مابحبش نجيب محفوظ !!

سؤال بسأله لنقسي كل يوم ونفسي أعرفله اجابة..هو أنا جبانة؟ ولا بحب أمشي جنب الحيط؟ ولا بخاف على مشاعر الناس ولا ايه بالظبط؟ هل بخاف يبقى شكلي وحش لو عملت الحاجة الفلانية دي فمبعملهاش؟؟
ليه بنخاف نقول؟ ليه دايماً بنفكر الناس هيقولوا علينا ايه؟ ليه بنفكر دايماً اننا ممكن نفشل في الحاجة دي ويبقى شكلنا "أهبل " قدام الناس ؟

نفسي احساس الخوف ده يخلص..نفسي اقول بالفم المليان كدة أنا ما بحبش كتابات بهاء طاهر ..عادي كدة، من غير ما أقعد أفكر طب لو قرأ الكلام ده هيزعل ولا لأ؟ طب لو حد من معجبينه قرأ الكلام ده هيهزأني ولا لأ؟ نفسي أقول بالفم المليان لكل المثقفين اني كل أما أمسك حاجة لنجيب محفوظ ما بعرفش أقرا فيها ولا حتى 10 صفحات لأن عمره ما كتب حاجة شدتني أو أثرت فيا ..نفسي أقول ده من غير ما أخاف يتقال عليا جاهلة أو تافهة أو "انت ايش فهمك انت "..نفسي أقول ان بالنسبالي شخصياً كشيماء رضا الجمال عمر طاهر أهم من محفوظ..لأن عمر أجبرني أقرا انما محفوظ ما عرفش !

عايزة أقول أني ما بفهمش في السياسة خالص واني عمري ف حياتي ما شفت نشرة أخبار..ولو حد سأني مين وزير الخارجية مثلاً وحياة ربنا ما هعرف ودي مش مبالغة دي حقيقة. عايزة أقول اني لما شفت كابتن نادر السيد في روتانا كافيه قولتلهم مين ده؟ بصولي كلهم بصة غريبة ..عادي يا جماعة أنا جاهلة في الرياضة وفي السياسة وفي الإقتصاد ..انما شاطرة في التسويق وبفهم في المزيكا وفي الفنون البصرية والأدائية مثلاً..ما بدخلش على يلا كورة بس بدخل على "فيستيفالز.كوم" .. ما بشتريش جورنال الأهرام بس بشتري مجلة "مجاز" و "كوميونيتي تايمز"..مين يعرف مجلة مجاز وبيتابعها؟ مهو البني آدم ما ينفعش يبقى كل حاجة ويبقى شاطر في كل حاجة..

اتعلمت مؤخراً أن أحب نفسي كما هي ..وأن أكون فخورة بنفسي مهما حصل ..في احد الإذاعات سألني صاحب الإذاعة " هي ثورة يوليو كانت سنة كام" ..قولتله ما أعرفش مليش في السياسية ..قاللي بس ده تاريخ..قلت له لا يستهويني تاريخ مصر الحديث ..لكن ممكن أكلمك ساعة عن ترانيم اخناتون لآمون أو عن أسطورة سيزيف أ و عن بورتريهات الفيوم أو عن الفودوو أو عن حضارة الإنكا..بصلي بصة غريبة جداً فيما معناه "ربنا يشفي". أنا مش جاهلة للدرجادي ..أنا قريت عن ثورة يوليو كذا مرة أو على الأقل درستها في المدرسة ..لكن صدقوني مالا نحبه ننساه وما نحبه نتذكرة دائماً.

.. سأغني لكم أغنية " ها نحن ذا على دروب كنزنا، نسير معاً و آمالنا تسير قبلنا، من غيرنا يقطع يوماً مثلنا، درباً خطيرة الي الجزيرة من غيرنا، جزيرة عجيبة وكنزنا فيها..دروبها غريبة، من غيرنا، لا نهاب المخاطر مع انها كثيرة، لكننا معاً وكنزنا فالجزييييييييييرة"..دي أغنية التتر فيلم كارتون كنت بشوفه وأنا في خامسة ابتدائي..متهيألي كدة فهمتوني، أنا لسة فاكراها كلها وفاكرة لحنها كمان ..الإهتمام..مخك عايز يشيل ايه ويطرد ايه، مخي طرد ثورة 23 يوليو و احتفظ بجزيرة الكنز ..هل معنى كده اني مش مثقفة بقى ؟ حتى لو قولتوا آه
أنا مبسوطة كدة..

مش مهم يقولوا انك مثقف ..المهم تكون سعيد..لو كانت سعادتك ورضاك عن نفسك في انك تكون جاهل ..خليك
جاهل ..انت الفيصل في النهاية مش هم ..

وأعترف أنا بكامل قوايا العقلية ..ما بحبش نجيب محفوظ !