الأحد، 17 مايو، 2009

حمزة نمرة : الغناء أمل وسعادة وحرية


حوار : شيماء الجمال

احلم معايا ،ببكرة جاي ولو مجاش احنا نجيبه بنفسنا
نبدأ ،نحاول في الطريق
كتر الخطاوي ..تدلنا على حلمنا

هذه كلمات احدى أغاني حمزة نمرة بعنوان "احلم معايا" ، وهو اسم البومه الاول أيضاً . يلقبه البعض بمطرب التنمية البشرية ،أو المطرب الملتزم أو مطرب الإنسانيات ،لكنه فقط انسان حساس ومبدع يغني ما يشعر به..يؤمن أن الأغنية الراقية قادرة على تغيير ثقافة جيل بأكمله.. حول بداياته و طبيعة أغنياته كان لنا معه هذا الحوار

في البداية..عرفنا بنفسك أكتر ؟

أنا اسمي حمزة نمرة مغني وملحن ،بدأت من عمر 17 سنة من الإسكندرية واختلطت مع معظم الإتجاهات الموسيقية في الإسكندرية ،وفي نهاية 2008 أصدرت ألبومي الأول "احلم معايا " وده كان معظم أغانيه مكتوبة ومتلحنة من حوالي 10 سنين ..أغنية احلم معايا معمولة من 99 .

كلمنا عن نوعية الأغاني اللي بتغنيها ؟

أنا عموماً بغني الحاجات اللي بحسها وغيري بيحسها ،تقدري تقولي ان أغانيّ تندرج تحت بند "الإنسانيات " وهي مش الأغاني العاطفية المتعارف عليها.

طب وليه فكرت تغني السكة دي رغم ان هي ملهاش سوق قوي ؟

أنا شايف انه ده الوقت المناسب اني أبدأ بالنوع ده لأني حاسس ان الناس بقت محتاجة ده ، الناس زهقت من أغاني الحب التقليدية وعايزين حاجة تلمسهم بجد وأكيد الناس بتحس حجات تانية غير الحب اللي بين الراجل والست ..التفاؤل،الأمل ،السعادة ،الحرية .. يعني في حجات كتير مختلفة وجديدة ممكن الواحد يغنيلها.

اتعاملت في ألبومك مع شباب كتير مش معروف ..كلمنا عن التجربة دي ؟

احنا فريق عمل واحد باديين مع بعض من زمان،من أيام الدراسة ، سامح خيري هو مؤلف معظم الأغاني وبعض الشباب الآخرين من ضمنهم الدكتورة دينا ،عموماً أنا اتعرفت على الناس اللي بتعامل معاهم من منتديات الشعر العادية جداً اللي على الإنترنت واخترتهم لأني توسمت فيهم الصدق وحسيتهم.

أنا لحنت 6 أغاني من الألبوم والباقي لحنهم ملحنين شباب من اصدقائي ..عموماً الموضوع ماخرجش عني أنا وصحابي .


وايه الأغناني اللي صورتها من الالبوم ؟

صورت أغنية "احلم معايا " ودلوقتي بتتعرض على معظم القنوات الفضائية الغنائية والمفروض انه في اتجاه لتصوير أغنية تانية ،لكني لسة ما استقرتش،الشركة المنتجة هي شركة " أواكننج " اللي بتنتج لسامي يوسف ومسعود كرتيس .

دايماً بتقول ان الغناء ممكن يطور في الشخصية .. ليه شايف كدة ؟

عموماً ده مش رأيي لوحدي ، ده راي كل علماء النفس والتنمية الذاتية ان الموسيقى بشكل عام بتأثر في الوجدان البشري سواء شئنا أم أبينا . الواحد لما بييجي يسمع أغنية كان بيسمعها في طفولته بيعيش نفس الاحاسيس اللي كان بيعسشها وقت لما كان بيسمع الأغنية وبالتالي الفن عموماً بيسيب جوانا حاجة من غير ما نحس ..وده اللي بيخليني أركز قوي في كلمات الاغاني اللي بغنيها.

آخر حفلة عملتها كانت في ابريل 2008 ..انت ليه مقل كده في الحفلات ؟

معاك حق ..أنا افعلاً مقل شوية في الحفلات بس ده لأن أغانيّ ليها طابع خاص ،مش أغاني راقصة، محتاجة تركيز وتأمل فبالتالي مش هتبقى ترفيهية للناس اللي جاية تهيص..ده بيخليني أختار المناسبات والأماكن اللي بتواجد فيها ..يعني ان شاء الله هيبقى فيه حفلات في الأوبرا ويمكن ساقية الصاوي .

يعني هو ده اللي خلاك تكون متواجد في المؤتمر الصحفي لمهرجان التنمية البشرية الأول اللي هيتعمل في يوليو القادم ؟

بالظبط كده ،طبيعة المهرجان متناسبة تماماً مع اللي انا بغنيه عشان كده حسيت اني لازم أكون موجود وأغني أغاني من شأنها رفع الروح المعنوية.وان شاء الله أشارك في المهرجان في يوليو القادم.

ليست هناك تعليقات:

Related Posts Plugin for WordPress, Blogger...

زوار المدونة