تأملات عن السادة الحيوانات

دي مجموعة من الستيتيوسات والردود اللي كتبتها تفاعلاً مع إسبوع الحيوان واللي طبعاً أخدت بسببها تريقة للصبح  حبيت أجمعها كلها في مكان واحد لأني حسيت إنها بتعرض وجهة نظري في موضوع أنا شايفاه مهم .. لكم حرية الإقتناع والإختلاف .. والتريقة البريئة مسموحة ..

دي صورة لحملة عملها الممثل جان كلود فان دام ضد من يقتلون الحيوانات من أجل فراءها تفاعلاً مع اسبوع الرفق بالحيوان من 1-7 أكتوبر ، عايزة اسمع عن فنان واحد تفاعل مع إسبوع الحيوانات مش لاقية :)

كان فيه حلقة شفتها من كارتون سبونج بوب .. سبونج كان بيؤكد انه بيصطاد القناديل بالشبكة من أجل متعة الصيد فقط وبيرجعها تاني المية :) وكان بياخد منها شوية صوص للهمبورجر .. المهم حد طلب نه يصطاد قناديل عشان ياخدوا منها الصوص و فعلا عمل كدة ولما شاف المصنع ولقى انهم بيستنزفوا القنديل بطريقة غير آدمية دخل هرب القناديل كلها واتضايق من نفسه جداً .. بجد الحلقة أذهلتني من كتر نبل فكرتها.

أنا بكره الرياشة اللي بتترمي فيها الفرخة صاحية وتقعد تصوت لحد ما تموت :( هيخسر إيه الراجل لو دبح الفرخة وبعدين ريشّها دي مش هتاخد في إيده ثانية .. تخيل حد عمال ينتف في شعرك شعرة شعرة حتى الموت ؟

الحيوانات النادرة قيمة بيئية وإلا ن ما كانتش كل دول العالم التالت تعمل محميات طبيعية، زمان كنا بناخد قصص في العلوم لما كائن ينقرض أو يختفي كان بيحصل إيه في البيئة .. فاكرين القصص دي ؟

عندي ملحوظتين .. أول ملحوظة، في فرق بين أكل أو إستخدام حيوان متوافر في البيئة زي الفراخ واللحمة وفيه فرق بين صيد حيوانات نادرة شبه منقرضة عشان ي غرض خصوصا بقى لو كان مش أساسي .. معظم حيوانات الفراء نادرة جدا بدليل غلو ثمن الفراء الرهيب وعدم شرعية عمليات صيد الحيوانات دي .

التانية بقى .. الإسلام مدينا كام نصيحة قبل ما نذبح الحيوان؟؟ سمي عليه، وما تويرهوش السلاح، وما توريش حيوان حيوان تاني بيتدبح، وادبحه في حته معينة ما يتألمش منها .. فيه نقطة غير نقطة الذبح وهي نقطة التعذيب .. شوفوا فيديوهات سلخ الحيوانات م نأجلى فراءها هتحسوا إنها أفللام رعب.

لما كنت صغيرة وكنت بموت نملة في السرب ..كنت بلاقي السرب اتلخبط واتفشكل كدة والنمل عمال يجري ويروح وييجي ..كنت بحس انهم اكيد حاسين ان حد من عيلتهم أو من أصحابهم مات :( كنت بزعل بصراحة من نفسي وكنت أنام بدخل وبسيب السرب يمشي يدخل جحره.

عارفين الفراشات الصفرا اللي بتتلم على النور الاصفر .. بييجي منها كتير في بيتي .. بصراحة بسيبهم يطيروا حوالين النور ومش بحب أموتهم بأمانة لأنهم مش بيضايقوني ولا بيأذوني .. بحب أشوفه طاير حوالين للمبة.

كنت بشتغل في مدرسة كل المدرسين اللي فيها أجانب.,. كانت المدرسة بتقول للولد اللي بيدوس على الصرصار في الجنينة بجزمته: انت بتموته ليه؟ هو أذاك في حاجة.. تحب حد يدخل بيتك ويخوفك أو يضربك أو يقتلك؟.. ما تضايقش الصرصار طالما هو في بيته.. اتفرج عليه من بعيد وشوف بيعمل إيه.. هو ده الفرق بين المدرسة المصرية والمدرسة الأجنبية.

بمناسبة إسبوع الرفق بالحيوان 1-7 أكتوبر ..تعالوا نعلم ولادنا إن شد ديل القطة حرام.. تعالوا نعلم ولادنا ما يدوسوش بجزمهم على الفرشات والحشرات اللي في الجناين العامة.. تعالوا نعلمهم يتفرجوا على الحشرات دي ويتعلموا منها ويعرفوا فايدتها ..

حدثنا قتيبة بن سعيد عن مالك بن أنس فيما قرئ عليه عن سمي مولى أبي بكر عن أبي صالح السمان عن أبي هريرة أن رسول الله صلى الله عليه وسلم قال بينما رجل يمشي بطريق اشتد عليه العطش فوجد بئرا فنزل فيها فشرب ثم خرج فإذا كلب يلهث يأكل الثرى من العطش فقال الرجل لقد بلغ هذا الكلب من العطش مثل الذي كان بلغ مني فنزل البئر فملأ خفه ماء ثم أمسكه بفيه حتى رقي فسقى الكلب فشكر الله له فغفر له قالوا يا رسول الله وإن لنا في هذه البهائم لأجرا فقال في كل كبد رطبة أجر.

1-7 أكتوبر .. إسبوع الرفق بالحيوان

عن عبد الله بن عمر رضي الله عنهما أن رسول الله - صلى الله عليه وسلم - قال : ( عُذّبت امرأة في هرّة ، سجنتها حتى ماتت ، فدخلت فيها النار ؛ لا هي أطعمتها ، ولا سقتها إذ حبستها ، ولا هي تركتها تأكل من خشاش الأرض ) متفق عليه.

1-7 أكتوبر .. إسبوع الرفق بالحيوان

كام واحد بيعدي في الشارع يشوف قطة بتتألم ويشوطها ويكمل طريقه..كام واحد بيلاقي قطة بتموت قدام باب شقته وما يهونش عليه يطلعلها حتى بواقي الأكل!

مش عارفة ولا لأ شفتوا الأطفال اللي بيمسكوا القطة من ديلها ويقضلوا يطوحوها منه وتفضل القطة تصوت من الألم .. حتى لو كنت بتكره القطط دي الرحمة اللي لازم نعلمها لعيالنا .. العيل اللي بيضحك وهو شايف قطة ببتألم ده عيل يا مش فاهم انها موجوعة ياعيل مريض وسادي .. إيه التهريج بقى في اللي بقوله..

قعدت النهاردة أفكر في الحديث بتاع الراجل اللي خلع جزمته وسقى بيها الكلب .. متهيألي لو كتبت ان في شاب قلع جزمته النايكي امبارح في الشارع وبوظها عشان يشرب كلب كانت الناس كلها هتقلبها تريقة.

واحدة صحبتي بتحب الحبوانات قوي .. في مرة كانت ماشية على كوبري أكتوبر ولقت قطة ببتألم وقفت العربية وأخدت القطة وودتها عند دكتور بيطري جنب بيتها والراجل جبسلها رجلها ومرضيش ياخد فلوس لأن القطة من الشارع وخلت القطة قدام باب الشقة اسبوعين تلاتة تأكلها وتشربها بواقي الأكل لحد ما الدكتور فك الجبس والقطة بقت كوسية ونزلت تلعب في الشارع.. بجد أنا احترمت صحبتي دي قوي في الموقف ده.. لأنها إنسانة رحيمة ما اتسحملتش الم الحيوان اللي قدامها وعملت مشاوير عشان ما يتألمش .. بس يعني .. ده مجرد نمودج ممكن بسببه ربنا يغفرلها بلاوي كتير.