السبت، 8 أغسطس 2009

مقال للجماعة الحبيبة: عن جوليو وروميت



شيماء الجمال- مارينا رايح جاي

تعرف روميو وجولييت؟ أكيد آه، ومين ما يعرفهمش..طب عمرك فكرت في المكان اللي كانوا عايشين فيه؟..أنا فكرت ودورت ولقيته، عشان كدة غمض عنيك وانسى 2009 بزحمتها وقرفها وتعالى نسافر هناك في ايطاليا ونشوف..

عمك شكسبير كان راجل مأساوي جداً وكان بيحب النكد زي عنيه فكانت كل مسرحياته دراما ومآسي، ومن أجمد القصص المأساوية اللي كتبها شكسبير قصة روميو وجولييت اللي بتحكي عن ولد وبنت كانواعايشين في بلد اسمها فيرونا في ايطاليا، وكان فيه صراع كبيرما بين عيلتهم، وفي مرة راح روميو لحفلة تنكرية كانت معمولة في بيت جولييت وهناك شافها وحبها من النظرة الأولى ونسيوا كل الخلافات اللي بين عيلتهم واتجوزوا في السر، لكن حصلت حجات درامية خلّت روميو يقتل ابن عم جولييت ويتنفى برة فيرونا وساعتها في واحد اقنع جولييت انها تمثل انها ميته أو انها انتحرت عشان تتجوز روميو كوسيلة ضغط، لكن روميو بيرجع وبيفتكرها انتحرت بجد فبينتحر ..طبعاً بتفوق جولييت من المنوم اللي خدته فبتلاقي روميو مات و تنتحر وراه وتوتة توتة خصلت أكئب حدوتة حب في تاريخ البشرية، دحنا لحد دلوقتي بنقول للشخص اللي بيحب على روحه " انتى يابني انت فاكر نفسك روميو ولا ايه " ؟

المهم..نرجع لموضوعنا ولقصر جولييت اللي بقى دلوقتي مزار للعشاق، يروحوه ويحبوا ف بعض ويرسموا قلوب ويكتبوا "أحمد ومنى على حيطانه".

أول حاجة هتشوفها وانت داخل البيت من برة لوحة بتمثل مصرع روميو وجولييت وواحدة تانية بتظهر وداع روميو لجولييت. ده غير الهدوم بتاعتهم. ولما تدخل جوة القصر هتلاقي تمثال كبير لشكسبير وكمان سرير جولييت وعلى يمين السرير البلكونة المشهورة اللي كان بيقف فيها روميو يسبل لجولييت.(افكتر محمد سعد في اللي بالي بالك)

أما البيت من جوة فهو بيت أرستقراطي من القرن ال14 وتحت التراس تمثال كبير لجولييت معمول من البرونز والتمثال ده في ناس كتير جداً بتحب تتصور جنبه.


الحاجة المميزة اللي هتلاحظها لو شفتوا القصر ده -واللي غيرت شكله تماما-ً مئات بل آلاف من جمل الحب اللي مكتوبة على الحيطة وده يبينلك ان حكاية القلب أبو سهم مكتوب على أوله أحمد وعلى آخره اعتماد دي مش عندنا احنا بس، دي موجودة في القصر ده بالهبل ! واللي بيتريقوا على المصريين وبيقولوا عليهم بيبهدلوا الآثار وكلام الإنشا اللي بيتكتب في الجرايد ده، يجيوا يشوفوا كمية اللبان المتلزقة على الحيطان كلها!


اللطيف في الأمر بقى ان الناس برة عاملين نادي روميو وجولييت(مش احنا بس اللي تافهين يعني) مؤسس النادي راجل كبّارة عنده واحد وسبعين سنة وهو اللي بيستلم كل رسائل المحبين والعشاق وبيرد عليها على انه جولييت وأنا بصراحة مش عارفة هل هما عايشين في الوهم والسحر ومصدقين انها جولييت ولا بيشتغلوا نفسهم ولا ايه بالظبط؟ النادي انشئ سنة 1975 وبيشتغل فيه 12 سكرتيرة بيردوا فيه على رسائل العشاق بأي لغة حتى لو كانت اللغة اليابانية..لدرجة اني فكرت ابعت لنادي جولييت قصة حبي المعذبة وأشوف هيردوا عليها ازاي.. بس رجعت كبرت وقلت يا بت فكك!

المسؤولين عن النادي عاملين جايزة وبيقدموها –طبعاً- في عيد الحب لأفضل رسالة غرام يستلموها! والجايزة اسمها" الجائزة الأدبية الأولى لكتابة رسائل الغرام" وبتتوزع في احتفال اسطوري ..خد عندك بقى، ما هي الناس هناك ماعندهمش أزمة رغيف العيش فقاعدين يتسابقوا مين هيحب أكتر..احنا عندنا الراجل لو قال للمدام "صباح الخير" يبقى فل أوي!

وده نموذج من الرسائل اللي كانت في موقع النادي

www.julietclub.com

" * حبيبتي جولييت، اليلة اللي فاتت حلمت بالحب جامد، وفي الحلم عرفت ان هو ده الحب، المكان كان كول كدة والنسيم كان بيطس فقفايا، أما روحك اللي كانت بتهفهف في المكان حواليا،حسستني أن أنا مهطل في حبك، وفجأة فقت وصحيت من النوم على قفا رزعتهولي امي فعرفت اني بحلم اهئ اهئ.الحب يا حياتي هوذكرياتنا الوحيدة، على الأقل بالنسبالك . أصل انا حبيت عشروميت الف مرة قبلك، لكن انت اللي في القلب يا قطة ".

---
*تريقة على أحد نصوص روميو لجولييت

فكرة المقال مستوحاة من مقال قرأته في مجلة المرأة اليوم

هناك تعليقان (2):

فتاه من الصعيد يقول...

ههههههههه

الحب بهدله بصحيح

ناس رايقه يا بنتي

الحب رفاهيه لا نقوى على تحمل ثمنها

شيماء الجمال يقول...

فتاة ..صح :)

منورة

Related Posts Plugin for WordPress, Blogger...

زوار المدونة