يا ستات تعالوا نغسل عربياتنا !!

بشوفها كتير بتغسل عربيتها،مشمرة البنطلون،لابسة الشبشب،ماسكة خرطوم المية،بتدندن على أنغام المزيكا المنبعثة من كاسيت العربية .. مدام منى ،الست الشيك ،اللارج اللي ما قدرتش أمسك نفسي من أني أتكلم معاها !

مدام ،أنا بس عايزة أقول لحضرتك اني معجبة جداُ بيك و بأنك كل شوية تغسلي عربيتك وتسقي الزرع بنفسك ..ممكن أدردش مع حضرتك شوية ؟

ميرسي قوي اتفضلي..

هو أيه سر غسيل العربية ؟

(تضحك) مش عارفة ..أنا بستمتع و أنا بعمل حاجتي بنفسي عندي حاجة تقدري تعتبريها وسواس -بس وسواس ايجابي حبتين- ان محدش هيهتم بحاجتي قد ما أنا ههتم بيها،حاجتك لما يبقى أيدك فيها عمرها ما تتبهدل وعمرها يطول..أنا معودة بناتي الثلاثة على كدة يعملوا كا حاجة بإديهم.

بس حضرتك من الواضح انك ميسورة وتقدري تخلي حد يشرف على نظافة العربية و الجنينة..البوا ب مثلاً

أنا عندي بواب يابنتي،بس هو ربنا ادانا الصحة ليه! عشان نقعد نضيع وقت في الفرجة على التمثليات..دي حاجة لا عيب ولا حرام..وبعدين دي متعة..برة كل واحد بيعمل حاجته بنفسه ،مفيش الإتكالية اللي عندنا دي.

و أيه أخبار الجيران ؟

بصراحة، أنا كنت خايفة شوية في الأول يقولوا أيه الست المجنونة دي وكنت بخاف من نظرات الرجالة خصوصاً البوابين والعمال .بس لقيت الناس متقبلة الموضوع جداً لدرجة إن في بعض الستات ابتدوا يغيروا مني.

دخلت مكتبي أكمل شغلي وفضلت أسمع مزيكا وفيروز وأصالة واليسا وصوت دندنة جميلة..بعد ساعتين كاملين خرجت لقيتها لسة شغالة في العربية ،ماسكة قماشة وبمنتهى الحسوكة عمالة تلمع الكاسيت بتاع العربية زرار زرار!

التحضر ياجماعة سلوك..بجد الست دي ورتني قمة التحضر،واحدة ولاهممها رجالة ولا ستات . اللي هاممها انها تعمل حاجة صح،بتستمع بحياتها كما ينبغي و مش عايشة دور القنعرة الكذابة ..من النهاردة مش هخلي البواب ينضف لي عربيتي ،هنضف عربيتي بنفسي ...يلا يا ستات قوموا نضفوا عربياتكو .

ملحوظة:الكلام ده مش هدفه الكلام عن العربيات ومش هدفه اني اتمنظر بالماروتي العرة اللي بركبها ،الهدف منه نشتغل وخلاص ،ونعمل حاجة مفيدة في حدود البيئة اللي عندنا !