أيام وأيام

5 أسباب ما تخليهوش عايز يخرج معاكي !

1- زهقان
ايوة ما تستغربيش قوي كدة و تاخديها على نفسك..كل يوم بيكلمك ..كل يوم بيشوفك...كل يوم بيتخانق معاكي .....كفاية بقى، الراجل زهق ومن حقه يكسر الروتين ولو ليوم

.
2- نفسه يقعد مع ولاد زيه وياخد راحته
أنا عارفة إنك هتقوليلي إنكوا متعودين على بعض، وإن هو بيقولك إنه عمره ما بيكون على راحته غير و هو معاكي، بس زي مالبنات بيحبوا يقعدوا " قعدة حريمي" الرجالة كمان بيحبوا يقعدوا ع القهوة ، يتكلموا ع الستات و يهرجوا بصوت عالي ويشتموا بعض بألفاظ "أبيحة"على سبيل التهريج .

3- مش عامل حسابه على الخروجه
جرت العادة إن الولاد يعزموا البنات _ولا ون الموضوع ده خلاص بقى آيل للسقوط_ فكري إنه ممكن ميكنش عامل حسابه معهوش فلوس يروح الكافيه الغالي اللي فيه عيد ميلاد صاحبتك،أو معندوش لبس مناسب لخروجتك ..فكري كويس ..أكيد إنتي ما ترضيلوش يتكسف.

4- مسحول من كتر الشغلً \ المذاكرة
الرجالة أحياناًًَ ًبيشتغلوا و بيذاكروا زي الحميربجد ، و ساعتها بتكون الرغبة الوحيدة هي تناول وجبة غذاء دسمة من بتوع ماما و الأنتخة أمام التلفزيزن حتى اليوم التالي ، آخر حاجة في الدنيا بيفكر فيها هي إنه ينزل يقابلك و يقعد معاكي في الكافية الزحمة ويسمع كل حكاياتك المملة عن مامي و بابي و طنط ماجدة و سارة و صاحبها.

5- واخد على خاطره
المشكلة فينا يا بنات_ أو يا ستات _ إننا لما بنتضايق بنبقى رخمين قوي ، بنهزق و بنتريأ و بنعلي صوتنا و أول ما بنقعد شوية مع نفسنا بنهدى و بننسى كل حاجة علطول،الرجالة مش كدة ..ممكن يكون مش عايز يخرج معاكي عشان متضايق منك أو مش قادر ينسى الطريقة البايخة االي كلمتيه بيها آخر مرة ..حاولي تصالحيه، يمكن تنولي مرادك.