الأحد، 11 مايو، 2008


الوقت من ذهب ولا من نحاس؟
نفسي أعرف ليه المصريون ما بيعرفوش يحترموا الوقت و بيتعاملوا معاه على إنه مش من دهب ، لكن من نحاس أو حتى من صفيح ! من وسط 10 مواعيد تلاقى واحد مظبوط و الباقي كله مضروب،تلاقي الواحد بيكلمك الساعة 5 ونص في المهندسين و بيتفق معاك على إنه يقابلك الساعة 6 في مصر الجديدة ...طب تيجي إزاي؟!
مفيش إحتمال 1في المية إن الدنيا تكون زحمة،إن الكوبري يكون واقف لأي سبب،المهم تلاقي الشخص ده و اصلك الساعة 6 ونص ولا سبعة وهوبيتمختر ويقلك " معلش أصل الكوبري كان و اقف"، لا يا شيخ وهو من إمتى مكنش واقف !

من خلال شغلي مع الإنجليز - واله ما بتّنك – عرفت إن الوقت ده غالي أوي ولو بصيت على البلاد المتقدمة هتلاقي إن إحترام الوقت ده عندهم زي الأكل و الشرب ، لوإتأخرت 5 دقايق على معادك يقابلك الشخص وهو مكشر ولاوي بوزه وإزاي وإزاي لطعته كل الوقت ده. مرة إديت لوحدة معاد الساعة 8 لقيتها الساعة 8 و3 دقايق بتتصل "ألو...أصلك إتأخرتي فكنت بطمن إنك جاية ...ما تتأخريش على قد ما تقدري أصلي بنام الساعة 10". شفتوا الفرق؟ النوم بمعاد والخروج بمعاد، مش الوقت إلي عمال يتسرب من بين إيدينا وإحنا مش حاسين.
ولهذا يا شباب حياتنا مكعبلة و مكركبة، ننام في أي وقت، و نقوم في أي وقت،نتأخر على الشغل، ناكل في مواعيد غريبة ،ودايما دايما ما عندناش وقت نلعب رياضة و لا عندنا و قت نزور قرايبنا !
والحل ببساطة هو النظام،لأن النظام هيحللنا مشكلة الوقت ولو مشكلة الوقت إتحلت كل حاجة هتتحل، كفاية هرجلة بقى.

في شوية أفكار بسيطة جدا ً لكن هتنظم لنا الوقت أوي، أولها و أهمها هو موضوع التدوين ، طبعا ً مش قصدي التدوين على الإنترنت، ولكن قصدي تدوين كل الحجات المهمة على نتيجة كبيرة أو(تو دو ليست) وتلزقها على دولابك أو المراية الي بتبص عليها كل يوم قبل ما تنزل الصبح.وما تقوليش هعملها على الموبيل أو الكمبيوتر لأنك ممكن لأي سبب ما تبصش عليهم لكن الورقة أو النتيجة هتكون قدام عنيك.كتابة أي حاجة ممكن تفتكرها تافهة كتابة أي حاجة ممكن تفتكرها تافهة هتساعدك إنك تنظم وقتك زي :أعياد ميلاد صحابك و قرايبك (عشام تبقى عامل حسابك في اليوم و الهدية و كدة),التزاماتك المادية,الناس إلي عايز تزورها لأي سبب،الأفلام والبرامج المهمة الي عايز تتفرج عليها،الحفلات الي عايزتحضرها،مواعيد الإمتحانات و الكورسات و تسليم الأبحاث والمشاريع...وكل حاجة تانية ممكن أكون نسيتها
.ثانيا : ياريت لما سيادتكم تدوا معاد لحد حطوا لنفسكم وقت عشان تلبسوا ، تركبوا تاكسي،أو تركنوا لو عندكم عربية. والأهم من ده وده، ادوا للشارع المصري حقه ف إنه يأخركم عن أي معاد .
ثالثا ً : حاولوا تتبعوا بعض العادات الصحية في حياتكم لأنها قطعا ً بتحافظ على الوقت، ناموا في ميعاد ثابت واصحوا في ميعاد ثابت،حاولوا تنظموا أكلكم...ما تاكلوش أكل كتير يخليكوا تقال وعايزين تناموا طول الوقت و يبطئ حركتكم، جربوا تلعبوا رياضة.متهيألي ان إلتقاء التلات نقاط دول مع بعض هو مفتاح النظام و تنظيم الوقت ..
.يا ترى بعد أما قريتوا الكلام ده عرفتوا الوقت عندكم من دهب ولا من نحاس؟!

ليست هناك تعليقات:

Related Posts Plugin for WordPress, Blogger...

زوار المدونة