شيماء الجمال- مجلة صيف بوك
عمرك فكرت انك تعمل فرحك ع البحر؟ هي فكرة تبان مجنونة والإقتراح ممكن يعتبره بعض الناس هبل، بس تعالوا نفكر بعقل ..بنصرف كام في أفراح القاعات؟ و بنقعد نبتكر ونفكر ونعمل 100 فكيرة وفي الآخر الموضوع بيطلع هو هو، نسخة مكررة من الدي جي والأغاني العربي المعروفة والفستان المجرجر اللي مليان خرز والماظات ! فكرة انك تعمل فرحك على البحر دي فكرة مفتكسة وجديدة وابتدت برة تتنفذ بكثرة وأثبتت جمالها تعالوا نقرا سوا ازاي ممكن ننفذ الفرح بالشكل ده.
أولاً بالنسبة للمكان اللي هيتعمل فيه الفرح: لازم يكون مفتوح وفيه بحر ومية وعشان تتجنب مشكلة الجو الحار ممكن تختار وقت يكون قبل الغروب – على الساعة 6 مثلاً – بحيث الصور تكون قبل الغروب والإحتفال نفسه يبقى بليل، على سبيل ترطيب الجو، ممكن تأجروا مروحتين من الكبار جداً اللي بيستخدموا في الكافيهات ودول بيعملوا نسمة لطيفة في الجو.حاول تختار قرية سياحية ما تكنش زحمة وتخليهم يقفلولكم الجزء اللي هتعملوا فيه الفرح مقابل مبلغ من المال تتفقوا عليه، يا سلام بقى لو تقضوا ليلة الدخلة في شاليه أو فيلا شيك من فلل القرية.
نيجي بعد كدة لموضوع الأكل والشرب وده موضوع مهم- حيث أننا مصريين ولازم نتكلم عن الأكل قبل أي حاجة – البحر يحب الشوي، وانتو جمب البحر والمدن الساحلية كلها فيا سلام لو سمك وجمبري مشوي أو اي سي فود يبقى تمام . وممكن كمان حجات خفيفة زي الكانابيهات والسلطات أما المشروبات فمن المستحب انها تبقى عصاير طبيعية وتقدروا كل ده يتم في مطبخ القرية بالإتفاق مع القرية .
بدلة وفستان الفرح أكيد هيبقى فيهم اختلاف عن بدل وفساتين الافراح اللي بتتعمل في قاعات، يفضل بدلة العريس تكون فاتحة ومن خامة طرية زي القطن أو الكتان وتكون الجزمة خفيفة ومن غير شراب طبعاً ..خليك سبور يا عريس ! أما العروسة فيفضل انها تلبس فستان قصير أو فوق الكعب، يا اما مش هتبقى براحتها ولازم تلبس في رجليها صندل أو حذاء بدون كعب. المكياج ياريت يميل للألوان الطبيعية زي الأخضر والأزرق بدرجاته لأن ده هيطلع العروسة حلوة جداً في الصور اللي هتبقى خلفيتها مية وسما وممكن، وصيفات العروسة يلبسوا فساتين أو اكسسوارات زرقاء أو بلون البحر الفيروزي.
دعوات الفرح بقى والسوفونيرز هي اللي ممكن يبقى فيها شغل جامد جداً، الدعاوي ممكن تبقى كلها مستوحاه من البحر : دعاوي لونها أزرق أو لبني مثلاً وملزوق عليها أصداف أو رمل أو نجمة البحر ودي عادة بتبقى معمولة هاند ميد وبيبقى شكلها جميل جداً و ممكن كمان تبقى فكرة
Message in a bottle
ودي عبارة عن زجاجة فيها رمل وجواها الدعوة على هيئة رسالة ملفوفة و الزجاجة بتتقفل بفلة من فوق ويمكن تزيينها بالرافية أو القش. السوفونيرز ممكن تكون شموع أو سبت خوص فيها صابون ونجوم البحر أو اي حاجة مستوحاة من جو البحر.
نيجي بقى للمزيكا، لو عايزين تعملوا زفة بآلات موسيقية اختاروا آلات تكون ليها علاقة بمود البحر والمية زي الجيتارات والفلوت والكمنجات، فكرة الزفة الدمياطي هتبقى فاكسة جداً ع البحر وملهاش طعم، شغلوا مزيكا صالصا وجاز ومزيكا لاتيني ونصيحة مني شريط عمرو دياب الجديد لأنه ماشي جداً مع الصيف وهيرقصكوا آخر حاجة.
فيه مكان رائع اسمه كاسل زمان، اتعمل فيه افراح حلوة جداً قبل كدة، كاسل زمان هي قلعة في قلب البحر والرمال، ترتفع 35 متر عن مستوى سطح البحر وهي مشهورة بمناظرها الخلابة وهدوءها وجودة الطعام المقدم فيها. وليهم موقع على الإنترنت تقدر تتعرف أكتر عليه وهو
أنا مش عارفة في نهاية قراءتك للمقال ده هل ممكن تفكر تستغنى عن فكرة الفرح التقليدي وتعمل فرحك على البحر ؟ قولولي ايه اللي عاجبكم في الفكرة دي وايه اللي مش عاجبكم وابعتولي ردودكم وآرائكم على :
هناك تعليق واحد:
والله ممكن نعمله ع البحر وليه لأ؟؟؟
بس مش لما ننوي نعمل فرح الأول!!!
إرسال تعليق