الاثنين، 23 نوفمبر 2009

مقالي الإسبوعي بجريدة عين

هو احنا ليه كده ؟!


بقالي فترة بحاول اتأمل في المصريين وسلوكهم وخصوصاً الشباب، وبدات ألاحظ شوية أفكار غريبة معششة في رؤوس البعض منا :

ليه الناس اللي بتتكلم انجليزي لبلب وبتسمع أغاني وتشوف أفلام أجنبي يتقال عليهم ناس نضيفة؟

ليه الناس اللي بتحب تكتب بالعربي و تسمع عربي و تعيش بالعربي يبقوا يا اما بيئة، يا إما مش بيعرفوا انجليزي؟

هو احنا ليه بنفترض ان الناس اللي معاها فلوس كتير يبقوا مثقفين و دماغهم جامدة ؟ والناس اللي ساكنين في أماكن شعبية يبقوا بيئة ومش مثقفين ؟

ليه اللي بيلبس جزمة غالية يبقى ستايل وبيعرف يلبس واللي مش بيلبس جزمة ماركة يبقى لبسه مش قد كده ، مع ان ممكن يبقى زوقه احلى ؟

هي ليه البنت المنطلقة اللي بتتكلم مع كل الناس ودمها خفيف الشباب بيقولوا عليها مش محترمة ؟

والعكس بقى، ليه الناس بيفتكروا البنت الهادية اللي مش بتتكلم كتير انها محترمة و قطة مغمضة ؟

يا جماعة فوقوا ..الدنيا عمرها ما كانت حسابات بالورقة والقلم ..ممكن واحد من كتر ما زهق من الأجانب والإنجليزي بيميل للعربي والأغاني العربي وبيحب كل حاجة في فلكلور بلده، ممكن بنت تبقى دمها خفيف ورغاية و صوتها قد كده بس تبقى انسانة محترمة وطيبة ، هي كده ربنا خلقها كده!

ممكن واحد يبقى مثقف جداً وبتاع لغات ودماغه نضيفه جداً بس مش معاه فلوس أو مش غني عشان يلبس جزمة NIKE و يشتري سي- دي ب 100 جنيه.

ياريت نبطل نحكم على الناس في كل حاجة بالمظاهر وبطريقة سطحية.


الناس عمرها ما بتتقيم كدة، ادرس اللي قدامك شوية قبل ما تحكم عليه، عاشره وأعرفه واتكلم معاه، ما تقيموش بالإنجليزي بتاعه أو بساعته أو بنضارته، خلي مواقفه الجدعة معاك هي اللي تبينلك طيبته ومعدنه .

هناك 5 تعليقات:

نـــــور يقول...

تسلمى :)

شيماء الجمال يقول...

ميرسي يا نور

غير معرف يقول...

احييكي .... افكار جميله

تحياتي

بسمه عبدالباسط يقول...

بجد موضوع راااااااااااااااائع

:))))))))

نـــــور يقول...

كل سنة وانتى طيبه ياعسوله:)

Related Posts Plugin for WordPress, Blogger...

زوار المدونة