الاثنين، 11 مايو 2009

"عشاق الحياة " ..مش اخوانجية ولا نصابين !


تقول سندس سيف مسئولة نشاط التصوير بالأسرة " الموضوع ابتدى لما طلعنا مرة رحلة مع أسرة واتنصب علينا ،قعدنا نفكر ليه الاسر يا اما اخوان يا أما نصابين ؟ وحبينا نعمل تيار تالت ينفع لأي حد مش عايز ينضم للأسر التقليدية ففكرنا في عشاق الحياة وسميناها كدة عشان هدفنا كان اننا نرجع الحياة لطلبة الجامعة.أنا اخترت أكون مسئولة عن قسم التصوير وسميته برة الكادر وده لأني في الأصل مصورة وبحب التصوير وفيه بنقدم للناس ثقافة حضور ومتابعة المعارض الاخرى، ده غير أننا بنعمل ورش تصوير وبننزل نصور برة في أماكن زي الحرانية مثلاً ومصر القديمة ، وفي الآخر بنعرض الصور في معرض.

أما عمرو –مسؤول عن صندوق الدنيا – فبيوافق سندس في رأيها عن أن الأسر العادية مملة وتقليدية وبيعبر عن سعادته بهذه الاسرة قائلاً

"أجمل حاجة أننا كلنا بنحب نفس الحجات ألا وهي الفنون والثقافة وكلنا عندنا خلفية عن ده. موضوع صندوق الدنيا ابتدى الاول بعرض فيلم ومناقشته وبعدين لقينا حد بيقول شعر وبعدين حد بيغني ..فقلبناه صندوق الدنيا لأنه بقى فيه فنون كتيرة وقريب انشاء الله هيبقى لصندوق الدنيا ورش زي التصوير كدة ".


محمد مجدي نور-ثالثة عمارة- هو المسؤول عن نشاط الجرافيتي وهو أحد أنشطة الأسرة اللتي لاقت تشجيع من دكاترة الجامعة : " الدكاترة انبسطوا من منظر الحيطان لما خلصت وبقوا يمولونا مادياً عشان نشتري الألوان والمواد اللازمة عشان نرسم .الموضوع ده كان من أول مشروعات الاسرة في الأول كنا بنرسم بالطباشير على الحيطان كل اسبوع لحد ما اختمرت الفكرة في دماغنا ورسمنا بالألوان على حيطان مبنى عمارة ".

هناك 6 تعليقات:

غير معرف يقول...

انت كاتبه الموضوع مرتيين ولا انا بيتهيألى
على العموم اهم حاجه فى الموضوع...ان الاسر فعلا يا اما اخوان يا اما نصابيين....ونصابين فاشلين كمان
دمتى بخير....تقبلى مرورى

الكلمة نور يقول...

يارب يقدروا يخرجوا من الجامعه وميسبوش حيطة الا لما يرسموا عليها

بسمه عبدالباسط يقول...

ياااااااااااااااااه هو لسة فيه شباب كده

فرحانة جدا بالنماذج دى

شيماء الجمال يقول...

فتاة من الصعيد..سوري مسحته :×)

شيماء الجمال يقول...

الكلمة نور :)

شيماء الجمال يقول...

بسمة ....ياااااااااه فيه كتير قوي ،بس محتاجين اللي يهتم بيهم ويسلط عليهم الدور بدل شذى وتامر حسني ...هم أولى ولا ايه ؟؟

Related Posts Plugin for WordPress, Blogger...

زوار المدونة