شيماء الجمال
نشر بموقع cairo360.com
كام واحدة حامل بتكون قلقانة في حملها وعايزة تعرف تفاصيل أكتر عن الجنين اللي ف بطنها والتغيرات اللي بتطرأ عليها؟ الشيماء توفيق-خريجة كلية تجارة- كانت واحدة من الستات المهتمات بمتابعة حملهن لحظة بلحظة وده اللي دفعها إنها تدور على Application على الموبايل عشان تقدر في أي وقت تدخل وتتأكد من أي معلومة هي عايزاها ومع البحث المستمرة شيماء مالاقتش غير تطبيقات باللغة الإنجليزية فقط فقامت بتحميلها والإسفادة منها.
الموقف ده دفع جوز الشيماء محمد نبيل واللي بيشتغل في الويب ديزاين إنه يعمل هو وشيماء تطبيق عن الحمل باللغة العربية أطلقوا عليه اسم "نونوجاي!" واللي يعتبر حاليا التطبيق الأول والعربي الوحيد للمرأة الحامل.
محمد بيكلمنا عن الفكرة وبيقول: اشتغلت مؤخرا في الموبايل ديزاين وده خلاني قادر على تنفيذ تطبيق "نونو جاي!" والتنفيذ بدأ لما "نوكيا" أطلقت مسابقة "بالمصري" لتطبيقات الموبايل ولما عرفنا قدمنا فيها بفكرة "نونو جاي!" والمذهل إننا فزنا بالمركز الأول في التصنيف اللي كنا مقدمين فيه وهو "خدمة المجتمع" والجايزة كانت مبلغ مالي ساعدنا إننا نبدأ التنفيد على موبايلات نوكيا تحديدا و جربنا نعرض التطبيق فلقينا إنه تم تحميله في ثلاث شعور 3000 مرة بدون أي دعاية وده خلانا نعرف إن فيه ناس كتير ممكن يكونوا بيفكروا زينا ، ومن هنا طورنا التطبيق عشان يبقى مناسب كمان لموبايلات الآندرويد والآيفون.
محتوى التطبيق تم تجميعه من أهم مواقع الحمل والأمومة المعترف بيها عالميا وطبيا ومن أبرزها بيبي سنتر.كوم وده عشان الحرص إن كل المعلومات تكون سليمة ودقيقة.
ممكن تحمل التطبيق من على الموبايل مباشرة أو من اللينكات الموجودة على صفحة الفيس بوك الخاصة بالتطبيق "نونوجاي!" واللي فيها دلوقتي حوالي 5000 شخص مهتم بالحمل والأمومة أغلبهم حوامل بيحبوا يتواصلوا مباشرة مع فريق عمل المشروع ومع حوامل تانيين.
بمجرد ما تحمل التطبيق هتلاقيه بيطلب منك تعمل registration وبمجرد إدخال آخر موعد للدورة الشهرية البرنامج بيحسب للأم المنتظرة هي في أنهي إسبوع بالظبط وبناء على ذلك بيقدر التطبيق يتفاعل مع المستخدمة.
التطبيق بيتضمن عدة أقسام زي "معرفة الإسبوع الحالي للحمل" وده بيبقى فيه معلومات عن تطور الجنين في الإسبوع ده وعن التغيرات اللي بتطرأ على الأم. وقسم "معلومات إسبوعية" وده فيه معلومات عامة للحمل عن كل ما يتعلق بالحمل والجنين بوجه عام. والجميل كمان قسم "بيانات الطبيب" وده قسم ممكن المستخدمة تسجل فيه كل حاجة عن دكتورها عشان تلاقيها بسرعة لما تحتاجها. هتلاقي كمان قسم لأسماء الأطفال وده عبارة عن قاعدة بيانات لحوالي 4000 اسم أولاد وبنات.
وبما إن الستات بيشغلهم تطور وزنهم أثناء الجمال هتلاقي قسم بتدخلي فيه وزنك كل شهر والتطبيق بيطلعلك رسم بياني بقمدار زيادك ومقارنته بالشهور اللي فاتت. أخيرا هتلاقي القسم الخاص بالولادة وما بعدها وده فيه فيديو 3d قصير بيشرح عملية الولادة وبعض الموضوعات الأساسية اللي هتحتاجها المرأة بعد الولادة زي الرضاعة الطبيعية والصفراء.
التطبيق مجاني وفريق العمل مصمم إنه يفضل مجاني عشان يخدم كل السيدات الحوامل في مصر وهيحقق أرباحه لاحقاً عن طريق الإعلانات. عايزين نقول في النهاية إنه وفقاً لمؤسس التطبيق فإنه اتحمل لحد دلوقتي حوالي 40 ألف مرة من مختلف الموبايلات وجاري في المستقبل توفيره على البلاك بيري وكل الJava phones زي سامسونج.
ليست هناك تعليقات:
إرسال تعليق