هو احنا ليه كده ؟!
ايوه بجد ، هو احنا ليه كده ؟ كل حاجة عندنا بنفسرها بمزاجنا، هموت و افهم ..
- ليه الناس اللي بتتكلم انجليزي لبلب و بتسمع أغاني و تشوف أفلام أجنبي يتقال عليهم ناس نضيفة؟
-ليه الناس اللي بتحب تكتب بالعربي و تسمع عربي و تعيش بالعربي يبقوا يا اما بيئة ، يا إما مش بيعرفوا انجليزي؟ آه ،هو فيه حد شاطر ف الإنجليزي يكتب بالعربي و ما يسمعش غير أغاني عربي؟
- هو احنا ليه بنفترض ان الناس اللي معاها فلوس كتير يبقوا مثقفين و دماغهم جامدة ؟و الناس اللي ساكنين في أماكن شعبية يبقوا بيئة و مش مثقفين؟
- ليه اللي بيلبس جزمة غالية يبقى ستايل و بيعرف يلبس و اللي مش بيلبس جزمة ماركة يبقى لبسه مش أد كده ؟
- هي ليه البنت المنطلقة اللي بتتكلم مع كل الناس و دمها خفيف الناس بتفتكر انها مش محترمة ؟
- و العكس بقى ، ليه الناس بيفتكروا البنت الهادية اللي مش بتتكلم كتير انها محترمة و قطة مغمضة ؟
يا جماعة فوقوا ..الدنيا عمرها ما كانت ورقة و قلم ..ممكن واحد من كتر ما زهق من الأجانب و الإنجليزي بيميل للعربي و الأغاني العربي.ممكن بنت تبقى دمها خفيف و رغاية و صوتها قد كده بس محترمة ، هي كده ربنا خلقها كده!
ممكن واحد يبقى مثقف جداً و بتاع لغات و دماغه نضيفه جداً بس مش معاه فلوس أو مش غني عشان يلبس جزمة نايكي و يشتري سيدي ب 100 جنيه.نفسي نبطل نحكم على ناس ف كا حاجة بالمظاهر و بطريقة سطحية
ما تحسبوهاش كده !!
-
هناك 13 تعليقًا:
ليه الطالبة المتفوقة دايما فاكرينها قمة في الأخلاق و المثل العليا رغم إنها كتير بتكون العكس تماما؟
ليه دايما شايفين المنقبات دماغهم مقفولة و خنيقين و البنت الكوول هي اللي ذكية و متقتحة؟
ليه بيحكموا اصلا على الناس من مظهرها
؟؟؟؟
أما موضوع إننا بنستعر نكتب باللغة العربية و اخترعنا الفرانكو أراب و السبعة تبقى ح و غيره .. أنا بجد مش فاهمة ليه وصلنا لكدا ..مانكرش إني دايما باستخدمها في الشات و كتير بكتب ملاحظاتي في الكراسات بالطريقة دي بس بجد مش عارفة ليه ؟ مش بستعر من العربي ولا حاجة ولا بشوف الي بيكتبوا عربي بيئة بالعكس بس يمكن اتعودت إن كل الي حوليا بيكتبوا كدا
انا فكرة مرة حطيت personal message بالعربي لقيت في ساعتعها واحدة قالتلي ليه الرجعية دي ماترجميها إنجلش ولا فرنسيه و لا حتى أسباني آمال بتتعلمي لغات على إيه؟
ههههه
بجد معاكي في كل حرف و نفسي ألاقي إجابة مقتعـــــــــة للأسئلة دي !
هههههههههههه
ايوة ايوة يا كاريمان الأمثلة دي جامدة
لاننا اصبحا فى زمن المظاهر
بنحكم من المظهر مش الجوهر للاسف
حكاية المظاهر دي قديمة قوي
من ساعة وجود البشرية وهي بتحكم على الانسان بالمظهر وعشان كده ظهرت أمثلة شعبية بتقول ان الحكم على المظر مش دايما صح زي المثل اللي بيقول : (( من بره هالله هالله ومن جوه يعلم الله ))
الناس كلها بتشوف اللي عنده فلوس انه مبسوط وبيتمنوا يكونوا زيه من غير حتى ما يفكروا هوه جاب الفلوس دي منين أو بيصرفها في ايه القراءن قال كده في ذكره مثال للناس دول بقوله : (( قَالَ الَّذِينَ يُرِيدُونَ الْحَيَاةَ الدُّنيَا يا ليت لنا مثل ما أوتي قارون إنه لذو حظ عظيم )) لانهم اغتروا بالمظاهر
........................
وبعدين حكاية البنات دي حكاية كبيرة قوي
أنا شايف ان الرجل والمرأة في تكليف الله لهم متساوون .. ازاي ؟
الصوت العالي والضحك بصوت عالي مش كويس الرسول نفسه كان أشد حياء من العذراء في خدرها وهو راجل !! ولم يكن ضحكه إلا تبسما !! يعني مكنش بيعمل زينا كده سواء رجالة أو ستات ، بس في فرق بين الضحك بصوت عالي والضحك اللي فيه عهر وفجر وبيرمي لحاجات مش كويسه
كأننا في كباريه.. ولا ايه ؟
أما التصرف بدون حدود الاسلام حذر منه سواء للرجل أو للمرأة
بس كلام من الأخر عمر ما شجرة التفاح تطرح حنضل ليه لأنه من جواها عايزة تبقى شجرة تفاح بمعنى ان اللي جوه الانسان بيبان على طول براه
..........
تحياتي
لإننا بقى عندنا و الحمد لله القدر الكافى من السطحية اللى نقدر بيه نحاكم الناس حكام نهائية لا تقبل النقض لمجرد أفكارنا المحدودة
شيماء الجميلة
اظن ده الحال من زمان حتي فيه من امثلتنا الشعبية بيقول عدي علي الناس معرش ولا تعدي عليهم مكرش يعني المهم المظهر
في فيلم مرجان عادل امام علشان يبان مثقف نسب لنفسه الحلزونة مع اني بحب الجزء بتاع الحلزونة ده بس برضه بيوضح موضوعك ان مش المظاهر كل حاجة
انا ممكن احوش واجازف واشتري جزمة نايكي ولا انا مش عارف هي اساسا الماركة دي بس يا تري حد هياخد باله
ضد التيار :
يا أهلاً يا أهلاً
أحمد حشمت :
أنا مش قصدي ان البنت تتصرف من غير حدود ..لكن مش تعيش طول عممرها بتمثل عشان الناس ما يقولوش عليها وحشة :)
و أنا طبعاً ضد الضحك بصوت عالى ف الشارع و ف أي حته ..أنا أقصد يعني البنت اللي مش بتتصنع الرقة و لا الصوت الواطي عشان تعجب الناس و يقولوا عليها مؤدبة
حسام
ههههههههههههههههه
دنا مرة واحدة بتقولى الواد النضيف يعني جزمة نايكي و ساعة سواتش
الكلام ده كان من أربع سنين :)
دلوقت الواد النضيف يعني ساعة هوجو بوس و جزمة كونفرس
هههههههههه
لاننا فى مجتمع جاهل و فى ثقافه اقوى من ثقافتنا دخلت علينا و اصبحت لها اليد العليا
فى وجود الجهل من الطبيعى ان الناس تحكم بالمظاهر ...ان الناس تتوقف عن التفكير
لو لنا ثقافه حقيقه و فكر و قتها لن تكون النايك هى الموضه ربما لو انصلح الحال لصارت الناس تتفاخر بباتا
ايه المصطلحات دي يا شيماء
ده علي كده انا عايش في الانفاق بقي
مهرة :)
معاكي حق والله
--------------------------------
حسام هههههههه
أحلى حاجة فيك انك مش عارف المصطلحات دي :)
nike , converse دي أسامي جزم ولا مؤاخذة
hugo boss , swatch دي ماركات ساعات
إرسال تعليق