The curious case of Benjamin Button

حد فيكو شاف فيلم The curious case of Benjamin Button ؟
لو لأ ، يبقى لازم تجري على أقرب سينما ليك و تشوفه ،بجد ما تضيعش على نفسك فرصة الإستمتاع . الفيلم بيحكي عن واحد اتولد بمرض معين بيخلي شكله عجوز جداً و يفضل يكبير و هو شكله عجوز ..يكبر في السن لكن يصغر في الشكل .متخيلين ؟ متخيلين الإحساس لما تبقى بتلعب مع العيال الصغيرة و انت طفل زيهم لكن شكلك90 سنة و هو بيلعبوا معاك على انك جدو ؟..الفيلم فكرني علطول ب فيلم forever young بتاع Mil Gibson هي تيمة الزمن اياها ( على إعتبار ان السينما فيها 36 تيمة همووووووووت و أعرفهم ..)

بس و أنا بتفرج على الفيلم حسيت اني شايفاه بالملي ..بالملي و معرفتش ازاي و فضلت افكر و أفكر لحد ما افتكرت ..من 10 سنين دكتور أحمد خالد توفيق كتب الفيلم ده في اسطورة رفعت على ما أعتقد !!! بالملي والله و مش عارفة ازاي؟ ..ازاي ؟؟ واضح انه دي اسطورة ثابته أو معروفه ،بس حتى لو ،تبقى بالتشابه الفظيع ده ..أحمد خالد توفيق أستاذ ..ماوراء الطبيعة دي لو اتكتبت سينما هتبهدل الدنيا ..أهه بالدليل القاطع مش اقل من فيلم أوسكرات !

حاجات عجبتني في الفيلم :

*القصة :رغم ان التيمة معروفة و قديمة إلا أنها بتلعب عل أوتار إنسانية جداً بتخلي في صراع نفسي و اي ممثل بيعملها بيدخل في شخصير مركبة جداً.

*المكياج : مش ممكن برعة الماكيير . أيه ده ؟ده عمل كل المراحل السنية في الراجل و الست و بمهارة فائقة.فضلت أبص على شعر براد بيت لما كان أقرع ،مش لاقية حرف الباروكة أو حته الجلد اللي لابسها ..بجد ابدااااااااااااااااع مش تقلي عشوب و الصغير و الدادة دودي و مي عز الدين ..Big اتفو علينا .

قصة الحب : (بالرغم من انها خيالية لدرجة الهطل ) بس حلوة حكاية انها تفضل تعتني بيه لحد ما يرجع في اللفة .

* المشاعر الإنسانية عموماً : السن ، الحب ،الأمومة ، الأبوة و كدة

* الإخراج طبعاً ، بس ده حاجة مش جديدة على برة.

حاجات ما عجبتنيش أو ما فهمتهاش في الفيلم : ( واللي فهمها ياريت يفهمهالي)

* أنا مش فاهمة أيه علاقة الساعة في أول الفيلم و في آخره ..رمز للزمن يعني ؟

* الراجل اللي بيقول " أنا البرق ضربني سبع مرات قبل كدة " قصده أيه

* هو الواحد بيلبس حسب شكله ؟و لا حسب سنه ؟ليه لما كبر في السن و صغر في الشكل كان بيعمل سبايكي ؟هو في راجل عمره 80 سنه بيبقى ليه نفس يقف قدام المراية ويعمل شعره ؟

* اليه اللي قوى قصة الحب فجأه كدة بدون مقدمات ؟

* أيه فايدة آخر جملة في الفيلم ..لما بيقول في ناس بترقص و في ناس بتعمل زراير و في فنانين ..الخ ..ايه علاقتها برسالة الفيلم ؟

* المزيكا كانت ممكن تبقى أحلى من كدة.

* قصة الحب مش قوية للدرجة ..و مشاحب الحب مستهلكة و قديمة و تقليدية ..المركب ، الرقص ، البحر ...الخ مفيش جديد يعني !!

جمل من الفليم : ترجمة متواضعة على قدي

بنجامين : أشعر أنه كان لي حياة كاملة ،ولكنني لا أذكر منها شيئاً

دايزي : :لا عليك ، ربما من الجيد أن ننسى بعض الاشياء

--------

دايزي : بدأت الايام تمر و بدأ ينسى كيف يتكلم ، كيف يمشي ..(موسيقى) و في ربيع 2003 نظر الي و كنت أعلم أنه يعرف من أنا ..وبعدها أغمض عينيه وراح في نوم عميق....

--------

بنجامين : أريدك أن تتذكرينا فقط كما نحن الآن !

--------

أم بنجامين : عزيزي ..نحن نفقد الاشخاص لنعرف كم هم مهمين في حياتنا..

--------

دايزي : هل ستحبني عندما أصبح عجوزاً شمطاء ؟

بنجامين : وهل ستحبينني عندما تملأ وجههي البثور ،أو عندما أخاف مما تحت الفراش ، أو عندما أبلل ملابسي ؟