الأحد، 1 مارس 2009

مسابقات ..تشل !!


على قناة كايرو سينما مسابقات أقل ما يقال عنها انها شلل ! طب يعني هنتفه نتفه بذكاء ،مش الهبل و العته ده

مسابقة 1 :
عندك مشكلة في حياتك الزوجية ؟ حاسس بأنك في علاقة غير مثالية ؟ اتصل على زيرو تسعمية ،احنا نحللك كل مشاكلك الجنسية !
عايز تبقى كدة ؟ (صورة أسرة سعيدة يتناول أفرادها الغذاء بسعادة ) ، ولا عايز تبقى كدة ؟ ( صورة اتنين بيتخانقوا).اختار ..بأيدك تختار .والدكتور اللي جايبنه شكله سخيف و سمج و مش عارف يقول كلمتين على بعض.
المسابقة 2:
صورة شخصية جرافيكية :أ نا الشخص العجيب ، لو شاطر تعرفني ، ياترى انا مين ؟" ،يرتدي خوذه و سيفاً و يركب على حصان خشب لعبة .
الإختيارات : ناصر 56،الناصر صلاح الدين ، الناظر صلاح الدين ( يا شلل أمي ).

المسابقة 3 : (من الآخر)
أحدث رنات سيلين ديون الآن على 5915 ( ركز على أحدث دي ) ثم تبدأ الأغاني و تُكتب أسمائها على الشاشة:
New day has come ,I'm alive ,because you loved me !
أحدث يا ولاد النصابة ! دي أغاني بسمعها و أنا في ابتدائي..

بجد ربنا ما يحرمهم منه ! هو في ناس بتكلم المسابقات دي و تتصل ؟ مش ممكن ،مه لو الحجات دي بتكسب الوفات زي ما سمعت يبقى العيب فينا مش فيهم..


هناك 4 تعليقات:

غير معرف يقول...

خدي الشلل ده كمان ..
على قناة الحياة مسلسلات .. بيجي اعلان عن "حمل أقوى برامج المحمول" .. "برنامج المسلم،يخلي تليفونك صامت اوقات الصلاة" "برنامج Black list" .. الخ
حلو جدا
بس اللذيذ بقى في الموضوع انهم جايبين صورة للبرنامج ده لما يشتغل عالموبيل ..
مكتوب ايه بقى
"MOBILE PROGRMAES"
أنا اول ما شفت كلمة "PROGRMAES" دي جالي حالة اسبهلال .. قلت لما اشوفه تاني يمكن أنا احوليت ولّا حاجه ..شفته تاني لاقتها بردو كده "PROGRMAES".. قلت معلش يمكن ده مش انجليزي .. يمكن هندي، تركي،او اي لغه تانيه ..بس لاقيت بقيت الكلام كله مكتوب بالانجليزي .. ولحد دلوقتي كل ما يجي الاعلان اركز معاه جدا على امل اني افهم وجهة نظرهم يعني "ألتمس لأخيك العذر بردو " :D
...
طبعا ده غير الكابتن الظريف اللي بيجي على مزيكا بقاله فتره كده .. وعمو كرومبو وحلقة الفالنتين ..وغيره وغيره..

ماتركزيش يا شيماء :)
وربنا ما يحرمهم منه فعلا سواء هما او اللي بيتصلوا بيهم :D

كلام حسام يقول...

شيماء الجميلة
علشان تتفرجي علي الاعلانات دي لازم يكون جنبك جهازلقياس ضعط الدم وجهاز لقياس السكر تحسبا للظروف

شيماء الجمال يقول...

أمنية : ههههههههه
اللطيف اني اكتشفت ان الراجل بتاع مسابقة الأسرة السعيدة ده اسمه عماد بهاء ولابس بلطو ،مش عارفة ده كناية عن انه دكتور ولا سباك ولا ايه بالظبط ..مه لو كان دكتور كان كتب دكتور ..في آخر المسابقة مكتوب دكتور : جو
----
بالنسبة لكورومبو الموضوع مختلف تماماً ..بصي أنا عمري ما هكلمه أبداً في حياتي
لكن ما ينفعش أنكر الشغل اللي فيه سكريبت و جرافيكس و تسجيل صوت ..لا لا لا على الاقل ده فيه فكر و دمه خفيف :)

شيماء الجمال يقول...

حسام :
هههههههههههههههههه فعلاً

Related Posts Plugin for WordPress, Blogger...

زوار المدونة