كتبت شيماء الجمال-عين
طموحة،مرحة،مختلفة ،معتزة بلغتها العربية وثقافة بلدها وبتحاول تنشر ده من خلال تيشيرتاتها اللي بتعتبرها معرضها المتنقل ..لما سافرت البرتغال في دورة من الدورات كانت الوحيدة اللي لابسة تيشيرت مكتوب عليه بالعربي وما ساتبتش البرتغال غير لما لبّست كل الناس تيشيرتات مكتوب عليها بالعربي!
عايز تعرف عنها أكتر ؟ اقرأ الحوار ده مع فدوى عطيه رسامة التيشيرتات الاولى في مصر !
ازاي ابتديتي موضوع الرسم على التيشيرتات؟
البداية كانت لما اكتشفت انه فيه الوان بيترسم بيها على القماش وما بتطلعش بالغسيل،ساعتها جربت أرسم كتير قوي على التيشيرتات وفيه حجات كتير باظت مني ...المهم قدرت في الآخر أنجح وعملت تيشيرت حلو ولبسته ولما شافوه أصحابي عجبهم جداً وسألوني جايباه منين فقلت لهم اني أنا االلي رسمت عليه وساعتها كلهنم طلبوا مني أرسملهم ،وبدأت بالفعل أعمل للناس تيشيرتات وكنت بعملها بسعر التكلفة.
طيب وامتى تحول الموضوع لبيزنس بجد؟
نزلت النادي عندنا في اسكدنرية وفكرت ابيع التيشيرتات، لكن الناس مكنوش فاهمينها ولا مقدرين التعب اللي فيها ومحدش كان بيتعامل معاها كحاجة مميزة ومرسومة بالأيد لدرجة انهم كانوا مستكترين عليها خمسين جنيه ! فقررت أعمل ورشة للرسم أوري فيها الناس الموضوع بيتم ازاي وفعلاً عملت الورشة ورسمت على كل حاجة ممكن تتصوريها ..شنط،طرح،تيشريتات،عبايات كل حاجة. بعدها أخدت (بوث) في النادي وعرضت التيشرتات للبيع والناس اقبلت عليها وأشتروها وده كان شئ مشجع جداً ماديا ومعنوياً...كنت بفرح جداُ لما أروح النادي أشوف عشر بني آدمين لابسين التيشريتات بتاعتي في يوم واحد !
ايه التصميمات اللي ابتديتي بيها ؟
بصي..اول ما ابتديت خالص مكنش لسة عملت تصميمات خاصة بيا ، كنت غالباً بعمل شخصيات ديزني ولوني تونز لأنها كانت موضة جداً ومكنش لسة فيه توكيلات ديزني زي دلوقتي .
كنتي بتكتبي على التيشيرتات بالعربي؟
لأ،كنت بكتب بالإنجليزي بس ،موضوع العربي ده جه بالتدريج.
وايه اللي خلاكي تاخدي السكة دي؟
لما الموضوع بدأ يدخل في الجد، فكرت انه لازم يبقى عندي مبدأ ورسالة أنشرها من خلال شغلي، ففكرت انه ليه ما أنشرش اللغة العربية والثقافة المصرية والشعبية من خلال التيشيرتات؟ كل الناس بتلبس تيشيرتات وحتى لو ما لبسوش تيشيرتات ممكن يلبسوا أي حاجة تانية.حاجة كمان من الحجات اللي أثرت فيا انه مرة واحدة قريبتي جت من ايطاليا وكان معاها تيشيرت حلو جداً مكتوب عليه بالعربي وكان غالي جداً كمان .فقلت لنفسي مش عيب لما ايطاليا تعمل تيشرتمكتوب عليه بالعربي واحنا ما نعملش؟!
أي أجنبي بتشوفه بتلاقيه لابس تيشيرت مكتوب عليه بلغته ..إلا احنا ! علطول تلاقينا لابسين انجليزي ..عندنا عقدة الخواجة .
بتستخدمي دايماً أمثال وتيمات شعبية في تصاميمك ..كلمينا عن ده.
بصي ،أنا دايما بعمل الحجات اللي بحس بيها ، وأي حاجة ممكن تجيبلي فكرة .يعني مثلاً مسرحية راية وسكينة الهمتني بالتيشريت اللي مرسوم عليه ست لابسة أسود ومكتوب عليه"محدش بياكلها بالساهل" ،وفعلاً أنا مقتنعة انه محدش بياكلها بالساهل.وفيه أغنية لمنير بيقول فيها ان الحب حرية..بس انا مش مقتنعة بده ،مش مقتنعة ان الحب في بلدنا دي حرية ..عشان كدة عملت تيشيرت مكتوب عليا الحب حرية،بس كلمة الحب بالأبيض وكلمة حرية لونها أحمر غامق ومقلوبة !
متعاملتيش مع حد بيفكر انه الكتابة بالعربي على التيشريتات حاجة "بيئة" ؟
يووه..كتير بلاقي ناس بيقولولي انت ليه بتكتبي بالعربي ،ليه ما بتكتبيش بالإنجليزي ؟ فبقولهم طب وليه ما نكتبش بالعربي؟ مش انتوا مصريين ودي لغتكوا؟ بتتبروا منها ليه ؟ ما بلاش عقدة الخواجة دي !والغريب اني بقابل العقلية دي في اسكندرية أكتر من القاهرة.
كلميني عن التكنيك اللي بتتبعيه في رسم التيشيرتات؟
مبدئياً، أنا بحب أتعامل مع القطن وده بالمناسبة ليه الوان غير الوان الحرير،بعتبر كل تيشيرت لوحة مستقله بذاتها فبشده على قطعة خشب وببتدي أرسم عليه بالقلم الرصاص وأحياناً بالماركر.بعد كدة ببدا في التلوين بستخدم الألوان الفاتحة الاول وبعدين الألوان الغامقة و بفضل أعمل كذا طبقة لحد ما اللون يثبت.في الآخر خالص بعد ما الالوان تنشف بجيب قطعة قماش (فودرة) وأحطها على الرسمة وأمشي عليها بالمكواة كذا مرة لحد ما الالوان تثبت.
والألوان دي ما بتطلعش بالمية؟
لأ الالون دي مخصصة للقماش،ودايماً بنصح الناس تغسل التيشيرتات بماء بارد وعلى الايد ..بارغم من ان التيشرت اللي أنا لابساه وأنا بكلمك لسة غسلاه امبارح في الغسالة : )
أخيراً ..ازاي الناس ممكن توصلك؟
أنا عندي جروب على الفيس بوك اسمه
وده بالمناسبة اسم البراند بتاعي ..غير ان شغلي ممكن تلاقوه في جاليري
Tao
وجاليري
Les Quatre Coins
هناك تعليقان (2):
مقاله حلوه و موضوعها جديد
للامام دائما يا شيماء
مي
شكراً يا مي يا جميلة :)
إرسال تعليق