الجمعة، 17 يوليو، 2009

اشربها ف كنكة ....ع الاصل دور !

شيماء الجمال، صيف بوك

أكيد طبعاً عمرك ما قعدت تبص للكنكة وتفكر يا ترى الكنكة ليه شكلها كدة؟ ليه شكلها مثلاُ مش زي الحلة، أو الطاسة ؟ ليه قاعدتها واسعة وبتضيق كلما اتجهنا نحو الفوهة ؟


مكتشف المشروب صوفي

عموماً قبل ما نتكلم على الكنكة تعلوا نحكي حكاية البن والقهوة .. نبات البن أصلاً اللي اكتشف انه ممكن يتشرب واحد صوفي اسمه ابو بكر ابن عبد الله العيدروس أثناء تجوله وتعبده، لقى بعض البذور واقعة من شجرة وكان جعان فقعد ياكل منها، المهم انه بعد شوية احس بنشاط غريب وقدرة على السهر والعبادة، ولما كان بيغلي مية في أحد الأيام، وقع فيها بعض من هذه البذور فلقى ان المشروب طعمه جميل فقال لأصحابه عليه وأصحابه نشروا المشروب في الحجاز واليمن ومصر.

أنواع القهوة :

بنروح الكافيه ونفتح المنيو عشان نطلب قهوة، بنلاقي عشرين نوع قهوة مختلف وأحياناً ما بنبقاش عارفين الفرق بين كل نوع ..ده عرض لأهم أنواع القهوة المعروفة :

القهوة الأمريكية

الأمريكيون هم اللي اخترعوا القهوة دي، وهي سريعة الذوبان، وأكبر مثال لها النسكافيه وبتتقدم في "ماج".

القهوة العربية

قهوة خفيفة توضع فيها حبات الهال عند بعض أهل الصحراء والحضر من العرب .(مشهورة في الخليج)

القهوة التركية

هي قهوة ثقيلة غامقة، تقدم في فنجان صغير بيد مع طبق صغير، وتعتبر فناجين القهوة التركية

الأكثر شهرة واستخداما وتتميز بزخرفتها، كما يقدم معها السكر بدرجات متفاوتة حسب الرغبة.

اسبرسو

قهوة إيطالية خفيفة وغامقة جداً، تقدم في فنجان صغير يشبه الفنجان التركي.

الكابوتشينو

قهوة إيطالية تتألف من الاسبرسو بمقدار الثلث وثلث حليب وثلث كريمة مخفوقة، وتقدم في أكواب كبيرة، وتكون الكريمة المخفوقة مرتفعة على الوجه ويرش عليها بودرة الكاكاو، ويقدم معها السكر.

الموكا

قهوة رائعة من اليد الفرنسية أو الإيطالية، تتألف من القهوة السادة الثقيلة بمقدار الثلث، وثلث من الشوكولاته الحارة غير المحلاة، وثلث من الحليب الفوار إلى درجة إخراج رغوة، وتقدم بكوب كبير.

قهوة الحليب Café au Lait:

قهوة فرنسية وإن كانت كل دول العالم تعملها بتسميات مختلفة، وهي عبارة عن مقدارين من القهوة السادة مع ثلاث مقادير من الحليب المخفوق، وتقدم في فنجان كبير.

القهوة الايرلندية

وهي قهوة ثقيلة تخلط مع الكريمة المخفوقة وويسكي وتقدم مع السكر وطبعاً ده طبيعي اذا عرفنا ان ايرلندا من اكثر دول العالم استهلاكاً للخمور.

القهوة المثلجة

في ناس بتقول بأن القهوة المثلجة أمريكية، ويقول الأمريكيون نفسهم بأن أصلها عربي! وهي قهوة ثقيلة باردة مع حليب بارد وسكر.


أصل الكنكة !

وطالما اتكلمنا عن البن والقهوة يبقى لازم نتكلم عن الكنكة بصفتها حاجة مرتبطة جداً بالقهوة . الكنكة كان اسمها بلغة أيام زمان "تنكة" و هي تصميم عثماني –صدق أو لا تصدق – مستوحى من راقص التنورة وهو يدور بتنورته عشان كدة الكنكة بتاخد الشكل ده، وتمثل فوهة الكنكة خصر الراقص !

ايام العز كانت الكنكة بتصنع من الذهب الخالص حتى في القهاوي الشعبية وهي اللي ساعدت على انتشار القهوةالتركية لانها أساسأً بتتعمل فيها، فوهة الكنكة الضيقة هي اللي بتكون "الوش " على القهوة نفسها .. جرب تعمل قهوة تركي في أي حاجة غير الكنكة وأراهنك لو عرفت تطلع لها وش !

الكنكة قديماً – ايام العز برضه - كانت بتصنع من 4 أجزاء من النحاس الأصفر وهم القاعدة (دائرية الشكل) وجسم الكنكة نفسه والفوهة الضيقة أعلى الكنكة وأخيراً ايد الكنكة اللي ممكن تتعمل من النحاس وتتلحم أو من الخشب. آخر مرحلة في الصناعة هي تبييض داخل الكنكة وده كان بيتم بماده القصدير فبتاخد لون الفضة من الداخل أما من الخارج فكان يكتفي بتلميع النحاس.

الكنك زمان كان بيتعمل في اسطانبول وكان بيتكتب عليه عبارات وامثلة وأسماء وكان يزخرف بأشكال اللزهور والنباتات ..يعني من الآخر كانت كل كنكة تحفة مستقة بذاتها مش بعيد لو شفت الكنك بتاع زمان تعمل له ركن ديكور في بيتك ..ممكن تلاقي نموذج من الكنك ده في خان الخليلي وان كان طبعاً مش بنفس الجودة.

دلوقتي وبعد ارتفاع سحر النحاس أصبح الكنك يصنع من الألمونيوم ، وأيد الكنكة بلاستيك ( من اللي بتطقطق لما النار تبقى عالية شوية) ،وأختفت الرسومات والنقوشات والفن ..من الآخر بقت الكنكة حتة حديدة بنغلي فيها القهوة وخلاص !

والكنكة ليها أحجام مختلفة من أول اللي بتكفي فنجان واحد لحد اللي بتشيل 10 فناجبن ، وبالنسبة للقهوة التركي تكمن مهارة الصانع في أنه يصب كل القهوة في الفناجين وتطلع كلها بوش، والإختبار الصعب ده بيتعمل لإتنين في مصر :القهوجية لما يتقدموا لصاحب القهوة طمعاً في الحصول على وظيفة قهوجي والعرايس لما تزورهم حماتهم أول مرة في بيت الأهل عشان تطلب أيد البنت.

وعشان القهوة تطلع بوش لازم الكنكة تميل بإتجاه الكوب والكوب كمان يميل شويه بإتجاه الكنكة ويتم صب القهوة ببطء شديد ..اتبع التعليمات تحصل على أحلى "وش" .

خارج النص: شكراً ويكيبيديا !!

ليست هناك تعليقات:

Related Posts Plugin for WordPress, Blogger...

زوار المدونة