الخميس، 28 مايو، 2009

محمود رضوان ..أصغر نحات صلصال في مصر





حوار :شيماء الجمال

كان طفلاً صغيراً يلعب بالصلصال ،فكبر وكبرت معه هوايته التي اصبحت كل عالمه ،يصنع بقطع الصلصال التي يلعب بها الأطفال في المدارس تحفاً فنية وتماثيل منمنمة يصل طول بعضها ل 2سم فقط كل هذا بدون أن يعلمه أحد فن النحت ..

اقرأ هذا الحوار مع أصغر نحات صلصال


عرفني بنفسك.

أنا اسمي محمود مصطفى رضوان،طالب في كلية تجارة جامعة القاهرة،الفرقة الأولى.


احكيلي ذكريات أول قطعة صلصال ؟

كان تقريباً عندي 9 سنين ، كنت أنا وأخويا أشقياء جداً فماما اشترلتنا صلصال عشان نلعب بيه ولاحظت اننا بنعرف نعمل منه أشكال كويسة ،و أحياناً كانت بتنزل بالساعات تشتري حاجات وترجع تلاقينا لسة بنلعب ومش منتبهين لاي شئ في الدنيا غير اللعب بالصلصال فإهتمت بينا وبقت تشجعنا وتشتري لنا صلصال دايماً.بعد لما كبرنا شوية اخويا حب الرسم واتجه له وأنا حبيت الصلصال وكملت فيه.


وازاي الناس عرفتك ؟

وأنا عندي تسع سنين تقريباً ،عرضت مجموعة من التماثيل في مكتبة سوزان مبارك وكان موجود وقتها دكتور يعقوب الشاروني- كاتب قصص مشهور- و قالي اني موهوب واني سابق سني،وبعد كدة اهتمت بيا مجلة سمير وعلاء الدين وكتبوا عني وبقيت صحفي ناشئ . بعد كدة توقفت لمدة أربع سنوات لأن الدعم والتشجيع اختفوا فالحماس اللي جوايا راح،لحد ما اتنقلت مدرسة تانية وعملت فيها معرض فرجع الإهتمام تاني بصورة أقوى شوية ،بعدها مجلة سمير ساعدتني أني أوصل لدكاترة من فنون جميلة وعرضت معاهم في حديقة الجزيرة.


عملت معارض رسمية ليك لوحدك؟

آه عملت معرضين واحد كان في قاعة عبد السلام الشريف بنقابة الصحفيين من حوالي سنتين، وواحد تاني كان في قاعة بيكار بنقابة الصحفيين برضه وده كان السنة دي .


وايه الفرق بين المعرضين ؟

الفرق ان المعرض التاني كان فيه اقبال كويس جداً ،ينمي مثلاً لو الأول جه فيه 350 شخص الثاني جه فيه 1500 وده فرق كبير في عدد الزوار ،غير ان المعرض التاني كان فيه اهتمام كبير من التلفزيون ووسائل الإعلام.


كلمني عن الصلصال بقى شوية .

أنا بستخدم الصلصال العادي جداً اللي بيستخدموه الاطفال في المدارس ، اسمه العلمي بلاستوسين ،وده بيتباع في المكتبات ،بجيب كذا لون وببدأ أعمل منهم الشكل اللي عايز أعمله و بالنسبه للملامح الدقيقة بستخدم لعملها خلة أسنان أو دبوس ..شئ رفيع جداً و مدبب عشان يساعدني على تشكيل الملامح. في النهاية لما التمثال بيخلص بدهنه بطبقة غراء ابيض عشان تحافظ عليه و يبقى صلب أكتر .

زمان لما كانت بتجيلي فكرة كنت بنفذها من غير تخطيط ،دلوقتي الموضوع مختلف لأني بدرس الملابس والحركة والملامح والنسب ما بينها ..الموضوع اختلف تماماً.


ليه مش بتبيع شغلك رغم اعجاب الناس بيه ؟

لأني بحس ان الشخص اللي هياخد التمثال مش هيقدر يحافظ عليه زي ما انا هحافظ عليه أو بالشكل الصحيح..أنا بحس أني ما بيني ومابين كل تمثال بعمله بتنشأ صداقة وأنه صاحبي وأكيد ببقى مقدره جداً ،فمش عارف الناس هتقدره زي ما أنا هقدره ولا لأ ؟ضيفي على كدة أننا في مجتمع طبقي فمش هعرف أحط السعر على أي أساس بحيث انه يكون مناسب لكل الطبقات.


سمعت انك هتشارك في مسلسل صلصال ،الكلام ده صحيح ؟

آه ان شاء الله ،أنا شغال فيه بالفعل ،صديقتي المذيعة انجي الكنبشاوي شافت تماثيلي في أحد معارضي وقالتلي انه فيه مسلسل صلصال جديد واني ممكن أشارك فيه وفعلاً، رحت وقابلت الناس وآديني شغال..


وازاي بتحركوا العرائس الصلصال في المسلسل؟

في المسلسلات بنعمل وجه واطراف العروسة بس بالصلصال و بيكون جواها نوع من انواع السلك المعدن اسمه "كاراكاس" والباقي بيكون عبارة عن ملابس..بعد كده بيبقى فيه شخص مسئول انه يحرك العرايس دي وحد تاني يصور كل حركة منفردة وبعدين تبقى فيلم على بعضه ..نفس فكرة الكارتون بالظبط. الخطوة اللي بعدها اضافة الأصوات والمونتاج.


نفسك تحقق ايه بالصلصال ؟

على المدى القريب نفسي جداً أنحت تمثال لأوباما وأهديهولوا لما يجي مصر! أما على المدى البعيد فنفسي أنحت كل وجوه رؤساء دوال العالم و أعرضها في معرض واحد . ده غير اني نفسي أستمر وأكبر في مسلسلات الصلصال.احنا لحد دلوقتي ما عملناش ولا فيلم سينما بالصلصال مع انه الأفلام دي محققة نجاح كبير قوي برة لأنها فيها فن عالي وتكلفتها أقل ..


حاسس ان فيه اهتمام كافي بالمواهب اللي زيك ؟

لأ طبعاً ! الناس هنا فاكرين ان الإهتمام انهم يقولولي شاطر برافو عليك ويطلعوني في التلفزيون كل شوية ،ده ممكن يحمسني ،لكن عمره ما هيعلمني ..كنت من كام يوم بتفرج على فيديو على موقع يوتيوب ،ولد عند ه12 سنة بينحت وجنبه ما لا يقل عن عشرين نحات بيوجهوه، كل واحد في سكة معينة ..عشرين واحد بيعلموا عيل صغير ..انتي متخيلة ؟

الدعم الحقيقي ان الدولة تدينا كورسات وتسفرنا بره نحضر معارض ونحضر ورش عالمية.

هناك 4 تعليقات:

فتاه من الصعيد يقول...

موهوب بجد... ما شاء الله...... وتماثيله رائعه....انتي دايما بتجيبى نماذج جميله فى موضوعاتك يا شيماء....ربنا معاكى

شق القمر يقول...

كلام جميل يا شيماء
ما شاء الله عليه بجد
وأصاب فى آخر سؤال وجهتيه له
وبشكرك كتير على حواراتك الهادفة مع ناس كتير جميلة بجد وتستحق
وأظنها المرة الاولى انى افلح فى كتابة تعليق عندك :)
تسلمى شوشو

شيماء الجمال يقول...

فتاة من الصعيد:
شكراً يا حميلة :)

شيماء الجمال يقول...

شق القمر :
ربنا يخليكي ،نفسي أوصل للناس انهم يدوروا على الكنور اللي جواهم وما يهملوهاش :×)

Related Posts Plugin for WordPress, Blogger...

زوار المدونة