أيام وأيام

مع نفسي في المساء

مه لازم أكتب ، لو مكتبتش النحس ده مش هيتفك ! بقالي 3 أسابيع مش عارفة أكتب أي حاجة بالعربي خالص ،كتبت شوية كدة بالإنجليزي لكن العربي مش جاي و الموضوع ده عاملي إكتئاب ،مش عارفة مالي اصلاً .أدخل ع البلوج عشان أكتب أروح كاتبة 5 سطور و طالعة و مكملهمش ، مش قادرة أعلق عند حد ! بدخل أقرا المواضيع ومش بعرف أكتب تعليقات ! و في مدونات كمان تايهة مني ..

قررت أكتب شوية النهاردة يمكن التواصل يرجع المية لمجاريها ، أنا مضغوطة جداً و الكتابة دي عايزة مزاج عالي و روقان ،أنا في أوقات ببقى قاعدة جمب الكمبيوتر بقول اللي عايزة أكتبه بصوت عالي و مش قادرة أدوس على الكي بورد من كتر التعب ! وصلت للمرحلة دي تخيلوا !

في حاجة غريبة كمان ، بقالي شهر و نص مش حاطة غير شريط واحد ف العربية ،عمرو مصطفى الجديد ، الشريط عاجبني جداً و الواد ده أصلاً احساسه عالي و بحبه من زمان ، من زمان قوي ،من قبل ما يبغني أصلاً.ده في العربية ، انما ف البيت فالملكة هي فيروز التي أشعر بنفسي فيها ،أغمض عيني في المساء و أغني "أنا لحبيبي و حبيبي الي " ،هو صحيح أنا لحبيبي و حبيبي الي ؟ مش عارفة ..نوع من التوهان الجواني على رأي الأخ سعودي !

أشرف توفيق :قريت حوارك ف وشوشة جميل أوي ،تهامي : كنت منور صباحك سكر زيادة ، حمدي:قريت موضوع المنقبات و المترو ..تحفة ، حسام : أنت ديماً مدونتك على بالي ، كاريمان :بحبك جداً ، لولا: أنا لسة بدخل عندك،عمرو فاروق : أنا جزمة بقالي كتير ما دخلتش عندك و لا عند أشرف توفيق ولا عند أحمد حشمت.كل الناس اللي بتدخل هنا ..وحشني كلكم أوي أوي :)

أنت أيها المميز ، يامن تعرف أنك أنت المميز،يامن لاتدخل الي هنا أبداً ..رغم كل شئ في الدنيا ..سيظل مكانك في قلبي دوماً كما هو ..أتذكرك و أقابلك في كل أغنية لفيروز ..

عارفين أنا نفسي ف أيه دلوقتي ؟ نفسي أروح السينما ،فيلم زي النهاردة و فيلم تاني أجنبي بتاع بريس بروسنان مش فاكرة إسمه.و آكل ساندوتش تشيكن فيليه من هارديز ، بس يكون عليه جبة زيادة و ماشروم صوص ! و عايزة كمان واحدة كوكيز و سينامون رول ..

عايزة آخد العربية و أطلع ع الساحل لوحدي،عمري ما عملتها قبل كده ، بس حاسة اني وصلت لدرجة من الجرأه ان أعمل كده..الله ع الساحل ف الشتا وهو فاضي ، بنطلون واسع مزركش فضفاض و عليه بلوزة واسعة جداً و شبشب بصباع مريح و طاقية خوص عليها زهور ..عايزة أحط ياسمينة ف بقي و أمص الرحيق اللي فيها ببقي ، دايماً بعمل كده ، طعمه بيبقى حلو مش كدة ؟ ياااااااااااااااه ، هو ده يا ريت بقى لو فيه أصداف و صخور شكلها حلو أقعد أتفرج عليهم و المهم ف جردل بلاستيك ..ونجمة بحر كمان ، نفسي أوي أشوف نجمة بحر و أصورها جمب آثار الأقدام ...

الساعة واحدة وربع و غالباً بكرة هقوم مخضوضة على صوت المنبه الساعة ستة بيصحيني من عز النوم ..سلام ، أنا قايمة أغسل سناني و أنام ، خلي نجمة البحر دي ف الخيال و بس ..مش وقتها .

باي