الأحد، 3 مايو 2009


شعار القناة

كتبت شيماء الجمال - جريدة عين

من الواضح أن منظر علانة وترتانة وفلانة اللاتي يتمايلن ويتراقصن على شاشات قنوات الأغاني قد استفز البعض..وصوت الشيوخ اللي عمالين يزعقوا بدون تفاهم قد استفز البعض الآخر، و من هنا كانت فكرة قناة فور شباب تي في ،أول قناة فنية –اسلامية في الوطن العربي.

اسلامية مش معناها برامج وعظ طول النهار،القناة موجهة للشباب المسلم اللي عايز يتفرج على فن جميل لا يخدش الحياء،مسلسلات،برامج،سيتكوم،أغاني وأناشيد..مفيش هناك أغاني من عينة "حط النقط على الحروف" أو "لازم يقف عشان أنا جيت"..لو ليك في السكة دي ،أنصحك تحول المحطة !

القناة بتعرض فيديو كليبات عربي وأجنبي من أمريكا والشرق الأقصى والوطن العربي وحفلات مباشرة وأفلام وبرامج ومسلسلات.و بتعرض أحدث الأغاني لمطربين وفرق أمثال : سامي يوسف،يحي حوا،عبد القادر قوزع،ناتيف دين،زين بيكا،حمزة نمرة ..ودول مطربين مشهورين بأغانيهم الهادفة.

صاحب القناة أحمد أبو هيبة-39 سنة- شايف انه مفيش قناة أغاني واحدة تقدر تتفرج عليها مع أولادك وانت مطمئن وطبعاً في الأول مكنش عنده المال الكافي لتمويل مشروع زي ده،عشان كدة عمل كليب مدته 17 دقيقة جمع فيه خلاصة الكليبات اللي بالي بالك و عرضها على مستثمرين عرب ملتزمين عشان يوريهم أنهم لو معملوش البديل القوي للقنوات دي ،الشباب هيفضل يتفرج على الكليبلت المسفة وهيزاز ادمانه ليها .طبعاً رجال الاعمال الملتزمين لما شافوا الكليبلت دي مصدقوش ان الموضوع وصل للدرجادي ..فبدأوا التمويل فوراً.

فكرة القناة هي مخاطبة الشباب بالإيقاع الجديد والستايل الجديد،ستايل ال ام تي في واللي بيسميه بعض الناس :الستايل الأنجلو سكسوني وده بيعتمد على الصورة السريعة والالوان التي تخطف العين والبروموهات والإعلانات المرحة.

المشرف على القناة هو الأستاذ على بن حمزة العمري - استاذ الفقه المقارن - الذي يرى أن فور شباب تي في هي أول قناة فنية شبابية ذات مضمون هادف ،وهي جزء من مشروع متكامل يهدف لتوعية الشباب وتعزيز ثقافتهم و هويتهم العربية.

القناة مش ضد المزيكا ولا ضد ظهورالبنات فيها ،بس ده بيتم بمعايير معينة، يعني الموسيقى ممكن تستخدم في البروموهات مثلاُ أو الإعلانات أو لو كانت موظفة صح،والبنات ممكن يظهروا طالما انهم ملتزمين بالشكل الإسلامي الصحيح.


هناك تعليقان (2):

فتاه من الصعيد يقول...

ياااااااااااااااااااه يا شيماء
اخيرا عرفت اعلق عندك....عارفه اخر مره حاولت ونجحت...علقت على موضوع فى بوست تانى
بجد النافذه اللى بتطلع بتهنج عندى....المهم الفكره رائعه قناه مميزه وهتنجح ان شاء الله لان الناس زهقت من الكلام الفاضى
دمتى بخير.....تقبلى مرورى

شيماء الجمال يقول...

:)

اهلا ً بيكي ..تنوري

Related Posts Plugin for WordPress, Blogger...

زوار المدونة