أيام وأيام

التنورة

مين فينا مش بيكون مبهور براقص التنورة وهو عمّال يلف ويدورمن غير ما يدوخ أو يقع؟ التنورة مش مجرد رقصة مسلية و خلاص بيشوفوها الأجانب لما يجوا مصر ، و كمان مش مجرد راجل عمال يلف على الفاضي، ولكنّها فن راقي و فلسفي ليه معاني كتيرة.
تعتمد رقصة التنورة على اللف و الدوران لأنها رقصة صوفية فكرتها إن حركة الكون بتبتدي من نقطة و تنتهي عند نقطة، و فيها الراقص – و إسمه كمان اللفيف – بيلف عكس عقارب الساعة ، زي ما المسلمين بيطوفوا حول الكعبة. و لما بيرفع اللفيف إيده اليمين فوق و ينزل الشمال تحت فهو بكدة بيشاور على السماء و الأرض ..
أما عن الأناشيد الي بيرقص عليها اللفيف فمعظمها أدعية لله ،ومدح للرسول وأولياء الله الصاحين، و بعض المواضيع الأخرى زي السلام و الحكمة و الصداقة. أما عن مهارة الإستعراض فتتمثل في الدوران المتواصل من غيرما اللفيف يحس بدوخة، و في تحريك التنانير، و اللياقة البدنية.
رقصة التنورة ليها أسامي تانية كتير منها" الرقص الصوفي" و التسمية دي ليها كذا سبب : في ناس سموها كده عشان الصوفيون هما أول ناس رقصوها، و في رأي تاني بيقول إن الراقصين اللي كانوا بيرقصوا الرقصة دي زمان كانوا بيلبسوا صوف ، أما الرأي التالت وهو أضعفهم، فهو إن كلمة صوفي مستوحاه من الكلمة اليونانية (سوفوس ) ومعناها الحكمة و بما إن الرقصة دي فيها حكمة فإتسمت الرقص الصوفي.
يعود تاريخ الرقص الصوفي إلى 700 سنة ، وكان زمان الي بيرقصها لازم يكون صوفي ، أما دلوقتي فمش لازم المؤدي يكون صوفي ، في ناس كتير بترقص التنورة دلوقتي كنوع من أنواع إحياء التراث أو حتى لكسب المال ولكن ده لا يمنع إنهم برضو فنانين.
لو حابب تشوف تنورة روح :
قلعة صلاح الدين الأيوبي كل سبت و إتنين و أربعاء ،مسرح الدراويش بجوار خان الخليلي،وكالة الغوري،هتحس إنك في عالم تاني خالص !