حياتي العادية !

أصالة بتقول :

حياتي اجمل ما فيها اني بعيش ..
من غير ما افكر في حاجة ما تهمنيش
أحلى حاجة في حياتي اني بعشق حياتي
و لا يوم بأحاول افكر
في اللي فات و في اللي عاد و اللي ممكن يوم يكون
ما يهمنيش
احساس جميل إني أكون عايشة الحياة من غير هموم
عايشة في كل ثانية فيها ..
اعشق.. ادوب.. احلم.. اطير.. فوق السحااااااب
حياتي حياتي ... حياتي و انا حرة فيها
ديما بأحاول اكون اني اكون انا
بأتحدى كل الكون و املا الدنيا غنى
اهم حاجة في حياتي اني بعشق حياتي
و لا يوم بأحاول افكر
في اللي فات و في اللي عاد و اللي ممكن يوم يكون
ما يهمنيش !!

أنا متأكدة ان أصالة غنت الأغنية دي عشاني ،أيوة مهو مش معقول يعني الإنطلاق و السعادة اللي بحسها و أنا بغنيها ..الحياة حلوة بكل ما فيها بحلوها ومرها ،تفضل في النهاية حياتي رغم كل شيء ..أنت عارف ..أتفه حدث عابر في حياة حد ممكن يكون أهم مصدر للإلهام و البوصلة اللي بتحدد طريق شخص تاني .عشان كدة ما تستهونش باي حاجة تافهة تقراها هنا أو في اي حته ،يا عالِم ممكن تعمل فيك أيه !

مليش مكان تاني غير هنا أتكام فيه،أنا مش مطربة ولا تشكيلية ولا نجمة سيما ،أنا انسانة عادية أكثر من اللازم ،ست ممكن تتكعبل فيها ف أي حته ،في عربيتك وأنت سايق ، في شغلك،في وسط البلد في شبرا الخيمة او حتى في فيلا في ارقى حتة في مصر !! أنا انسانة عادية، مفيش حاجة هتفكرك بيا لما أموت غير شوية الكلام ده ..لأني ببساطة مليش حاجة تانية تفكرك بيا ..على الاقل لحد ما يبقى فيه إنجازات تذكر ..

الدنيا هنا مش معقدة ولا مكلكعة ،الدنيا أبسط مما تتخيل ..عادي ..ضحك و لعب و هزار و عياط و حب وغيرة وألم و ...و...و.....صدقني هي مش أكتر من كدة ، فمن فضلك لو ليك في الكلكعة و الجدل ووجع الدماغ ما تجيش هنا ..البتاعة دي معمولة للناس الرايقة اللي دماغها فوووووووووووووووووووق

مسا التماسي !!