مزيكا..وكريم..والسورية!!
زهقانة ..قرفانة جداً ..الساعة الآن 2 و ربع صباحاًَ ، أفتح التلفاز على قناة مزيكا فأشاهد التالي:
برنامج مسابقات و شاب "كول"يرتدي ملابس طبيب،و السؤال المعروض على الشاشة هو: "فصل بس مفيهوش تلامذة ..يبقى أيه؟" ،" ها ؟ ردوا يا شباب ..يبقى ايه؟ اتصلوا دلوقتي ،الجايزة جامدة جداً 25000 جنيه"!
تتصل فتاة من مصروتحدث المذيع باللهجة السورية و بالمناسبة المذيع إسمه كريم.
البنت-بمنتهى المياصة اللي على وجه الأرض-: كيمووو
كريم:قلبي ..ازيك؟
البنت: انت عارف أنا مين؟
كريم : وحد بس يتوه عنك ..عارفك طبعاً، أنتي فلانة..
البنت: تضحك ضحكة رقيعة..
كريم : ها ؟ عرفت إجابة السؤال؟
البنت: آه..تضحك..بس مش هقولك..تضحك
كريم : ليه بس؟ و حياتي قولي
البنت: ماشي يا كيمو..عشانك انت بس..تضحك
كريم: هه؟
البنت: فصل الشاحن..تضحك
كريم:ههههههه والله إجابة مقنعة..بس للأسف تخسري.
البنت بمياصة متناهية: لأ طبعاً مش هخسر ..طالما سمعت صوتك يبقى أكيد هكسب!!
كريم: هو انت سورية بجد ؟ ولا بتضحكي عليا؟
البنت تضحك ضحكة رقيعة جداً: ليه بس بتقول كدة؟ أنا سورية أباً عن جد.
كريم ضاحكاً: أوكى هنتكلم في الموضوع ده بعدين..
البنت:بااااي
كريم: باي يا قمر !!
و النبي أيه ده؟ بالله عليكم أيه ده؟ و بعدين هيكلمها بعدين إمتى ؟ هو ظبط خلاص و لا أيه ؟! هو الإسفاف وصل للدرجادي،إستهانة رهييبة بعقول الناس اللي بتتفرج،زي مانكون جهلة أو متخلفين،وبعدين هو كريم ده بيذيع برنامج و لا جي "يظبط" !!
هناك 9 تعليقات:
انتي غلطانة يا شيماء
بدل ما تتفرجي على مزيكا اتفرجي على قناة الجزيرة ولا العربية
علشان اعصابك بس والله
هو الانسان عبارة عن ايه غير شوية اعصاب
تحياتي
امال لو شفتي القنوات النصب اون اير
اتصل بمكالمة تكلفتها 5 جنية و تربح
10000 جني تتحل مشاكل مصر كلها بممكالمة
طبعا هجص
شوفي بقى كم واحد فقير
على الويتينج ليست؟
a.samir
هههههه وهل انت معتقد اني لو شفت الجزيرة او العربية اعصابي هتستريح..يابني انا مش ناقصة هم و تفكير و مسئولية فوق مسئوليتي..أنا بقرأ الدستور شوية،وبدخل كام مدونة خفيفة كده بيتكلموا في السياسة،ومش معنى ده انى مقضياها مزيكاو ميولدي يعني ،و البرامج دي بكرهها بس هي جت صدفة و الحلقة استفزتني فكتبت...
أنا بحب أتفرج على او تي في جدا جدا ،خفيفة كدة و بيتخليني عايشة مع البلد و بحب البرامج الوثائقية و talkshowsوعموما عموما مش بتفرج على التلفزيزن غير ساعة في اليوم..بس ممكن أقرأ حوالي 4 ساعات في اليوم :)
أهلا بيك بجد
مواطن مصري:
والمصحف الناس اللي بتتصل بالقنوات دي ناس هببببببببببببببلة الى اقصى درجة !!
القنوات الفضائية دى دليل على دماغ الشباب بقت دلوقتى كلها ايه .. ساعات بحس بلدنا بلدين .. بلد بتاعتهم كلها قنوات وبرامج من دى وبلد بتاعتنا فيها قرف وملل وناس حاطه اهداف مش عارفه توصلها
تحياتى يا شيماء
هههههههههه .. ما تعمليش في نفسك كده بس ولا تتعصبي .. قومي اطفي التليفزيون بلا حرقة دم .. عالم تافهه يخربيت كده .. معلش يابنتي ماتزعليش وما تعمليش في نفسك كده تاني وتروحي تتفرجي عليهم ..
ههههههههههههههه
مش أول مرة أدخل مدونتك
بس أول مرة أعلق
بجد الموضوع زاد عن حده فعلاً
بس على فكرة أنا لما بلاقى حاجات من دى فى التليفزيون بحرص انى أتفرج عليها
لأنى بفطس من الضحك على الحاجات دى
بحس انى بتفرج على مسرحية لعادل امام
ههههههههههههههههههه
تحياتى
عاشقة القمر مهيج الجماهير:
ههههههههههههههههه
حاجة تقرف فعلاً :)
يا بنتى اقولك انا ايه اللى بيحصل
اللى بيحصل ده اسفاف و تهريج و من الاخر ناس فاضية و دماغها كمان فاضية مش هقول اكتر من كده
و التلفزيون اصلا بقت حاجة مملة و مستفزة جدا حتى القنوات الكويسة اللى فيه
إرسال تعليق