العيد عند شوشي :
------------------------------
يعني محاولات خرقاء لتنظيف المنزل..
يعني لبس جديد و لعب للواد فرفور..
يعني كحك بملبن من اللي بحبه بتاع الشاعر أبو 25 جنيه و ما تسألوش ليه بجيب النوع الرخيص الردئ ده بس هو ده اللي بحبه!!
يعني عيدية من محمد و من بابا ..
يعني أي فيلم هابط و فكسان وخناقة مع محمد على النزول في العيد وسط الزحمة و الأرف..
يعني محاولة قوية جداَ لصلة الرحم
يعني رنجة أول يوم و بيتزا تاني يوم..
يعني ..كل سنة و أنتنوا طيبين و أحلى مدونين و قراء :)
هناك 17 تعليقًا:
كل سنه وانت طيبه يا طيب قلب..ضحكت لما قريت كلامك..دى هى نفس السيناريوهات اللى بتحصل فى كل بيت.
على فكره اكتر حاجه بقى مستغربالها حكايه الكحك ابو 25 دا ..طب هو لذيذ يعنى ..اعتقد اكيد طالما بتحبيه. انا كمان بحب كحك الملبن وبجيب فى العيد كمان شوكليت .وبما انى فى السعوديه..اوصيك بقى بالسينما وربنا يسعدك انت واهلك والشقى الصغير.
عيد سعيد.
لولا
يعني ناس مأنتخة في البيت ....
يعني يوم لاقناع الاصحاب انهم ينزلوا في يوم زحمة زي دة ..
يعني ذكريات جميلة ... خصوصا تاني يوم العيد . . .
يعني كل سنة و انتي طيبة . . . :)
إيه خرقاء دي جمع خارقة ؟؟ والله الواحد بيتعلم P:
احلى حاجة في البوست دا انك بتتكلمي عنك و بتقربينا منك أكتر
جديدة حكاية رنجة في العيد .. ليه لأ
كل سنة وانت طيبة و فرفور عسول و محمد بخير .. و يا رب أسرة سعيدة دائما و أبدا
لولا يا لولا :
كل سنة و انت طيبة يا قمرة ، الكحك فل الفل ،أكلت ماديرا ولابوار و ساليه سوكريه ..برضه مفيش غير الكحك بتاع الشاعر ..حلواني سوري ..تظهر وسامته في كعكاته..ههههه بهرج طبعاً.
لسة ما رحتش السينما والله :(
عمر ..كل سنة و انت طيب
أحمد ...كل سنة و انت طيب
والله يا كاريمان كلمة خرقاء دي كلمة د أحمد خالد توفيق في روايات ماوراء الطبيعة ..دايماّ كان يصف محاولاته بالخرقاء ..هههههههه
الرنجة بتبقى حلوة بعد رمشان لأنها بتعطش جداَ فمحدش بيقربلها في رمضان..
كل سنة و انت طيبة
كل سنة وانتي طيبة .... يا شوشي
هي هي هي هي و انت طيب يا حسام
ياريت تيجي تزورينا وتدوقي الكحك اللي انا وكريمان عكيناه مع بعض
يمكن تنسي كحك الشاعر
كلامك رغم بساطته معبر جدا جدا عن العيد في مصر
كل سنة وانتي طيبة
:))
د مها :
هههههه
طالما انتوا اللي عكينه يبقى لازم آجي ..نورتني زيارتك كل سنة وانت طيبة
كل سنة و أنتى طيبة يا شيماء ..
أحلى حاجة فى العيد إن يكون ليه طقوس , غير كده بيبقى ممل ..
:)
كل سنه وانتي طيبه
متاخره شويه بس هي اللي تليق عالبوست
بعيدا عن التهاني فمدونتك استايلها غاااااااااية في الروعه بجد
تنسيق ما شاء الله
تحياتي ليكي و لبلوجك الرائع اسما و م تنسيقا و كتابة...قلبا و قالبا
تحياتي
رامي
ايه ده فين البوست الجديد
هو العيد مش خلص ولا ايه
ولا انتي لسه بتاكلي الكحك يا شيماء
هههههه
والله كنت مشغولة جداّ يا حسام :)
كاريمان :
خرقاء مؤنث أخرق أي أحمق
إرسال تعليق