الأربعاء، 1 أبريل، 2009

أنا ووسط البد والقهوة والتاون هاوس !!


يوم الجمعة اللي فاتت رحت جاليري التاون هاوس أشوف الدنيا فيها أيه،أنا مش عارفة بجد المنطقة دي أيه سر الجمال والسحر اللي فيها ، ليه بحب أروح هناك؟المكان جميل ..بدروم وجراج معمولين جاليري ومبنى تاني معمول مكتبة،المكان شارع النبرواي المتفرع من شارع شامبليون جنب الجامعة الأمريكية كده..اللذيذ في الامر ان المكان بيهتم بالفنون المعاصرة ،مش نظلم اللوحات الزيتية الحمضانة اللي عفا عليها الزمن..حجات روشة جداً والله العظيم :)

ده غير بقى القهوة اللي جمب التاون هاوس ..جميييييلة،أنا بقيت أحب أقعد ع القهوة قوي وقدرت ليه الولاد بيدمنوها ،هي فعلاً ادمان ..احساس جميل كدة انك تطلب "عناب" بخمسة وسبعين وتقعد تقرأ الجورنال وتسمع بقى المثقفين المخابيل ..الناس هناك مخابيل والمصحف واحد فضل ساعة يكلم واحد ويقول والله العظيم والله العظيم ومش بيقول حاجة!! فضلت أضحك لما كنت هموت ههههههههههه .الراجل طلع في الآخر فنان تشكيلي .

الورشة اللي حضرت المعرض بتاعها اسمها "سوا"،وفكرتها ان الفنانين بيجيبوا اعلانات قديمة ويعيدوا تصميمها بما يناسب روح العصر مع إضفاء لمسة ساخرة عليها ،بجد مت من الضحك ..تعالوا نتفرج سوا (أكنكوا جيتوا معايا بالظبط) :

المفروض ان ده اعلان كريم (نظام كريم اسمنتكو كده)

ده أصلاً اعلان شفرات حلاقة جيليت

اعلان عن زيت موبيل للطائرات(لاحظ التوكتوك في الخلفية)

هناك 4 تعليقات:

عطشان يقول...

أنتى شكلك روحتى التكعيبة هى مش الحلوة اوى يعنى بس جوها لذيذ المشكلة إن كل واحد قاعد على القهوة دى لازم يعيش إنه مثقف و هو ولا مثقف ولا بتاع و تقعدى تسمعى كلام غريب...يلا اهو كويس إنك دخلتى جزء من اجزار وسط البلد لسه باقى عليكى كتير فى قهواى المفروض تروحيها عندك منه فيه و أفتر 8 و تأكلى من عند سعد الحرامى و تطلعلى على الندوة الثقافية...ربنا معاكى :)

غير معرف يقول...

لا أنا مش بتكلم على التكعيبه،أنا بروح قهوة التاون هاوس والندوة الثقافية :)
أيه منه فيه دي ؟؟
after8ده pub مش كده ؟؟ يعني فيه بيرة وحركات :)
لا ما بكلش من سعد الحرامي باكل من عربية كبده اسمها شبرواي ..الرغيف الفينو بنص جنيه ولك أن تتصور :P

عطشان يقول...

افتر ايت قهوه و فيه مكان تانى للبيرة و الحركات و أكيد بكلمك عن القهوه اما عن سعد الحرامى صدقينى مش حتلاقى أقذر منه و مش عايز أقرفك بجد :)

شيماء الجمال يقول...

هبقى اروحها :)
لا ما تقرفنيش من فضلك انا مش ناقصة

Related Posts Plugin for WordPress, Blogger...

زوار المدونة