الكتابة بالنسبة للبعض سبوبة ولقمة عيش وبالنسبة لناس تانية كيان وحياة،أعتقد أني أنتمي للنوع الثاني،يعني لو أدتني الف جنيه عشان أكتب حاجة أنا مش مقتنعة أو حاسة بيها مش بعرف..مهما حاولت ،مبعرف أأيف مواضيع ..أنا ليا دماغ وليا روح وماحدش هيشتريني !
كنت بتصل بأحد المجلات وبنسق معاهم المواضيع اللي هكتبهالهم ،فبقلهم الفنانين اللي عايزة أحاورهم : باسم سمرة،خالد الصاوي نصير شمة،يحيى خليل ..الخ الخ ،ألاقيهم بيقولولي ايه ؟.." لا لا لا الناس دي ما تنفعناش ،احنا عايزين رامز جلال وأحمد مكي و الناس دول "...آه ،طب شكراً ما أعطلكوش ..محسسينّي اني محتارة نقاشين أو مبيضين محارة مثلاً عشان أحاورهم !
عايزة أقول لكم ان رغم اني بكتب كتير جداً ، تقريباً يومياً ،لكن لسة ما وصلتش للمستوى اللي أنا عايزاه ،نفسي تبقى الورقة هي المتنفس اللي بقدر أعبر من خلاله عن أي فكرة في الدنيا ..فيه مليون فكرة كبيرة وصغيرة بتدور في دماغي نفسي أحطها على الورق بس لسة مش عارفة ..عايزة أنتقل من الكتابة عن المواضيع والاحداث للكتابة عن الاشياء والأفكار المجردة..،نفسي أتعلم ده قوي .
عايزة يبقى فيه ورشة بتنمي موضوع الكتابة الإبداعية وبس ،مش ترجمة ومش صحافة و مش قصة قصيرة ومقال ..فقط الكتابة من أجل الكتابة ..كما يقول الروائي محمد صلاح العزب مكان مفيهوش غير سبورة بيضاء مكتوب عليها كلمة واحدة (اللي المفروض نكتب عنها ) وترابيزات وكراسي مريحة ،ويبقى النور خافت و مع كل واحد ورقة وقلم،وياسلام لو في مزيكا تتناسب وطبيعة الموضوع اللي هنكتب عنه...نكتب عن مشاعرانسانية من نوعية : الحب ، الغيرة ،الحقد ،الكرة ..أو عن أشياء :الكرسي ،العين السحرية ، الكوب ...أو عن كائنات : الوردة ،النحلة ..كدة يعني ..
يعني لو هنكتب عن الكرسي مثلاً ، ممكن حد يتكلم عنه كرمز للسلطة،واحد يتكلم عنه كملاذ وحيد لشخص قعيد ..أنا مثلاً هتكلم عن الكرسي اللي الست بتقعد عليه كل يوم تتزوق لجوزها قبل ما يرجع ..شفتوا ازاي حتة الكرسي الاهطل ممكن يبقى موضوع ورشة كتابة ابداعية؟؟
هو أنا بخرف ؟؟مصطفى فتحي ..مساء الفل !
هناك تعليقان (2):
لا مش بتخرفى وياريت كلامك يتنفذ وهكون اول الحاضرين معاكى الورش دى
بس يتنفذ
:))
بتخرفي؟
ده انتي بتقولي فكرة عبقرية
الورشة دي لازم تتنفذ فعلا يا شيماء
وقريب قوي كمان باذن الله
وهتشاركي فيها
:)
إرسال تعليق