شيماء الجمال
الإسم: جود
النوع:مستلزمات منزل- هدايا
تصنيف:تسوق
العنوان: 21 شارع جزيرة العرب، الدور الثالث.
المنطقعة: المهندسين
المدينة:القاهرة-مصر
رغم إن كتير من الناس مش بيهتموا بإكسسوارات البيوت والأدوات المنزلية إلا إن البعض الآخر بيهتم بيها جدا وعارف إن ديكورات البيت والأدوات المنزلية الحلوة بتعكس الإنطباع الأول عن مدى إهتمام الست بشياكة بيتها.
هو ده المبدأ اللي دفع الفنانة التشكيلية ومصصمة الجرافيكس دينا فاضل إنها تحول الأشكال التقليدية للصواني والأكواب وقواعد الشاي وغيرها من قطع تقليدية نمطية بنشتريها للبيت للوحات فنية ومعرض متنقل لتصميماتها ودماغها، ومن هنا كانت بداية مشروعها "جود" اللي بيقدم الأدوات المنزلية والقطع المستخدمة في الديكور بشكل جديد.
دينا بتقول عن بداية مشروعها: "بعد ما لاحظت إن ستات كتير بيتعاملوا مع إكسسوارات البيت بإهمال شديد بالإضافة للشكل النمطي الروتيني للصواني والماجات والأكواب وغيرها، قررت إني لازم أعمل مشروع يغير الواقع ده وسميته "جود" لأنه جود كلمة معناها الكرم وده اللي بيميز البيوت المصرية بالإضافة لإنه إسم مناسب للروح الشرقية التراثية اللي براعيها في تصميماتي".
دينا بدأت مشروعها زي ناس كتير على الفيس بوك وكانت حريصة إنها تشارك بمنتجاتها في معارض كتير، ومن معرض لمعرض وبإجتهاداها قدرت تفتتح مؤخرا محلها الأول في شارع جزيرة العرب في المهندسين.
عشان توصل للمحل، ادخل شارع جزيرة العرب من عند شارع جامعة الدول العربية وامشي شوية هتلاقي المحل جنب Tommy Hilfiger .
ومن فترة قصيرة اختار Baymenفرع فور سيزونز مجموعة من المصممين عشان يعرضوا منتجاتهم فيه وكان منهم دينا فاضل وبكدة ه تقدر تشتري منتجات جود من هناك كمان لو حبيت.
المحل تنسيقه مميز وأنيق جداً، أول ما تدخل هتلاقي حيطة لونها dark aqua متعلق عليها خداديات(مخدات) كتير مطرزة ومكتوب عليها اتفضلوا. بالإضافة لإضاءات مختلفة هتحسس بجو البيت الدافئ الحميم واللي هيزود ده المزيكا الشرقي والغربي الهادية اللي هتسمعها في المحل وإنت بتتفرج على المعروضات.
هتلاقي في المحل 3 أقسام: القسم الأول متصمم وكأنه غرفة في بيت، معروض فيها المنتجات بشكل جمالي هيخليك تحس بالبهجة اللي هتضفيها على بيتك لو اشتريتها ومتعلق فيه ستاير بشكل مختلف وفيه حس ابداعي. القسم الثاني عبارة عن أرفف عادية زي بتاعة المحلات كلها معروض عليها كل أشكال المنتجات بشكل منظم ومرتب. أما القسم الأخير فهو قسم خاص بدينا فاضل فيه مكتبها الشخصي ومتعلق على حيطانه لوحاتها التشكيلية المعروضة للبيع طبعاً.
ماركة "جود" مشهورة جداً في مصر بحاجتين الcoasters أو قواعد الشاي والصواني واللي ابتدت دينا بيهم مشروعها من البداية قبل ما يتفرع شغلها ويشمل قطع أكتر في اكسسوارات البيت.
بالنسبة لقواعد الشاي فالمميز فيهم إنهم بيترصوا جنب بعض بشكل أفقي وبيكونوا لوحة واحدة أو شكل مترابط على عكس كل الكوسترز اللي بيتباعوا في السوق واللي هنلاقيهم بيترصوا فوق بعض، كوسترز دينا كمان مش مجرد قواعد عشان نحط عليها الكوبايات السخنة بالعكس ممكن نعتبرهم قطعة ديكورية لتجميل أي ترابيزة في البيت خصوصا وإن تصميماتهم جديدة قوي وبتتميز بالطابع الشرقي الفلكلوري. الجديد الصيف ده الcoaster tray ودي عبارة عن صينية صغيرة جداجدا معاها 4 قواعد شاي وسعرهم 160 جنيه.
أما الصواني المصنوعة من الخشب فنازل منها الصيف ده أشكال جديدة ومبهجة، زي صينية الكفوف وصينية البومة والعصفورة وصينية عرايس الماتروشكا الروسية. سعر الصينية المتوسطة الحجم 190 جنيه والكبيرة 280 جنيه أما صينية السرير فسعرها 370 جنيه.
هنلاقي كمان مجموعة كبيرة من الكبايات والماجات. وماجات الصيف ده ملونة من جوة بألوان زاهية وبيضاء من برة ومعاها ملعقة وتصميماتها متوافقة مع تصميمات الصواني والقطع الأخرى وسعر الواحد 60 جنيه.
هنلاقي كمان حاجات متنوعة زي البراويز الخشب اللي عليها صور فنانين مصريين والشموع الكبيرة اللي عليها تصميمات جرافيكس من برة وخداديات و photo boxes مزينة بصور الفنانين والفنانين الجداد اللي ضافت دينا صورهم السنة دي هما إسماعيل ياسين وتحية كاريوكا وعبد الحليم حافظ نتيجة لطلبات عملائها.
أحسن حاجة: التنوع الكبير في التصميمات والمنتجات.
أسوأ حاجة: ارتفاع سعر بعض القطع في المحل.
نصيحة كايرو360: منتجات جود من أحسن الحاجات اللي ممكن تدخل بيها كهدية على أي حد متجوز جديد.
