الجمعة، 22 يناير، 2010

مقالي الجديد بجريدة عين


4you

الحق نفسك !

خلاص كلها كام يوم وأجازة نصف السنة تبتدي والموضوع ده بيخليني افكرفي حاجة مهمة جداً ..الوقت اللي هيتسرسب مننا من غير ما نحس، وأسمحولي أقول منكم مش مننا بما أني خلصت جامعة خلاص ولم يعد لي أي صلة بأجازات الجامعة من قريب أو بعيد. بصراحة بتغاظ جداً من الشباب اللي مضيعين عمرهم ما بيعملوش حاجة مفيدة، والشباب اللي فاكرين أنهم لمجرد أنهم راحوا الجامعة وحضروا الكام محاضرة وامتحنوا وخلصوا يبقى كلوا تمام، أحب اقول للشباب اللي فاكر ان الجامعة هتشغله : كان غيركم أشطر .. أيام زمان بتاعت تتخرج وتستنى تعيين الحكومة وتروح للعروسة تقول لأهلها أنا موظف درجة سادسة فيفرحوا بيك ويزغرطوا ويقدموا الشربات دي ولّت خلاص..دلوقتي بشاهدة الجامعة فقط فيه مئات غيرك أنت ما تفرقش عنهم حاجة.الشغل دلوقتي بقى عايز لغة وكمبيوتر وsoft skills

يعني تتعلم ازاي تتكلم وتعدي انترفيوهات وتتعلم مهارات التفاوض وادارة الوقت والعمل مع فريق، يا اما شكراً، هتتخرج تلاقي مئات الشباب بيتدربوا وبيشتغلوا من ثانوي ومقطعين الكورسات و الأنشطة في الكلية وحضرتك قاعد محلك سر مستني بابا يدي السي في لعمو وخالو عشان يشوفولك شغلانة. أنا مش بقول الكلام ده عشان احبط حد، أنا بقوله عشان لسة في فرصة انك تتعلم وتتغير، لسة في فرصة انك تدخل على جوجل ويوتيوب وتعمل سيرش على حاجة غير الكليبلت والمسلسلات .لاحظ كمان ان طبيعى الوظائف اتغيرت لأنه في ظل وجود شغلانات كتيرpart timeو free lancing تقدر تشتغل وانت بتدرس وتقدر تشتغل وأنت قاعد على المكتب في بيتكو ومش مهم انت بتدرس ايه، المهم انت بتعرف تعمل ايه، ترسم، تطبخ، تمثل، تترجم، تكتب مش مهم ..المهم أنك تجرب كل حاجة في الدنيا يخطر على بالك انك ممكن تعرف تعملها ..وعشان خاطري ما تقولش ما بعرفش ..واحد قريبي أنا متأكدة من انه ممكن يبقى صحفي شاطر جداً وكل اما أقوله كده يقولي ما بعرفش أكتب .. مع أن عمره ما مسك ورقة وحاول يكتب ..طيب عرفت منين انك ما بتعرفش ؟ حاولت؟

صدقني.. لسة في وقت تحاول وتلحق نفسك

هناك 5 تعليقات:

Omnia يقول...

a lovely push :)
keep up

فكرة من الزمن ده يقول...

معاكي مليييييون بالمية
لازم نحاول نعمل كل حاجة واي حاجة وكتير بنكتشف اننا عندنا حجات ما كنا نعرف اننا نملكها
مقالة محفزة اوي اشكرك
تحياتي
على فكرة بحبك
مش عارفة انا قلتهالك ولا لاقبل كده
لكن ميمنعش نقول للناس كتير اننا بنحبهم في الله

شيماء الجمال يقول...

أمنية:)

شكراً

شيماء الجمال يقول...

فكرة

ربنا يخليكي يا حبيبتي

:)

شيماء الجمال يقول...

فكرة

ربنا يخليكي يا حبيبتي

:)

Related Posts Plugin for WordPress, Blogger...

زوار المدونة