الجمعة، 24 يوليو، 2009

من هي المزة اللي بجد؟!


شيماء الجمال - مجلة مارينا رايح جاي


اكيد انت كشاب مصري معاصر لما بتشوف بنت امورة كدة وعاجباك بتقول عليها مزة جامدة، لكن المزة بالنسبالك ممكن ما تبقاش مزة بالنسبة لغيرك، يعني ممكن تبقى نفس البنت وانت شايفها قمرة منورة وصاحبك شايفها حيزبون كبير..عشان كدة عايزة اقولك انه تعريف مصطلح المزة ده بيختلف من شاب لشاب ومن بلد لبلد .


يعني مثلاً في مصر المزز بتنقسم لنوعين النوع الأول البنت البلونداية اللي عنيها ملونة وشعرها فاتح وشكلها زي الأجانب والنوع التاني هو البنت المصرية القمحية المتكحلة اللي شعرها اسود وسايح ونايح على خلقتها ..دي المزز الاساسية، لكن طبعاً لو دخلت على القبائل والصعيد هتلاقي تعريف اوسع للجمال والمزمزة.


تعالي نروح على حتت تانية في قارة افريقيا غير مصر، خد عندك قبيلة في اثيوبا اسمها قبيلة المورسي، جمال الستات فيها انهم يخرموا شفايفهم التحتانية ويحطوا فيها طبق فخار وكل ما تكبر البنت الطبق يكبرلدرجة انه ممكن يوصل قطر الطبق المدور ل 20 سم !وكل ما طبق الست اللي في بقها يكبر كل ما تتعاكس ويتقال عليها مزة مزز القبيلة وتلاقي العرسان على بابها زي الرز، وعشان المزة اللي من المرسي تبقى احلى واحلى بتلطخ وشها كله بألوان بيضا عشان تعمل "كونتراست" مع لون بشرتها الأسود.


وفيه قبيلة تانية برضه اسمها الهانتون وده الجمال عندهم ان الست تبقى ولامؤاخدة "حولة" عشان كده بيعملوا للبنت وهي صغيرة ميت ضفيرة قدام وشها عشان تقعد تتخايل بيها فتحوّل وطبعاً كل ماكانت حولة كل ما كانت احلى.


افريقيا دي غلبت كل الدول في الحجات اللي بيعملوها،لدرجة انه في قبيلة تانية الستات فيها عقبال أمالتك بيحلقوا راسهم بالموس وكل ما راسهعم تنبت يروحوا يحلقوها تاني ..البنت الحلوة عندهم لازم تكون
"قرعة" وقرعتها بتلمع كمان، والغريبة ان في القبيلة دي الرجالة بيطولوا شعورهم.


تخيل ان في قبيلة تانية الجمال في "البيرسنج" أو انهم يخرموا جسمهم ويحطوا فيه حلقان ! عايزة اقولك انك ممكن تبص في وش المزة متلاقيش فيه اي مكان ما فيهوش حلق، لا وتلاقيها سودة وملونة وشها ومردوم حلقان..الولية اللي اول ماانت تشوفها هاتقول "اعوذ بالله من الشيطان الرجيم" هتلاقيها عندهم ملكة جمال القبيلة.



تعلى ندخل على آسيا بقى، وبالتحديد قبيلة "كارين" اللي الجمال فيها ان الست تبقى رقبتها طويلة زي رقبة الزرافة، وعشان البنت توصل لأطول طول في رقبتها، اهلها بيحطولها حلقات نحاس في رقبتها ويفضلوا يزودوا الحلقات دي على قد ما يقدروا لدرجة انت رقبة البنت ممكن توصل 40 سم..طب سؤال برئ هو لما الست دي جوزها يحطها في موقف محرج ينفع تقوله "انت خليت رقبتي قد السمسمة"؟!


أما في الصين فالجمال كله في رجلين البنت الصغيرة، البنت لازم لازم تكون رجلها صغيرة جداً، وعشان يوصلوا لده بيلبسوا البنت من وهي صغيرة جزمة صغيرة جداً وضيقة عشان يصغروا رجلها وأحياناً بيوصل طول الرجلين ل 10 سم !


في اليابان بقى في بنات اسمهم بنات "الجيشا"، ودول عبارة عن عرايس المولد بدون اي تهريج أو مبالغة، بيدهنوا وشهم كله ابيض وبيحطوا كمية مكياج على وشهم تعمل تورتاية صغيرة.

متهيألي كدة انت عرفت ان موضوع الجمال نسبي جداً، وان مفيش حاجة اسمها ست حلوة وست وحشة، فيه حاجة اسمها ست انت تشوفها حلوة وست تشوفها مش حلوة..وبس ..ببساطة كدة.


هناك 6 تعليقات:

كلام حسام يقول...

شيماء الجميلة
تقرير جميل وعرض اجمل للموضوع ينفع يكون عرض تلفزيوني رغم اني مش بحب الكلمة دي

فكرة من الزمن ده يقول...

موضوع تحفة وهايل بجد
ورايي ان الناس دي موز موز موز حاجة قشطة بس احنا اللي مش واخدين بالنا
ههههههههه
وحشتيني

فتاه من الصعيد يقول...

حوووووووووله
لولا اختلاف الاذواق لبارت البنات
تحياتي لموضوعك الجميل

شيماء الجمال يقول...

حسام..أنا كمان مش بحبها خالص
بس المجلة عاملة زي البعكوكة كدة وموجهة لعيال عندهم 16 سنة فكان لازم اتكلم باللغة دي عشان المقال يتقري

شيماء الجمال يقول...

فكرة..
هههههههههه
شكراً يا جميل

شيماء الجمال يقول...

فتاة..ايو ةحولة ..
سعيدة انه عجبك

Related Posts Plugin for WordPress, Blogger...

زوار المدونة