يعملوا أي حاجة للتغلب على حرارة الجو.. إللي حاطط كرتونة فوق دماغه، واللي حاطط فوطة مبلولة مية متلجة، واللي لابس طاقية .. أنا شخصياً كنت بدلق مية ساقعة كل شوية على وجهي.

9 أغسطس الثلاثاء

النهاردة وصلت المدينة.. الرحلة من المدينة لمكة استغرقت حوالي 6 ساعات.. الطريق من مكة للمدينة جميل ونضيف قوي. في منتصف الطريق وقفنا في استراحة وصلينا في جامع مبني فيها، جامع كبير وفخم.. بحترم قوي رجال الأعمال والأغنياء اللي بيبنوا جوامع .. يا ترى بياخدوا حسنات قد إيه والواحد بيصلي في المسجد اللي هما بنوه.. أكيد بياخدوا حسنات كتير.

المدينة فيها حاجة بتخطف قلبك أول ما تخشها ما أعرفش ليه .. حاسة بوجود الرسول فيها زمان .. مش قادرة أصدق انه كان بيمشي هنا .. وبيصلي هنا ..وبياكل هنا .. الغريب كمان ان أهل المدينة السعوديين طيببين بشكل مش ممكن! وكأنهم من بلد تانية .. طيبين وصادقين وجدعان بساعدوا أي حد يطلب مساعدة ومتسامحين في البيع والشراء ومهذبين و أسعارهم أحسن .. ماما بتقول ان دي جينات! هو طول عمر الرسول عليه الصلاة والسلام يمدح في أهل المدينة وبيقول انهم أحسن ناس في السعودية (الأنصار). الفرق الرهيب في المعاملة كمان تلمسه في المطار .. فرق المعاملة بين مطار جدة ومطار المدينة.. في جدة تحس الناس ببتكلم بعجرفة ومناخيرهم لفوق وتحس انه قرفان منك كدة، في المدينة الموظفين مبتسمين.. صوتهم هادئ و مش متعجرفين ... ناس لطاف .. تحس أتهم مش مخلطين.. أهل السهعودية الأصليين .

10 أغسطس الأربعاء

صلاة التراويح في الحرم النهاردة كانت ممتعة جداً.. الجو كان جميل والشيخ كان صوته حلو.. الدعاء كمان أثرفيا قوي.. وأول مرة أبكي بحرقة كدة في دعاء التراويح. الشيخ دعا للسوريين ودعا على بشار.. مقالش اسم بشار صراحة لكن قال فيما معناه إ يارب لينا اخوات بيشاركونا في العقيدة واالغة واقع عليهم ظلم وغدر يارب أنصرهم يارب إهلك عدوهم يارب عذبه بقدر اللي عمله فيهم( بشار والقذافي وش) ودعينا للفلسطيننين والصومال ... كان دعاء من القلب وبكيت من قلبي .. وده كان أكتر يوم أدعى فيه لربنا بكل هذا القدر من الخشوع.. الحمد لله يارب اقبل.

يا سيدي من ساعة ما الملك عبد العزيز عمل الخطاب بتاع سوريا والعربية والإخبارية السعودية ما وراهمش حاجة غير الشكر لخادم الحرمين الشريفين.. نظام إحداث.

11 أغسطس الخميس

أستغفر الله العظيم يارب .. أسوأ حاجة شوفتها في المدينة المنورة هي الستات اللي بيفتشوا في القسم الخاص بالسيدات في المسجد النبوي.. ناس دماغها مقفولة ومفيش أي تفاهم ومتاخرين جداً .. الست فتشت شنطتي ولقيتها فاضية .. ما لقيتش حاجة تتسلى عليها الظاهر .. راحت مساكاني من ايدي وشداني منها وفتشتني تفتيش ذاتي زي بتاع القسم ! وقعدت تحسس بإيدها على جسمي بطريقة ضايقتني وأهاتنتي جداً وفي الآخر سابتني.. مش عارفة ليه ما اتخانقتش معاها؟!

صبرت نفسي وقعدت طول الصلاة متنرفزة وعمالة التخيل سيناريو اني هزقتها .. عرفت بعد كدة انها كانت بتدور على الموبايلات عشان الست دي مابتدخلش الحرم موبايلات بكاميرا عشان التصوير حرام!! مش فاهم أنا بجد إيه التعصب ده ناس لابسين حجاب كامل وبيصلوا يعني مش بيرقصوا .. افرض حد صور إيه المشكلة! مالستات بتخرج كدة وكل الناس شايفنهم كدة .. إيه القرف ده !ّ! دي بلد ربنا إداها احسن مقومات لسياحة دينية ما تغضبش ربنا في حاجة .. بيقرفوا المعتمرين ليه اللي هما السواح بتوعهم.. لدرجة انهم يوصلوا الواحد انه مش طايق يدخل مسجد الرسول.. الناس دول لازم يطوروا من نفسهم بصراحة في النقطة دي ..

12 اغسطس الجمعة

النهاردة.. يوم الرجوع لمصر .. انبسطت في الرحلة وفرقت معايا وحسيت انها فصلتني شوية عن حياتي الروتينية في مصر.. مطار المدينة المنورة سيء سيء سيء إلى أقصى درجة عامل زي ما يكون موقف أتوبيس، مستغربة ازاي عندهم كل الفلوس دي ويستخسروا يعملوا مطار نضيف... خصوصا وان كل المعتمرين والحجاج بيمروا منه يعني لازم يكون واجهة.

أهم قرار أخدته بعد العمرة دي إني مش هعيش لنفسي وبس.. واني لازم أعمل حاجات تفيد الناس وتفرق معاهم ..

معمر الطاسة.. قصص وحكايات ومعلومات عن القذافي

تعليقي على كتاب معمر الطاسة اللي بجد استفدت منه معلومات جديدة عن القذافي وليبيا
http://www.cairo360.com/arabic​/article/books/2448/

الأتوبيس_ الميديا على الطريق

مبادرة تهدف لنشر الوعي بصحافة المواطن بين الشباب

نتيجة لزيادة الوعي الدولي والمحلي بأهمية صحافة المواطن وهي أن يصبح كل مواطن قادراً على التدوين و نقل المعلومات والصور والافلام القصيرة البسيطة عن طريق وسائل الإعلام، قررت "صحافة أكاديمي" - مبادرة يقدمها مجموعة من الصحفيين المصريين - تدشين ورشة جديدة بعنوان " الأتوبيس- الميديا على الطريق" وهي ورشة صحافة للشباب غير العامل بالصحافة تقام ولأول مرة داخل أتوبيس متحرك داخل محافظات مصر.

الأتوبيس يقوم بنقل العلم والمعرفة بكل ما يتعلق بالإعلام الجديد بما في ذلك التدوين والكتابة الإبداعية والصحافية والتصوير الفوتوغرافي وتصوير الفيديو إلى كل محافظات مصر حيت أن هذا النوع من الورش الإبداعية بقام بشكل أكبر عادة في القاهرة والإسكندرية.

يتقي الشباب في نقطة محددة للالتقاء، ينتظرون الأتوبيس وحين يأتي في موعده يصعدون ويجلسون في أماكنهم داخل الاتوبيس وحين يبدأ الاتوبيس في التحرك تبدأ أيضاً ورشة تدريبية تفاعليه في كل ما يتعلق بالإعلام الجديد، تعريفه، وكيف تجيده، ورش عمل في الكتابة الإبداعية، في الكتابة الصحفية، في التصوير الفوتوغرافي وفي الفيديو.. بعد 4 ساعات من التجول في المحافظة يصل الأتوبيس إلى احدى الاماكن الاعلامية (صحيفة – مجلة – قناة تليفزيونية – موقع إنترنت) ينزل الشباب من الأتوبيس في زيارة لتلك الوسيلة الاعلامية للتعرف على سير العمل داخلها ثم يعودون مرة أخرى الى الاتوبيس الذي يعود بهم الى نقطة العودة، وفي طريق العودة يتم عمل مناقشة مفتوحة بين المتدربين والمدرب، حول الورشة وللإجابة على كل أسئلتهم وللاتفاق على مشاريع تخرج يقيمها المدرب.

وقد قرر إقامة الورشة داخل أوتوبيس متحرك لأن الإعلام الجديد في الأساس يعتمد على الإبداع.. والهروب من الاماكن التقليدية المغلقة للتدريبات هي الهدف الأول بالإضافة إلى قدرة الأتوبيس على الدخول الى كل المحافظات والشوارع للدعاية للإبداع من خلال "بانرات" معلقة على الاتوبيس تحمل رسائل تشجيع للشباب على الإبداع.

سيقوم بالتدريب في هذه الورشة مجموعة من الصحافيين والمدونين والمصورين الفوتوغرافيين والعاملين بالحقل الإعلامي.

ونظراً لأن هذه الفكرة، فكرة جديدة على مجتمعنا في مصر فنحن ندعو جميع وسائل الإعلام أن تتواصل معنا بهدف نشر الفكرة بشكل أكبر، كما أننا نرحب بالمتطوعين الذين يرون في أنفسهم القدرة على الإضافة لهذه الورشة. كما نرحب ايضاُ بكل الشباب الراغب بتلقي الورشة، وذلك عن طريق ارسال إيميل مرفق فيه السيرة الذاتية للمتدرب مع شرح سبب رغبته في حضور هذه الورشة.

نرجو منكم التكرم بإخطارنا بالموضوعات والأخبار التي نشرت في مطبوعتكم أو في وسيلتكم الإعلامية عن طريق ارسال لينك أو رابط الخبر أو اخطارنا بالعدد الذي سينشر فيه الخبر مسبقاً حتى يتسنى لنا أرشفة وتجميع هذه الإخبار ونحن على استعداد تام للتعاون معكم وامدادكم بالمعلومات والصور والبيانات الصحافية.

0197777147

http://sahafacademy.com/