الأحد، 11 مايو، 2008








مهرجان الكوربة

ياه على الصدفة الحلوة ... تخيلوا إني كنت بتفرج على المهرجان من بلكونة شقة تقع أمام القصر الجمهوري وأمام المسرح مبااااااشرة ً. شفت العالم كله أمامي40 الف بني آدم ...ناس من كل حتة ... مصر،سيريلانكا ، بنجلاديش،الهند،أرمينيا،وبلاد تانية كتير.
الدنيا كلها ألوان... ألوان الناس...ألوان الملابس...ألوان الفرحة... ألوان الأرض...كله بيرقص ، كله بيهيص، كله بيغني،كله بياكل.


أحلى حاجة في المهرجان ده إن ليه هدف ورسالة ، شعار المهرجان "السلام" ،أول ما تدخل الكوربة تلاقي كلمة "السلام " مكتوبة على الأعلام بكل اللغات، حملة " كن إيجابي " تنشر صناديق القمامة في كل مكان، وتكتب على كل صندوق نوع المهملات الي هتترمي فيه، مثلا ً " هذا الصندوق مخصص للورق فقط" ، و أعتقد أن السبب هو إستخدام الورق ده بعد كده في إعادة التصنيع.وفعلا ً الناس كانت ملتزمة جدا، ًمشفتش مخلوق رمى حاجة على الأرض ولحد ما مشيت كانت الأرض بتلمع. دار الشروق كانت عاملة تخفيض 10 في المية على كل الكتب. و كانت عاملة ورش فنية زي الرسم و التلوين والسيلويت ( عبارة عن قص ولصق ورق إسود على ورقة بيضاء ،عملنا قصور مصر الجديدة) كل الأطفال والكبار إستمتعوا بالورش.


بس في وسط الفرحة إلي كنا فيها حصلت حاجة ضايقتنا قوي وخلتنا نحس بمشاعر متناقضة ، طلعت أم على المسرح في وسط الحفلة وقعدت تعيط عشان إبنها تاه منها بجد كانت لحظة مؤلمة جدا ً، كل الناس كانوا متضايقين أوي . بس بعد حوالي 4 ساعات لقوا حمزة الحمد لله و سقفنا كلنا و زغرطنا .


ساقية الصاوي كانت الراعي الرسمي للمسرح وكان مهندس محمد الصاوي موجود بنفسه وهو الي قدم فقرات الحفل.عجبتني أوي عرايس الساقية(أم كلثوم و عبد الحليم) وفرقة فلامنكا و فرق تانية كتير. بس عتابي الوحيد كان كثرة الفرق الي بتغني باللغة الإنجليزية، أنا فضلت موجودة للساعة 9 ونص ومكنش لسة في أي حد بيغني بالعربي.


بس في الآخر عايزة أقول إن المهرجان كان ناجح بكل المقاييس، وكان بجد شكلنا حلو قوي ، منظم قوي و حضاري قوي قوي .
شكرا ً لكل الناس الي تعبت عشان تخلي اليوم ده حلوكدة، شكرا ً لمحمد الصاوي، لكل الناس الي نظمت اليوم ده، لكل الجاليات الي جت تعرض فنها، لحملة كن إيجابي،للعساكر والظباط الي حمونا و قادوا الموكب، لفرق الفنون الشعبية ، للكناسين،وللراجل الي كان متشعبط على المسرح عشان يظبط الإضاءة بجد بجد كنت خايفة عليه قوي

هناك تعليق واحد:

كريم يقول...

اهو راح كرنفال الكوربة وانتهى

انتهى المهرجان بعد ماالكلاب السعرانة ولاد الصنايعية بتوع عزبة المسلمين فى ميدان الجامع عرفوا طريق الكوربة

بوظوا بافكارهم ونظرتهم القذرة تجاة البنات

بجد ياخسارة على احلى كرنفال

Related Posts Plugin for WordPress, Blogger...

زوار المدونة