شيماء الجمال-عين
فن" الكوميديا على الواقف" او الستاند اب كوميدي، فن ظهر مؤخراً في مصر وفيه يقوم الممثل (الكوميديان) بالوقوف أمام الجمهور وارتجال بعض القصص المضحكة والطريفة واشراك الجمهور فيها ..معتز عطالله واحد من الشباب الذين ساعدوا في انتشار هذا الفن في مصر، تلمس في شخصيته هدوءاً ونضوجاً غير عادي، لا يلبث أن يختفي حينما يصعد على المسرح ويبدأ في الحديث مع الجمهور، عن معتز وفن "الكوميديا على الواقف" كان هذا الحوار ..
معتز، طبيعة دراستك ايه ؟
أناحاصل على بكاليريوس اقتصاد وفلسفة وماجستير سياسات التعليم من جامعة هارفرد.
خليني اسألك الأول ايه الفرق بين المونولوج و Stand upال
بصي هما الإتنين قريبين من بعض جداً مع بعض الفروقات .المونولوج أقرب للعرض المسرحي وعادة بيكون فيه أغاني وموسيقى، أما الستاند أب فبالرغم من ان مادته بتكون متحضّرة، إلا انه بياخد دايماً شكل حوار أو مناقشة أو ارتجال . الستاند اب مباشر جداً بتحس فيه وكأن المؤدي طالع يدردش مع الناس ويحكيلهم تجاربه أو حاجات واقعية من المجتمع. في ناس عرفوا يعلموا دمج بين الإتنين : بيطلعوا الأول على المسرح يقدموا فقرة وبعدين يتكلموا مع الناس، وممكن يدخّلوا آلات موسيقية .. ومن أشهر اللي عملوا الدمج ده واحد اسمه ليني بوث.
لكن احنا أول مرة نسمع عن الفن ده كان قريب قوي ..هو امتى دخل مصر وبدأ ينتشر بين الشباب ؟
في أوئل 2007 كان فيه عروض كوميدية اتعملت ،على ما اتذكر كانت في الجامعة الكندية، وكان من الشباب دول جورج عزمي اللي كمل في المجال واتعرف فيه . في مرة كمان من سنتين أو تلاتة اتعمل عرض في الساقية اسمه
Allah made me funny
Axis of Evil
Arabs gone wild
Egypt’s first comedy rumble
وده كان العرض الأخير في قاعة المؤتمرات ،اتعمل من حوالي شهر وشارك فيه كذا كوميديان عربي، زي أحمد أحمد وماز جبراني وأكرم حسني وشريف عزب وأنا .
امتى ابتدى اهتمامك بالفن ده ؟
من صغري بحب الكوميديا وبتابعها وبحب التمثيل بشكل عام، ومن زمان كنت أقعد أحكي لأصحابي حجات بتضحكهم، عمري ما فكرت اني ف يوم من الأيام ممكن أقف على مسرح أمام جمهور وأؤدي، لحد ما أصدقائي قالولي ان عندي الموهبة دي واني ممكن أضحك الناس واللي شجعني أكتر على ده جورج عزمي .
احكيلي احساس أول مرة تقف أمام جمهور ؟
أنا بعتبر نفسي محظوظ ان أول تجربة ليا كانت ناجحة الحمد لله، المادة اللي كنت محضرها عجبت الناس وتفاعلوا معها ،بمجرد ما قلت أول كام حاجة حسيت اني مرتاح وان الكلام بيطلع مني لوحده وده في حد ذاته اداني ثقة في نفسي .احساس من أجمل الأحاسيس انك تقف تتكلم أمام 1000 واحد وتلاقيهم بيضحكوا ومبسوطين معاك .
شغلك في تطوير التعليم شغل جاد جداً ومفيهوش هزار، ازاي بتعمل حاجة بتتطلب تدريب وهدوء أعصاب ودماغ رايقة ..ازاي بتقدر تحقق التوازن ده وتبقى مخلص للمجالين؟
بصي ،أنا لسة ما عنديش الكاريير الكوميدي اللي يحتاج وقت طويل في التدريب والتجهيز، أنا باخد حوالي ساعتين في كتابة العرض وشوية تدريب بسيط على الأفكار وبروح نصف ساعة قبل العرض، فلسة ما وصلتش ان الموضوع يبقى واخد كل وقتي وتركيزي .
ازاي بتحضر الكلام اللي بتقوله ؟ وبتعرف منين مدى تأثيره على المتلقي ؟
عموماً بيبقى معايا نوتة صغيرة بشيلها دايماً في جيبي، وكل لما بقابل موقف مضحك أو حكاية ظريفة بكتبها فيها، وبعدين بقعد مع أصحابي وببتدي أحكيلهم المواقف دي وباخد بالي من الحجات اللي ضحكتهم أكتر من غيرها، وعادة بتكون دي الحجات اللي بختارها، ولما بروح بقعد أكتب اللي اتقال بطريقة تلائم المسرح وأرتب هقول أيه قبل ايه وازاي هربط الفكرة دي بفكرة تانية.
معتز ...ايه اللي بيضحك الناس؟!
أنا بحس ان الحجات اللي بتضحك الناس واحدة ! المواقف الشخصية الطريفة اللي ممكن أي حد فينا يتعرض ليها، احساسك وانت محتاس، وانت واقف قدام عيل صغير عمال يتبلطج عليك وانت راجل كبير ومش عارف تجاريه، الشخصيات الكوميدية اللي ليها طباع بتضحك كلنا عارفيها ..كدة يعني .
بتتكلم انجليزي بطلاقة بحكم دراستك وشغلك ..ما فكرتش تؤدي باللغة دي عشان توصل للعالمية زي ما عمل أحمد أحمد مثلاً أو ماز جبراني؟
أنا وقفت واتكلمت كتير قدام أجانب وجربت في محيط ضيق اني أعمل شو باللغة الإنجليزية ولقيت ان الموضوع ظريف، واني عندي القدرة على اني أوصل المعاني وأضحّك بالإنجليزي كمان، بس لسة ما عملتش عرض كامل باللإنجليزي.
اتعرض عليك انك تمثل سيتكوم أو تعمل برامج كوميدية؟
آه اتعرض، بس أنا لسة حاسس أني محتاج أركز أكتر في الستاند -اب
واتعلم فيه حجات أكتر، بعد كدة ممكن أدي لنفسي الفرصة اني اجرب واتعلم أنواع
تانية من الكوميديا.
----------------------
خارج النص : يمكنكم حضور هذا العرض للستاند - أب بساقية الصاوي، اضغط على الصورة للتفاصيل
ليست هناك تعليقات:
إرسال تعليق