الأحد، 2 أكتوبر، 2011

سيرتي الذاتية باللهجة العامية!!


اسمي شيماء رضا الجمال، من مواليد1986، درست الإرشاد السياحي في كلية الآداب جامعة عين شمس واتخرجت سنة 2006 وما اشتغلتش في مجال الإرشاد السياحي غير لفترة قصيرة انتقلت بعدها للعمل في مجال تربية وتعليم الأطفال بأشكال مختلفة .. اشتغلت مثلا في حضانات ومدارس مع أعمار مختلفة من الأطفال من أول سنة لحد 10 سنين، اشتغلت كمان في تنمية المهارات الفنية، ومع الأطفال المتوحدين، وفي التدريب على القراءة باللغة الإنجليزية وفقا لبرامج دولية، وفي تدريس اللغة العربية لغير الناطقين، وفي الدروس الخصوصية، وف حكي القصص للأطفال، وفي الكتابة عنهم، وكل ما يمكن أن تتصوره أو تتخيله : ) عندي باع طويلة كمان في متابعة معظم أفلام الكارتون وتحليلها ، وفي قراءة قصص الأطفال وكل ما يتعلق بتربية الأطفال وسيكولوجيتهم ومشاكلهم النفسية.
درست كمان حاجات كتير ملهاش علاقة بتخصصي ولا شغلي مع الأطفال زي التسويق و إدارة الأعمال والدعاية والإعلان وعملت دبلومة لمدة سنتين ونصف في تنمية المواد البشرية في الجامعة الأمريكية، معلمتش بيها حاجة غير إني بقيت أعرف أشغل نفسي من غير وسايط!! الحاجات اللي درستها واشتغلتها مختلتنيش متخصصة جداً في حاجة واحدة لكن خلتني بفهم شوية في كل حاحة وأعرف أعمل حاجات كتير.

ننتقل بقى للصحافة.. كنت بكتب من زمان لكن مكنتش بنشر حاجة وأول حاجة تتنشر لي كانت سنة 2007 تقريبا في مجلة كلمتنا، ومن ساعتها وأنا بكتب وبحاول أطور مهاراتي الصحفية، كتبت لأماكن كتير زي مجلة المرأة اليوم الخليجية، مجلة شباب اليوم الخليجية، موقع جريدة اليوم السابع، موقع بص وطل، مجلة كايرو إيليت وغيرها وكنت مشرفة قسم الشباب في جريدة عين لمدة سنة ونصف وكان ليا عامود ثابت في مجلة كلمتنا بعوان 200 كلمة وعامود تاني في جريدة عين إسمه 4 you.

حالياً انا صحافية مستقلة بكتب لعين و موقع Cairo360.co وبوابة الوفد الإلكترونية وأي مكان تاني أحس إنه بيضيف لي !

من زمان وأنا مقررة أبقى صحفية مستقلة أو backpack journalist وبلغة السوق بيسموني صحفية شنطة.. أنا شايفة إن الصحفي المستقل ده شيء هايل لأنه بيبقى رئيس تحرير نفسه، وبيشتغل لدماغه وبس.. وبعد شوية الناس بتبتدي تعرف دماغه وبيبقى ليه قراءة مهتمين باللي بيكتبه هو بالذات وواثقين في دماغه.

مهتمة جداً بدراسة الصحافة وحضور كل الورش الممكنة و كان ليا تجربة في تدريس الصحافة لغير الصحفيين أو المبتدئين ومهتمة إني أطور نفسي في مجال التدريب الصحفي لأني بحب أعلم الناس وأدربهم.

صدر لي كتاب واحد في شهر أغسطس 2001 بعنوان "تاء مربوطة.. مواقف وتأملات لواحدة من التاءات المربوطة" الكتاب ممكن نصنفه كتابة ذاتية أو تدوينات وهو عبارة عن كتابات عني وكتابات بتعكس وجهة نظري في حاجات كتير عشتها، بس الجميل إن كتير من المواقف دي مرت ببنات وستات كتير عشان كدة أعتقد إن أي حد يقرأ الكتاب ممكن يلاقي نفسه في صفحة من صفحاته! الكتاب صادر عن دار إبن النفيس، رسومه الداخلية لبسمة لطفي وغلافة وإخراجه الفني لأحمد عاطف مجاهد ومن تقديم الكاتبة حنان مفيد فوزي .

وده التعريف الي كتبته عن نفسي في الكتاب:

من مواليد 1986 خريجة قسم الإرشاد السياحي، كلية الآداب جامعة عين شمس. تعمل في مجال الصحافة ومجال تعليم الأطفال والتنمية، ولها مدونة على الإنترنت تحمل اسم "أيام وأيام". تقضي شيماء وقتها برفقة الإنترنت وبصحبة الكتب وشرائح البيتزا وأغنيات إيدث بياف في عالم افتراضي من صنعها ولديها بعض المحاولات الخرقاء في التصوير والرسم وتحويش النقود!

بعد صدور الكتاب قررت أعمل صفحة لنسي على فيس بوك ..ناس كتير قالولي بلاش تعملي صفحة بإسمك واعملي صفحة بإسم الكتاب عشان انتي لسة مش معروفة وممكن حد يفتكرك بتتنكي وعايشة دور المشهورة.. بصراحة وجهة نظرهم تحترم وممكن تكون صح .. لكن انا بعمل حاجات كتير ملهاش علاقة ببعض وحسيت اني لو عملت صفحة لكتابي وصفحة لمقالاتي ولموضوعاتي الصحفية وصفحة عن الأطفال ده هيبقى كتير قوي وتشتيت للقارى .. أنا عايزة كل اصحابي واللي متابعين أخباري يبقوا تحت سقف واحد ويبقوا عارفين انهم هيدخلوا على لينك واحد وهيعرفوا كل حاجة عني.

حقائق عني: تقريباً مكتوبة ع البطاقة من كتر ما هي معروفة!
-من مواليد برج الدلو ومليش في الأبراج تماماً.
-متجوزة وعندي ولد اسمه فراس وبحب جوزي وابني جدا.
-بحب الأكل جداً لدرجة إني مش بعرف أحدد أكلاتي المفضلة .. ممكن آكل أي حاجة لو جاية على مزاجي إن شالله كانت شربة ضفادع.
-عشت 10 سنين في السعودية صنعوا مني مريضة شيزورفرينيا درجة أولى.
-بتفرج على أفلام عربي كتير وحفظ الإيفيهات وبقعد اقولها طول انهار والليل واضحك عليها حتى لو محدش فاهمها .. وعندي قدرة إني اضحك على فيلم جاي في السريع.

-بالنسبة للأفلام الأجنبي ما بحبش غير الدراما واللايت كوميدي والافلام الرومانسية وأعشق أفلام السيرة الذاتية .. بكره أفلام الرعب والأكشن والخيال العملي.
-بحب القراءة زي عنيا وبقرأ في مجالات متعددة بس مليش في الروايات الأدبية الطويلة.
-مهتمة بعوالم ما وراء الطبيعة وعلم النفس والتنمية البشرية والدعاية والإعلان والرسوم المتحركة والكوميكس والتنمية المجتمعية.
-مكنتش بحب السياسة ولا بفهم فيها خالص واتحسنت بنسبة 80% بعد الثورة.. ودي أحد أفضالها عليا وعلى سواقين التاكسي.
- بحب المزيكا قوي وبسمع تقريبا كل حاجة بس ذوقي غريب حبتين.. يعني ممكن ابقى سعيدة جداً وأنا بسمع فارس !
- هدفي في الحياة هو المعرفة .. ومعرفة بني آدمين وتبادل هذه المعرفة معاهم.
-مش متحررة تماما ومش متدينة تماما.. متوسطة .. لكن أحترم الإخوان والسلفيين وأحترم الأفكار والإختلاف .. وبالمناسبة ، فخورة بإني محجبة وشايفة الحجاب فضيلة.


هناك 4 تعليقات:

إيناس حليم يقول...

احلى حاجة انك كتبتي عن نفسك حاجات بسيطة اوي لكن انتي اوي..

ربنا يوفقك يا شيماء انا بحب اقرالك

شيماء الجمال يقول...

ربنا يخليكي يا إيناس :)

شيماء الجمال يقول...

ربنا يخليكي يا إيناس :)

شيماء الجمال يقول...

ربنا يخليكي يا إيناس :)

Related Posts Plugin for WordPress, Blogger...

زوار المدونة